Korîntî I, 6 - Пәймана Ну (Инщил)

Пьрса дәрһәԛа дәʼԝ-доза нава баԝәрмәндада

¹ Гәло әва кʼаре кьрьне йә, гава йәк жь ԝә, нава ԝи у бьре ԝида дәʼԝ-доз пешда те, тӧрӧш дькә ль бәр нәпʼака ԝе йәке дьдә сафикьрьне, нә кӧ ль бәр щьмәʼта Хԝәде?

² Чьма һун ньзаньн кӧ щьмәʼта Хԝәде ԝе диԝана дьне бькә? У һәгәр бь дәсте ԝә ԝе диԝана дьнйайе бе кьрьне, гәло һун нькарьн ван пьрсед сьвьк жи сафи кьн?

³ Чьма һун ньзаньн кӧ әме диԝана мьлйакʼәта жи бькьн? Иди кʼӧ дьминә диԝана пьрсед ве дьнйайе нәкьн?

⁴ Аԝа һәгәр нава ԝәда пьрсед ве дьнейә сафикьрьне һәбьн, һун чаԝа дькарьн һʼакьмтийе бьдьнә дәсте йед ӧса, кӧ жь алийе щьвинеда нә тʼӧ тьшт ьн?

⁵ Әз аһа дьбежьм, кӧ һун шәрм бькьн! Гәло нава ԝәда йәки сәрԝахт тʼӧнә, кӧ бькарьбә нава бьрада сәрәдәрийе бькә?

⁶ Ле бьра бьрерʼа дькʼәвә дәʼԝ-дозе, әԝ жи ль бәр нәбаԝәра!

⁷ Ԝә рʼасти ве йәкеда лап дайә дәр, кӧ һун һәврʼа дькʼәвьнә дәргәһ-диԝана. Гәло һе ԛәнщ нинә, кӧ һун бенә нәһәԛкьрьне? Гәло һе ԛәнщ нинә, кӧ һун бенә шеландьне?

⁸ Ле һун нәһәԛийе дькьн у дьшелиньн, әԝ жи хушк-бьра!

⁹ Чьма һун ньзаньн кӧ йед нәһәԛ ԝе Пʼадшатийа Хԝәде ԝар нәбьн? Нәхапьн! Нә бенамус, нә пʼутпʼарьст, нә зьнекʼар, нә жьнед һәврʼа дьбьн рʼобәт, нә меред һәврʼа дьбьн рʼобәт,

¹⁰ нә дьз, нә тьмакʼар, нә сәрхԝәш, нә бӧхданбеж, нә жи тʼаланкьр Пʼадшатийа Хԝәде ԝе ԝар нәбә.

¹¹ У жь ԝә һьнәк ӧса бун. Ле һун жь гӧна һатьнә шуштьне, һун һатьнә бӧһӧрти-жьбарәкьрьне, һун рʼаст һатьнә һʼәсабе бь наве Хӧдан Иса Мәсиһ у бь Рʼӧһʼе Хԝәдейе мә.

Бьра бәдәнед ԝә Хԝәдерʼа хьзмәткʼарийе бькә

¹² Дьбежьн: «Һәр тьшт мьнрʼа әʼдәт ә», бәле, ле һәр тьшт нә кʼар ә. «Һәр тьшт мьнрʼа әʼдәт ә», ле тʼӧ тьшт гәрәке һʼӧкӧми сәр мьн нәкә.

¹³ Дьбежьн: «Хԝарьн бона зьк ә, зьк жи бона хԝарьне йә», ле Хԝәде һәр дӧйа жи ԝе ӧнда кә. Ле бәдән нә бона ԛавийе йә, ле бона хьзмәткʼарийа Хӧдан ә у Хӧдан жи бона бәдәне хәм дькә.

¹⁴ У Хԝәдейе кӧ Хӧдан жь мьрьне рʼакьр, ԝе мә жи жь мьрьне рʼакә бь ԛәԝата Хԝә.

¹⁵ Чьма һун ньзаньн кӧ бәдәнед ԝә әндәмед Мәсиһ ьн? Әз әндәмед Мәсиһ һьлдьм тʼәви ԛава кьм? Тʼӧ щар!

¹⁶ Йан һун ньзаньн йе кӧ тʼәви ԛава дьбә, тʼәви ԝе дьбә бәдәнәк? Чаԝа ньвисар дьбежә: «Һәр дӧ ԝе бьбьнә бәдәнәк».

¹⁷ Ле әԝе кӧ тʼәви Хӧдан дьбә, дьбә рʼӧһʼәк.

¹⁸ Жь ԛавийе бьрʼәвьн! Һʼәму гӧнед майинә кӧ мәрьв дькә, жь бәдәне дәр ә, ле әԝе кӧ ԛавийе дькә, мьԛабьли бәдәна хԝә гӧна дькә.

¹⁹ Чьма һун ньзаньн кӧ бәдәнед ԝә пʼарьстгәһа Рʼӧһʼе Пироз ьн, кӧ нава ԝәда йә, Кʼижан ԝә жь Хԝәде станд? Һун нә хԝәйийе сәре хԝә нә.

²⁰ Һун бь ԛимәтәки бьһа һатьнә кʼьрʼине. Бона ве йәке бькьн кӧ пе бәдәна ԝә шькьри Хԝәдерʼа бе дайине.