Korîntî I, 7 - Пәймана Ну (Инщил)

Пьрсед һʼал-зәԝаще

¹ Ле ньһа дәрһәԛа ԝан пьрсед кӧ ԝә мьнрʼа ньвисин: «Ԛәнщ ә ԝәки мер незики жьне нәбә?»

² Ле бона кӧ пешийа һәр щурʼә ԛавийе бе гьртьне, бьра мер бе жьн нәбә у жьн жи бе мер.

³ Мер бьра дәйне жьне бьде, жьн жи дәйне мер.

⁴ Жьн нә хԝәйа ԛальбе хԝә йә, ле мер, ӧса жи мер нә хԝәйе ԛальбе хԝә йә, ле жьн.

⁵ Жь һәвдӧ на-на нәкьн, пештьри ԝе дәме, гава һун бь һәврʼа бона ԝәхтәке тʼьфаԛ ԛьрар дькьн ԝәки хԝә бьдьнә дӧакьрьне, ле паше диса ль һәв вәгәрʼьн, кӧ мирещьн ԝә нәщерʼьбинә жь дәст бетʼаԝийа ԝә.

⁶ Әз ве йәке дьһельмә сәр әхтәрийа ԝә, нә кӧ әʼмьр дькьм.

⁷ Рʼаст ә, мьн дьхԝәст кӧ һʼәму мәрьв мина мьн буна, ле һәр мәрьвәкирʼа дайинәкә жь Хԝәде һәйә, йәк һа йә, йәк жи аһа йә.

⁸ Ле йед бе жьн у жьнәбийарʼа әз дьбежьм: Ԛәнщ ә кӧ әԝ мина мьн бьминьн.

⁹ Ле һәгәр хԝә зәфт накьн, бьра бьзәԝьщьн-мер кьн, чьмки ԛәнщ ә кӧ әԝ бьзәԝьщьн-мер кьн, нә кӧ хԝәда бьшәԝьтьн.

¹⁰ Ле йед зәԝьщи-меркьрирʼа, нә кӧ әз әʼмьр дькьм, ле бәле Хӧдан: Бьра жьн жь мер нәԛәтә,

¹¹ һәгәр бьԛәтә жи, бьра мер нәкә йан жи мере хԝәрʼа ль һәв бе. У мер жи бьра жьна хԝә бәрʼнәдә.

¹² Ле йед майинрʼа әз дьбежьм, нә кӧ Хӧдан: Һәгәр жьна бьраки нәбаԝәр бә у бьхԝазә тʼәви ԝи бьминә, бьра ԝе бәрʼнәдә.

¹³ У жьнәкә кӧ мере ԝе нәбаԝәр бә у әԝ бьхԝазә тʼәви ԝе бьминә, бьра жь ԝи нәԛәтә.

¹⁴ Чьмки мере нәбаԝәр бь жьна баԝәрмәнд һʼәлал дьбә у жьна нәбаԝәр жи бь мере баԝәрмәнд һʼәлал дьбә. Һәгәр ӧса нибуйа, зарʼед ԝәйе һʼәрам буна, ле ньһа һʼәлал ьн.

¹⁵ Ле һәгәр нәбаԝәр бьԛәтә, бьра бьԛәтә. Хушк йан бьра ве дәрәщеда аза йә. Бәле Хԝәде гази ԝә әʼдьлайийе кьр.

¹⁶ Тӧ чь зани кʼӧлфәте, бәлки те мере хԝә хьлаз ки? Йан жи тӧ чь зани меро, бәлки те кʼӧлфәта хԝә хьлаз ки?

Баԝәрмәнд гәрәке ль гора әʼмьре Хԝәде бьжин

¹⁷ Ԝәки дьн әз дьбежьм: Хӧдан чаԝа пʼара һәр кәси да у чаԝа Хԝәде гази һәр кәси кьр, бьра ԝәкә ԝе йәке жи бьжи. Әв ә тʼәмийа кӧ әз дьдьмә һʼәму щьвина.

¹⁸ Һәгәр йәк сьнәткьри бу гава һатә газикьрьне, бьра сьнәтбуна хԝә иди нәгӧһезә. Һәгәр йәк нәсьнәткьри бу гава һатә газикьрьне, бьра иди сьнәт нәбә.

¹⁹ Нә сьнәтбун тьштәк ә у нә жи нәсьнәтбун, ле сәри тʼәмийед Хԝәде ԛәдандьн ә.

²⁰ Кʼи чь һʼалида бу гава Хԝәде гази кьре, бьра нава ԝеда жи бьминә.

²¹ Хӧлам буйи гава һати газикьрьне? Хәм нәкә. Ле һәгәр дькари аза би, ԝе мәщале жь дәсте хԝә нәкә.

²² Чьмки әԝ хӧламе кӧ һатә газикьрьне, ԝәки бьбә пʼара Хӧдан, әԝ азайе Хӧдан ә, ӧса жи әԝе кӧ аза бу гава һатә газикьрьне, әԝ хӧламе Мәсиһ ә.

²³ Һун бь ԛимәтәки бьһа һатьнә кʼьрʼине, нәбьнә хӧламед мәрьва.

²⁴ Хушк-бьрано, кʼи чь һʼалида һатә газикьрьне, бьра нава ԝеда жи ль бәр Хԝәде бьминә.

Пьрсед бона ԛиз у хорта

²⁵ Ле ньһа чь жь ԛиз у хорта дькʼәвә, мьн дәрһәԛа ԝанда әʼмьр жь Хӧдан нәстандийә, ле тʼәне әз фькьра хԝә дьбежьм, чаԝа йәки жь Хӧдан рʼәʼм станди кӧ һьндава Ԝида амьн ә.

²⁶ Әз бона тәнгасийа ньһа аһа рʼе терʼа дьбиньм кӧ мәрьв чь дәрәщеда йә, бьра ӧса жи бьминә.

²⁷ Жьнева гьредайи йи? Нәкә кӧ же бьԛәти. Бе жьн и? Жьне нәгәрʼә.

²⁸ Ле һәгәр бьзәԝьщи, гӧнә наки у һәгәр ԛиз мер кә, гӧнә накә. Ле йед ӧса ԝе рʼасти охьрмед гьран бен, әз дьхԝазьм ԝә жь ԝе йәке хԝәй кьм.

²⁹ Әз ԝәрʼа дьбежьм бьрано: Ԝәхт һьндьк майә. Жь вьр шунда әԝе кӧ жьна ԝи һәйә бьра ӧса бә чаԝа йе бе жьн,

³⁰ әԝе кӧ дьгьри чаԝа йе нагьри, әԝе кӧ ша дьбә чаԝа йе ша набә, әԝе кӧ дькʼьрʼә чаԝа нә хԝәйе ԝан тьшта бә,

³¹ у әԝе кӧ шьхӧле дьнева мьжул дьбә чаԝа йе пева мьжул набә, чьмки әв дьнйа әʼйан дәрбаз дьбә.

³² Ле әз дьхԝазьм кӧ һун жь хәма дур бьн. Йе нәзәԝьщи шьхӧлед Хӧданва гиро йә, кӧ чаԝа бькә ль Хӧдан хԝәш бе.

³³ Ле йе зәԝьщи хәмед дьнева гиро йә, кӧ чаԝа бькә ль жьна хԝә хԝәш бе

³⁴ у сәр дӧ рʼийа сәкьни йә. Жьна бемер йан ԛиз шьхӧлед Хӧданва гиро йә. Мәрәме ԝе әԝ ә, кӧ әԝ рʼӧһʼ у ԛальбе хԝәда бӧһӧрти-жьбарә бә, ле йа меркьри хәмед дьнева гиро йә, кӧ чаԝа бькә ль мере хԝә хԝәш бе.

³⁵ Әз ван тьшта бона кʼара ԝә дьбежьм, нә кӧ бар дьдьмә сәр мьле ԝә, ле дьхԝазьм ԝәки һун бь тʼәрбәт у бь дьл у щан шьхӧлед Хӧданва гиро бьн.

³⁶ Ле һәгәр йәк фәʼм дькә, ԝәки һьндава дәргистийа хԝәда рʼастийе накә, тәме ԝи жи хьраб буйә кӧ гәрәке бьзәԝьщә, бьра ӧса бькә чаԝа дьхԝазә, гӧнә накә, бьра һәвдӧ бьстиньн.

³⁷ Ле әԝе кӧ гьрани сәр ԝи тʼӧнә, ле ль тәме хԝә дькарә у дьле хԝәда ԛьрар кьрийә кӧ дәргистийа хԝә ӧса хԝәй кә чаԝа бәре, әԝ тьштәки ԛәнщ дькә.

³⁸ Аԝа йе дәргистийа хԝә дьстинә, ԛәнщ дькә, ле йе кӧ ԝе бькʼьр дьһелә, һе ԛәнщ дькә.

³⁹ Жьн нә хԝәсәрихԝә йә һʼәта кӧ мере ԝе сах ә, ле һәгәр мер ле бьмьрә, әԝ аза йә, тʼәви кʼе бьхԝазә дькарә мер кә, тʼәне баԝәрмәнде Хӧдан бә.

⁴⁰ Ле әԝе һе хԝәзьли бә, кӧ ӧса бьминә. Әв ә фькьра мьн у тʼәхмина мьн Рʼӧһʼе Хԝәде нава мьнда һәйә.