Korîntî I, 14 - Пәймана Ну (Инщил)

Бона пʼешкʼешед Рʼӧһʼе Пироз: Пʼехәмбәрти у зьманед хәриб

¹ Дәмана һʼьзкьрьнеда бьн у һʼәйра пʼешкʼешед рʼӧһʼанида бьн, илаһи пʼехәмбәртикьрьне.

² Әԝе кӧ бь зьмане хәриб хәбәр дьдә, әԝ нә кӧ мерьврʼа хәбәр дьдә, ле Хԝәдерʼа, чьмки кәсәк Ԝи фәʼм накә. Әԝ бь ԛәԝата Рʼӧһʼ сӧрʼа дьбежә.

³ Ле бәле йе кӧ пʼехәмбәртийе дькә, әԝ мерьврʼа хәбәр дьдә, баԝәрийа ԝан ава дькә, дьл дьдә бәр ԝан у бәр дьле ԝанда те.

⁴ Әԝе кӧ бь зьманед хәриб хәбәр дьдә, тʼәне баԝәрийа хԝә ава дькә, ле әԝе кӧ пʼехәмбәртийе дькә, щьвине пева ава дькә.

⁵ Әз дьхԝазьм кӧ һун һʼәму жи бь зьманед хәриб хәбәр дьн, ле әз һе дьхԝазьм кӧ һун пʼехәмбәртийе бькьн, чьмки йе пʼехәмбәртийе дькә, жь йед бь зьманед хәриб хәбәр дьдә четьр ә, пештьри ԝи ԝәхте кӧ те шьровәкьрьне, ԝәки щьвин бе авакьрьне.

⁶ Аԝа хушк-бьрано, һәгәр әз бемә щәм ԝә бь зьманед хәриб хәбәр дьм, әзе чь кʼаре бьдьмә ԝә? Тʼӧ кʼаре надьм һәгәр әз әʼйантийе, йан занәбуне, йан пʼехәмбәртийе, йан һинкьрьне ԝәрʼа нәйньм?

⁷ Һащәтед нәбинбәрә кӧ дәнг дәрдьхьн, әм бежьн бьлур бә, йан чәнг, һәгәр дәнге ԝан нәзәлал бә, ԝе чаԝа заньбьн чь мьԛам те лехьстьне?

⁸ Йан жи, һәгәр борʼи дәнгәки нәнас дәрхә, кʼе ԝе кʼаре хԝә ль шерʼ бькә?

⁹ Ӧса жи һун, һәгәр бь зьмен хәбәрәкә фәʼмдари нәбежьн, ԝе чаԝа бьзаньбьн һун чь дьбежьн? Хәбәрдана ԝәйе мина байе сар бә.

¹⁰ Кʼьфш ә кӧ дьнйайеда чьԛас щурʼә-щурʼә зьман һәнә, ле жь ԝан йәк жи бе фәʼмин нинә.

¹¹ Ле, һәгәр әз зьманәки фәʼм накьм, әз бона йе ԝи зьмани хәбәр дьдә хәриб ьм у йе хәбәр дьдә жи бона мьн хәриб ә.

¹² Ӧса жи һун кӧ һʼәйра пʼешкʼешед рʼӧһʼанида нә, нава ԝан пʼешкʼешада һе пешда һәрʼьн, кʼижан щьвине ава дькьн.

¹³ Бона ве йәке әԝе кӧ бь зьманед хәриб хәбәр дьдә, бьра дӧа бькә кӧ шьровәкә жи.

¹⁴ Чьмки гава әз бь зьманед хәриб дӧа дькьм, әԝ рʼӧһʼе мьн дӧа дькә, ле һʼьше мьнда тьшт рʼунани.

¹⁵ Әз чь бькьм? Әзе һьн бь рʼӧһʼе хԝә дӧа бькьм, һьн жи бь һʼьше хԝә, һьн бь рʼӧһʼе хԝә бьстьрем, һьн жи бь һʼьше хԝә.

¹⁶ Һәгәр тӧ бь рʼӧһʼе хԝә шькьрийе бьди, әԝе кӧ мина нәзана сәкьни йә, ԝе чаԝа рʼазидарийа тәрʼа ԛайл бә бежә: «Амин»? Әԝ ԛәт фәʼм накә жи, тӧ чь дьбежи.

¹⁷ Бәле тӧ рʼьнд рʼазибуне дьди, ле баԝәрийа йе дьн найе авакьрьне.

¹⁸ Әз жь Хԝәдейе хԝә рʼази мә, кӧ жь ԝә һʼәмуйа зәʼфтьр бь зьманед хәриб хәбәр дьдьм.

¹⁹ Ле бәле щьвинеда әз һе дьхԝазьм пенщ хәбәред фәʼмдари бежьм, ԝәки һьнәкед дьн жи һин бькьм, нә кӧ бь һʼәзара хәбәред хәриб.

²⁰ Хушк-бьрано, һʼьше хԝәда зарʼ нибьн! Һьндава хьрабийеда мина зарʼа бьн, ле һʼьше хԝәда гьһишти бьн.

²¹ Ԛанунеда ньвисар ә: «Әзе бь мәрьвед хԝәйе зьманед хәриб у заред хәриба ве щьмәʼтерʼа хәбәр дьм, ле бәле ԝе һьнге жи гӧһдарийа Мьн нәкьн, Хӧдан дьбежә».

²² Аԝа пʼешкʼеша зьманед хәриб нишанәк ә, нә кӧ бона баԝәрмәнда, ле бона нәбаԝәра у пʼехәмбәрти жи нә кӧ бона нәбаԝәра йә, ле бона баԝәрмәнда.

²³ Һәгәр тʼәмамийа щьвине пева бьщьвә у һʼәму жи зьманед хәриб хәбәр дьн, һьнге һьнәкә нәзан йан нәбаԝәр бькʼәвьнә һьндӧрʼ, ԝе нәбежьн: «Әвана дин бунә»?

²⁴ Ле һәгәр һʼәму жи пʼехәмбәртийе бькьн, һьнге йәки нәбаԝәр йан нәзан бькʼәвә һьндӧрʼ, ԝе жь һʼәму готьнед ԝан хԝә мӧкӧрʼ бе у бе гӧнәкʼаркьрьне,

²⁵ сӧрʼед дьле ԝида жи ԝе бенә әʼйанкьрьне у дәвәрʼу ль бәр Хԝәде бькʼәвә, ԝи бьһʼәбинә у дәнг һьлдә бежә: «Рʼасти жи Хԝәде нав ԝәда йә!»

Әʼрф-әʼдәтед щьвине

²⁶ Әм иди чаԝа бькьн гәли хушк-бьра? Гава һун дьщьвьнә щики, һәр кәсе жь ԝә чи ԝи һәбә, һәгәр кʼӧлам бә, һинкьрьн бә, әʼйанти бә, хәбәрдана зьманед хәриб бә, шьровәкьрьна зьманед хәриб бә, бьра һʼәму жи бона авабуна щьвине бьн.

²⁷ Һәгәр йәк бь зьмане хәриб хәбәр дьдә, бьра дӧдӧ бьн, йан йа лапә зәʼф сьсе, ле бьра йәк пәй йәкирʼа хәбәр дә у йәк жи шьровәкә.

²⁸ Ле һәгәр кәсәк тʼӧнә кӧ шьровәкә, бьра әԝ щьвинеда дәнге хԝә нәкә, тʼәне бәр хԝәда Хԝәдерʼа хәбәр дә.

²⁹ У жь пʼехәмбәра жи бьра дӧдӧ бьн, йан йа лапә зәʼф сьсе хәбәр дьн у йед дьн бьра әʼнәнә кьн.

³⁰ Ле һәгәр ль бәр йәки жь нава рʼуньштийа жи тьштәк вәбә, иди бьра йе пешьн дәнге хԝә бьбьрʼә.

³¹ Чьмки һун һʼәму жи, йәк пәй йәкирʼа дькарьн пʼехәмбәртийе бькьн, ԝәки һʼәму жи һин бьн у һʼәму жи дьл бьстиньн.

³² У рʼӧһʼед пʼехәмбәра бьн сәʼвитийа пʼехәмбәрада нә,

³³ чьмки Хԝәде нә Хԝәдейе бепʼәргалийе йә, ле Йе әʼдьлайийе йә. Чаԝа нава һʼәму щьвинед щьмәʼта Хԝәдеда,

³⁴ бьра жьнед ԝә щьвинеда хԝә кәрʼ кьн, чьмки изьна ԝан тʼӧнә хәбәр дьн, ле бьра гӧһдар бьн, чаԝа Ԛанун жи дьбежә.

³⁵ Ле һәгәр әԝ тьштәки дьхԝазьн бьзаньбьн, бьра ль мале жь меред хԝә бьпьрсьн, чьмки нә щайиз ә кӧ жьн щьвинеда хәбәр дә.

³⁶ Тʼӧ хәбәра Хԝәде жь ԝә дәркʼәт? Йан тʼәне гьһиштә ԝә?

³⁷ Һәгәр йәк дьфькьрә, кӧ хԝәха пʼехәмбәр ә йан рʼӧһʼани йә, бьра заньбә чь кӧ мьн ԝәрʼа ньвисин, тʼәмийа Хӧдан ә.

³⁸ Ле һәгәр йәк гӧһ надә ван тьшта, һун жи гӧһ нәдьнә ԝи.

³⁹ Аԝа хушк-бьрано, һʼәйра пʼехәмбәртикьрьнеда бьн у дәнге йед бь зьманед хәриб хәбәр дьдьн нәдьнә бьрʼине.

⁴⁰ Тʼәне һәр тьшт бьра бь тʼәрбәт, щи бь щи у маԛули бә.