Korîntî I, 12 - Пәймана Ну (Инщил)

Пʼешкʼешед Рʼӧһʼе Пироз

¹ Ле ньһа чь жь пʼешкʼешед Рʼӧһʼани дькʼәвә хушк-бьрано, әз нахԝазьм кӧ һун нәзан бьн.

² Ԝәва әʼйан ә гава һун пʼутпʼарьст бун, һун ӧса пәй пʼутед кәрʼә лал кʼәтьбун, һәр алийава кʼәтьбунә бьн ԛолед ԝан.

³ Бона ве йәке жи әз ԝәрʼа дьбежьм, тʼӧ кәс тʼӧнә кӧ бь рʼебәрийа Рʼӧһʼе Хԝәде хәбәр дә у бежә: «Бьра ньфьрʼ ль Иса бә». У кәсәк жи нькарә бежә: «Иса Хӧдан ә», һәгәр нә бь рʼебәрийа Рʼӧһʼе Пироз.

⁴ Аԝа щурʼә-щурʼә пʼешкʼешед Рʼӧһʼани һәнә, ле хут дайина ԝи Рʼӧһʼи нә,

⁵ щурʼә-щурʼә ԛӧльх жи һәнә, ле һәма ԝи Хӧданирʼа ԛӧльх дькьн,

⁶ ӧса жи щурʼә-щурʼә карин һәнә, ле хут әԝ Хԝәде йә, кӧ ван дайинада карине дьдә һәр кәси.

⁷ Ле һәр кәсирʼа Рʼӧһʼ бона кʼара һʼәмуйа хӧйа дьбә.

⁸ Йәкирʼа жь Рʼӧһʼ хәбәра сәрԝахтийе те дайине, йәкирʼа хәбәра занәбуне хут жь ԝи Рʼӧһʼи,

⁹ йәки дьнрʼа баԝәри хут жь ԝи Рʼӧһʼи, йәки дьнрʼа пʼешкʼешед нәхԝәшԛәнщкьрьне хут жь ԝи Рʼӧһʼи,

¹⁰ йәки дьнрʼа ԛәԝат, ԝәки кʼәрәмәта бькә, йәки дьнрʼа пʼехәмбәрти, йәки дьнрʼа фәʼмина кӧ рʼӧһʼа жь һәв дәрхә, йәки дьнрʼа зьманед хәриб, йәкирʼа жи шьровәкьрьна ԝан зьмана.

¹¹ Әв һʼәму жи хут Хԝәха әԝ Рʼӧһʼ дькә у һәр кәсирʼа башԛә-башԛә пʼарәвәдькә, чаԝа кӧ дьхԝазә.

Бәдән йәк ә, әндәм гәләк ьн

¹² Чаԝа бәдән йәк ә у гәләк әндәмед ԝе һәнә, ле диса әԝ һʼәму һәврʼа бәдәнәк ьн, ӧса жи Мәсиһ ә.

¹³ Рʼаст ӧса жи йәктийа Рʼӧһʼәкида әм һʼәму һатьнә ньхӧмандьне, кӧ бьбьнә бәдәнәк, һьн щьһу һьн нәщьһу, һьн хӧлам һьн аза у әм һʼәму жи жь ԝи Рʼӧһʼи данә вәхԝарьне.

¹⁴ Бәле бәдән нә тʼәне әндәмәк ә, ле жь гәләка йә.

¹⁵ Һәгәр ньг бежә: «Әз нә жь бәдәне мә, чьмки әз нә дәст ьм», гәло әва мәʼни йә, кӧ әԝ нә жь бәдәне йә?

¹⁶ У һәгәр гӧһ бежә: «Әз нә жь бәдәне мә, чьмки әз нә чʼәʼв ьм», гәло әва мәʼни йә, кӧ әԝ нә жь бәдәне йә?

¹⁷ Һәгәр тʼәмамийа бәдәне чʼәʼв буйа, ле бьһистьне ль кʼӧ буйа? Һәгәр һʼәму бәдән гӧһ буйа, бинһьлдане ль кӧ буйа?

¹⁸ Ле рʼаст Хԝәде әԝ әндәм йәко-йәко бәдәнәкеда щи кьрьн, чаԝа Ԝи хԝәст.

¹⁹ Һәгәр һʼәму әндәмәк буна, бәдәне ль кӧ буйа?

²⁰ Ле рʼаст ньһа әндәм гәләк ьн, ле бәдән йәк ә.

²¹ Чʼәʼв нькарә бежә дәст: «Тӧ кери мьн найейи!» У нә жи сәри ньгарʼа дькарә бежә: «Һун кери мьн найен!»

²² Ле сәрда әԝ әндәмед бәдәнейә кӧ сьст кʼьфш дьбьн, әԝ һе фәрз ьн

²³ у әԝ әндәмед бәдәнейә беԛәдьр тенә һʼәсабе, әм һе ԛәдьре ԝан заньн у йед әʼйбә нава ԝеда, әм һе бь тʼәрбәт дьньхемьн,

²⁴ ле әндәмед мәйә беәʼйб нә һʼәԝще ԝе йәке нә. Ле Хԝәде бәдән һәвва кьр, кӧ йе беԛәдьр һе ԛәдьр бьстинә,

²⁵ ԝәки дӧтирәти нәкʼәвә нава бәдәне, ле һʼәму әндәм жь һәвдӧрʼа шәԝат бьн.

²⁶ Ләма, гава әндәмәк еше дькʼьшинә, һʼәму әндәм һәврʼа дешьн, ле гава әндәмәк те пәсьндайине, һʼәму әндәм тʼәви ԝе ша дьбьн.

²⁷ Аԝа һун бәдәна Мәсиһ ьн у һәр йәк жь ԝә әндәмәки бәдәна Ԝи йә.

²⁸ У Хԝәде пешийе һьнәк щьвинеда кьрьнә шанди, йа дӧда пʼехәмбәр, йа сьсийа дәрсдар, паше йед кʼәрәмәткьр, пәйрʼа йед хԝәйийе пʼешкʼешед нәхԝәшԛәнщкьрьне, кʼомәкдарийе, сәʼвитийе у йед зьманед хәриб.

²⁹ Чьма һʼәму шанди нә? Чьма һʼәму пʼехәмбәр ьн? Чьма һʼәму дәрсдар ьн? Чьма һʼәму кʼәрәмәта дькьн?

³⁰ Чьма һʼәму хԝәйийе пʼешкʼешед нәхԝәшԛәнщкьрьне нә? Чьма һʼәму бь зьманед хәриб хәбәр дьдьн? Чьма һʼәму зьмана шьровәдькьн?

³¹ Дә һун һʼәйра пʼешкʼешед һе мәзьнда бьн. Ле әзе рʼекә һәрә ԛәнщ жи нишани ԝә кьм.