Korîntî I, 8 - Пәймана Ну (Инщил)

Пьрса хԝарьна ԛӧрбанед пʼутпʼарьстийе

¹ Ле ньһа чь кӧ жь пьрса ԛӧрбанед пʼута дькʼәвә: Фәʼмдари йә кӧ занәбуна мә һәр кәси жи һәйә. Занәбун пʼьшька мерьв дьԝәрьминә, ле һʼьзкьрьн ава дькә.

² Һәгәр йәк тʼәхмин дькә, кӧ әԝ тьштәки занә, әԝ рʼаст һе тьштәки ӧса ньзанә чаԝа кӧ лазьм ә бьзаньбә.

³ Ле һәгәр йәк Хԝәде һʼьз дькә, әԝ жь алийе Ԝива наскьри йә.

⁴ Аԝа дәрһәԛа ԝан ԛӧрбанед пʼутайә кӧ мәри дьхԝьн: Әм заньн кӧ пʼут һәйина хԝәва пʼучʼ ьн у Хԝәдеки дьн тʼӧнә, пештьри йәки.

⁵ Һәгәр бь навед дьн жи хԝәде һәбьн, йан ль әʼрде йан ль әʼзмен, чаԝа беһʼәсаб хԝәде у беһʼәсаб хӧдан һәнә жи,

⁶ ле бона мә тʼәне Хԝәдек һәйә, Бав, Әʼфьрандаре һәр тьшти, әм жи бона Ԝи һәнә у тʼәне Хӧданәк һәйә, Иса Мәсиһ, бь Кʼижани һәр тьшт хӧльԛи нә у бь сайа Ԝи әм һәнә.

⁷ Ле әв занәбун щәм һәр кәси тʼӧнә. Һʼәта ньһа һе дьле һьнәка пәй пʼутпʼарьстийе йә, кӧ гава ԝи гошти дьхԝьн, һʼәсаб дькьн чаԝа ԛӧрбанед пʼута у хԝә дьһʼәрʼьминьн, чьмки исафа хԝәйә сьстда фькара дькә.

⁸ Ле бәле хԝарьн мә ль бәр Хԝәде надә сәкьнандьне. Һәгәр әм бьхԝьн, тьштәки зедә накьн у һәгәр нәхԝьн, тьштәки жи кем накьн.

⁹ Ле һаш жь хԝә һәбьн, нәбә кӧ әԝ азайа ԝә бьбә кәвьрәк ль бәр ньге сьста.

¹⁰ Әм бежьн, һәгәр мәрьвәки кӧ исафа хԝәйә сьстда фькара дькә тә бьбинә, ԝәки тӧ «хԝәйизанәбун» и у ль сьфра пʼарьстгәһа пʼутда рʼуньшти йи, нә әԝ кьре тә ԝе дьл бьдә ԝи, кӧ әԝ жи ԛӧрбанед пʼутпʼарьстийе бьхԝә?

¹¹ У жь дәст ԝе «занәбуна» тә, бьре тәйи сьст, бона кʼижани Мәсиһ мьр, ԝе ӧнда бә.

¹² Бь ви аԝайи, гава тӧ нәһәԛийе ль хушк-бьред хԝә дьки у исафа ԝанә сьст бьриндар дьки, ль бәр Мәсиһ нәһәԛийе дьки.

¹³ Аԝа һәгәр хԝарьн дьбә кәвьре ль бәр пʼийе бьре мьн, гәрәке иди тʼӧ щар әз гошт нәхԝьм, ԝәки бьре хԝә пʼьшк нәкьм.