Korîntî I, 15 - Пәймана Ну (Инщил)

Рʼабуна Мәсиһә жь мьрьне

¹ Әз ԝе Мьзгинийе дьхԝазьм биньмә бира ԝә хушк-бьрано, йа кӧ мьн ԝәрʼа даннасин кьр у ԝә ԛәбул кьр, сәр ԝе жи сәкьнинә.

² Бь ԝе жи һун хьлаз дьбьн, һәгәр ԝе хәбәре, йа кӧ мьн ԝәрʼа даннасин кьр, ԛәԝин бьгьрьн. Һәгәр на, баԝәрийа ԝәйе бадиһәԝа бә.

³ Мьн әв йәка сәр һәр тьштирʼа, чаԝа станд, ӧса жи да ԝә, кӧ Мәсиһ бона гӧнед мә мьр, ль гора ньвисара

⁴ у һатә дәфьнкьрьне, рʼожа сьсийа Әԝ Хԝәдеда жь мьрьне рʼабу ль гора ньвисара,

⁵ Пәтрусва хӧйа бу, пәйрʼа һәр донздәһ шандийава.

⁶ Паше щарәкерʼа пенсьд хушк-бьрайи зедәтьрва хӧйа бу, жь ԝан гәләк һʼәта ньһа сах ьн, ле һьнәк жи мьрьнә.

⁷ Паше Аԛубва хӧйа бу, пәйрʼа һʼәму шандийава.

⁸ Ахьрийе, пәй һʼәмуйарʼа мьнва хӧйа бу, чаԝа йәки нә сәре хԝә жь дийа хԝә буйи.

⁹ Чьмки әз жь шандийа йе һәри паш ьм, кӧ нә лайиԛ ьм шанди жи бемә готьне, чьмки мьн щьвина Хԝәде зеранд.

¹⁰ Ле әз бь кʼәрәма Хԝәде мә чь жи һәмә у кʼәрәма Ԝи кӧ бь мьнрʼа йә, бош-бәтал нибу. Ле сәрда әз жь ԝан һʼәму шандийа зәʼфтьр хәбьтим у нә кӧ әз бум, ле кʼәрәма Хԝәдейә кӧ бь мьнрʼа йә.

¹¹ Аԝа һәгәр әз бьм, йан әԝ бьн, әм һʼәму жи аһа даннасин дькьн у ԝә аһа жи баԝәр кьрийә.

Рʼабуна баԝәрмәндайә жь мьрьне

¹² Аԝа һәгәр әм даннасин дькьн, кӧ Мәсиһ жь мьрьне рʼабуйә, чаԝа жь ԝә һьнәк дьбежьн, кӧ рʼабуна мьрийа тʼӧнә?

¹³ Һәгәр рʼабуна мьрийа тʼӧнә, кӧ ӧса йә Мәсиһ жи жь мьрьне рʼанәбуйә.

¹⁴ У һәгәр Мәсиһ жь мьрьне рʼанәбуйә, кӧ ӧса йә даннасинийа мә жи бош-бәтал ә у баԝәрийа ԝә жи бош-бәтал ә.

¹⁵ У әме жи бьбьнә шәʼдед Хԝәдейә дәрәԝ, чьмки мә бона Хԝәде шәʼдәти да, кӧ Әԝи Мәсиһ жь мьрьне рʼакьр, ле һәгәр мьрийе рʼанәбьн, кӧ ӧса йә Әԝ жи жь мьрьне рʼанәкьрийә.

¹⁶ Чьмки һәгәр мьрийе рʼанәбьн, кӧ ӧса йә Мәсиһ жи жь мьрьне рʼанәбуйә.

¹⁷ У һәгәр Мәсиһ жь мьрьне рʼанәбуйә, ԝәки ӧса йә баԝәрийа ԝә бадиһәԝа йә, һәла һе һунә нава гӧнед хԝәда нә

¹⁸ у әԝед баԝәрийа Мәсиһда жи мьрьнә ӧнда бунә.

¹⁹ Һәгәр тʼәне әм бона ве жийине гӧмана хԝә Мәсиһ тиньн, кӧ ӧса йә әм жь һʼәму мәрьва мәʼрьмтьр ьн.

²⁰ Ле рʼаст Мәсиһ жь мьрьне рʼабуйә, чаԝа бәре дәрәмәта пешьн жь нава мьрийа рʼабуйи.

²¹ Мьрьн рʼуйе мәрьвәкида бу, бь мәрьвәки жи ԝе рʼабуна мьрийа бьбә.

²² Чаԝа һʼәмуйед жь Адәм буйи дьмьрьн, ӧса жи һʼәмуйед жь Мәсиһ буйи ԝе сах бьн.

²³ Ле һәр кәс дора хԝәда: Пешийе Мәсиһ чаԝа бәре дәрәмәта пешьн, паше йед пʼара Мәсиһ, ԝәхте һатьна Ԝида.

²⁴ Һьнге ахьри ԝе бе, гава кʼока һәр сәрԝертийе, һʼӧкӧмәтийе у ԛәԝате бинә у пʼадшатийе бьдә дәсте Бав Хԝәде.

²⁵ Чьмки Әԝ гәрәке пʼадшатийе бькә, һʼәта кӧ Хԝәде һʼәму дьжмьна бькә бьне пʼийед Ԝи.

²⁶ Дьжмьне хьлазийе кӧ ԝе кʼоке ле бинә, мьрьн хԝәха йә,

²⁷ чьмки ньвисар дьбежә: «Хԝәде һәр тьшт бьне пʼийада ельми Ԝи кьр». Ле гава те готьне «һәр тьшт» ельми Ԝи кьр, фәʼмдари йә, пештьри Ԝи Хԝәдейи, Йе кӧ һәр тьшт ельми Ԝи кьр.

²⁸ У гава һәр тьшт ельми Ԝи бьн, һьнге Кӧрʼ Хԝәха жи ԝе ельми Ԝи Хԝәдейи бә, Йе кӧ һәр тьшт ельми Ԝи кьр, ԝәки һәр тьштида Әԝ бьбә Хԝәдейе һәр тьшти.

²⁹ Ԝәки дьн готи, әԝед кӧ бона мьрийа тенә ньхӧмандьне ԝе чь бькьн? Һәгәр мьрийе тʼӧ щар рʼанәбьн, иди чьма бона мьрийа тенә ньхӧмандьне?

³⁰ Чьма әм жи һәр гав хԝә давежьнә сәр села сор?

³¹ Әԝ фьрʼнаԛбуна мьн шәʼдә йә, хушк-бьрано, йа кӧ әз пе ԝә фьрʼнаԛ дьбьм йәктийа Мәсиһ Исайе Хӧдане мәда, әз һәр рʼож дәст жь әʼмьре хԝә дькʼьшиньм.

³² Һәгәр мьн Әфәседа шәрʼе хԝә дәрәща мәрьвайеда тʼәви «сәʼва» кьр, чь кʼәтә кʼисе мьн? Һәгәр рʼабуна мьрийа ԝе тʼӧнәбә, дә иди «әм бьхԝьн-вәхԝьн, чьмки әме сьбе бьмьрьн», чаԝа һьнәк дьбежьн.

³³ Нәхапьн! «Һәвалтийа хьраб мәрьве хԝәйипʼәргал хьраб дькә».

³⁴ Рʼаст бьфькьрьн, сәр һʼьше хԝәда ԝәрьн, иди гӧна нәкьн, чьмки һьнәк жь ԝә һе Хԝәде нас накьн, әз ве йәке дьбежьм, кӧ һун шәрм бькьн.

Ԛальбе нуйи пәй рʼабуна мьрьнерʼа

³⁵ Ле бәле йәке бежә: «Мьри чаԝа дькарьн рʼабьн у ԛальбе ԝане чаԝа бә?»

³⁶ Сәре аԛьл! Әԝ тʼохьме кӧ тӧ дьчини, һʼәта «нәмьрә» жийинерʼа шин набә.

³⁷ У әԝ тьште кӧ тӧ дьчини, нә кӧ ԝи ԛальби дьчини, кʼижан кӧ ԝе бьгьһижә, ле һʼәбәкә садә йә, мәсәлә гәньм, йан жи жь тʼохьмед майин.

³⁸ У Хԝәде ԛальб дьдә ԝи тʼохьми, чаԝа кӧ дьхԝазә у һәр тʼохьмәк ԛальбе хԝә дьстинә.

³⁹ Һʼәму ԛальб хун-гоштәк ниньн, ԛальбе мерьв башԛә йә у ԛальбе һʼәйԝен башԛә, йе тәйрәда башԛә йә, йе мәʼсийа жи башԛә.

⁴⁰ Ԛальбед ль әʼзмен жи һәнә, ԛальбед ль дьне жи һәнә, ле рʼәԝша йед әʼзмен башԛә йә у йед дьне башԛә.

⁴¹ Рʼәԝша тәʼве башԛә йә, рʼәԝша һиве башԛә у рʼәԝша стәйрка жи башԛә йә у һәр стәйркәк бь рʼәԝша хԝә жь һәв тенә фьрԛикьрьне.

⁴² Бь ви аԝайи жи рʼабуна мьрийа йә: Ԛальбе дерьс те чандьне, йе нәдерьс ԝе рʼабә.

⁴³ Әԝ берʼәԝш те чандьне, бь рʼәԝше ԝе рʼабә, әԝ бетʼаԛәтийе те чандьне, бь ԛәԝате ԝе рʼабә.

⁴⁴ Ԛальбе бинбәр те чандьне у ԛальбе рʼӧһʼани ԝе рʼабә. Чаԝа кӧ ԛальбе бинбәр һәйә, ӧса жи ԛальбе рʼӧһʼани һәйә.

⁴⁵ Аһа жи ньвисар ә: «Мәрьве пешьн Адәм, бу бинбәрәки сах», ле Адәме пашьн бу рʼӧһʼәки жийиндайине.

⁴⁶ Ле бәле пешийе йе рʼӧһʼани нәбу, ле йе бинбәр, паше йе рʼӧһʼани.

⁴⁷ Мәрьве пешьн жь хԝәлийа әʼрде бу, мәрьве дӧда жь әʼзмен бу.

⁴⁸ Чаԝа йе жь хԝәлийе бу, ӧса жи йед жь хԝәлийе нә, чаԝа йе жь әʼзмен ә, ӧса жи йед жь әʼзмен ьн.

⁴⁹ У мә чаԝа кьрасе йе жь хԝәлийе ль хԝә кьрийә, әме ӧса жи кьрасе йе жь әʼзмен ль хԝә кьн.

⁵⁰ Готьна мьн әв ә хушк-бьрано, ԝәки хун у гошт ль Пʼадшатийа Хԝәде нькарьн ԝар бьн, нә жи дерьсбун ԝе ль нәдерьсбуне ԝар бә.

⁵¹ Кʼа бьбьһен, әз сӧрʼәке ԝәрʼа бежьм: Әм һʼәмуйе нәмьрьн, ле әм һʼәмуйе жи бенә гӧһастьне,

⁵² ньшкева, чаԝа чʼәʼве хԝә бьгьри-вәки, дәма борʼийа ахьрийе бе ледане. Чьмки гава борʼи бе ледане, мьри ԝе нәдерьсбуйи рʼабьн, әме жи бенә гӧһастьне.

⁵³ Чьмки гәрәке әви дерьс нәдерьсийе ль хԝә ԝәргьрә у әви мьри нәмьрийе ль хԝә ԝәргьрә.

⁵⁴ Ле гава әви дерьс нәдерьсийе ль хԝә ԝәргьрә у әви мьри нәмьрийе ль хԝә ԝәргьрә, һьнге әԝ готьне бе сери, кӧ ньвисар ә: «Сәркʼәтьне мьрьн һʼуфи хԝә кьр».

⁵⁵ «Мьрьн, кʼане ԛиле жәʼра тә? Мьрьн, кʼане сәркʼәтьна тә?»

⁵⁶ Ԛиле мьрьне гӧнә йә у ԛәԝата гӧна жь Ԛануне йә.

⁵⁷ Ле шькьр жь Хԝәде, кӧ әм бь дәсте Хӧдане мә Иса Мәсиһ сәр хьстьн.

⁵⁸ Аԝа хушк-бьрайед мьнә дәлал, ԛәԝин бьминьн, жь щийе хԝә нәһʼәжьн, һәр гав шьхӧле Хӧданда пешда һәрʼьн, бьзаньбьн хәбата ԝә бош-бәтал нинә ль бәр Хӧдан.