Korîntî I, 10 - Пәймана Ну (Инщил)

Хԝәде нәщерʼьбиньн, чаԝа щьмәʼта Исраеле щерʼьбанд

¹ Нахԝазьм хушк-бьрано, кӧ һун ньзаньбьн ԝәки кал-бавед мә һʼәму жи бьн сийа әʼԝрда бун у һʼәму жи Бәʼра Соррʼа дәрбаз бун.

² Һʼәму жи тʼәви Муса бунә йәк, әʼԝр у бәʼреда һатьнә ньхӧмандьне.

³ Һʼәмуйа жи хут әԝ хԝарьна рʼӧһʼани хԝар

⁴ у һʼәмуйа жи хут әԝ вәхԝарьна рʼӧһʼани вәхԝар, чьмки жь ԝи Ԛәйайе рʼӧһʼани вәдьхԝарьн, Йе кӧ тʼәви ԝан дьчу у әԝ Ԛәйа Мәсиһ бу.

⁵ Ле Хԝәде гәләкед жь ԝан бәгәм нәкьрьн, ләма щьнйазед ԝан бәрʼийеда һәр дәра кʼәти ман.

⁶ Иди әԝ тьшт бона мә бунә мәсәлед готи, ԝәки әм һавьжийа хԝә жь тьштед хьраб нәйньн, чаԝа ԝан дьлһавьжи кьр.

⁷ Нә жи бьбьн пʼутпʼарьст, чаԝа жь ԝан һьнәк бун, бона кʼижана ньвисар ә: «Щьмәʼте рʼуньшт хԝар, вәхԝар у рʼабун намуса һәврʼа листьн».

⁸ Әм ԛавийе нәкьн, чаԝа жь ԝан һьнәка ԛави кьр у рʼожәкеда бист се һʼәзар мәри кʼәтьн ԛьрʼ бун.

⁹ Мәсиһ нәщерʼьбиньн, чаԝа жь ԝан һьнәка щерʼьбанд у бь мәʼра һатьнә ледане мьрьн.

¹⁰ У бина хԝә тәнг нәкьн, чаԝа жь ԝан һьнәка бинтәнги кьрьн у бь дәсте мьлйакʼәте мьрьне кʼока ԝан һат.

¹¹ Әв һʼәму тьшт чаԝа мәсәлед готи дьһатьнә сәре ԝан, ле бона мә кӧ әм ахьрийа ван дәԝрада дьжин, чаԝа ширәт һатьнә ньвисаре.

¹² Аԝа кʼи дьфькьрә кӧ әԝ мьԛәрʼм сәкьни йә, бьра һаш жь хԝә һәбә кӧ нәкʼәвә.

¹³ Щерʼьбандьнед ӧса найенә сәре ԝә, пештьри ԝан щерʼьбандьнед кӧ тенә сәре мәрьвед майин. Ле Хԝәде амьн ә, Әԝ наһелә кӧ һун жь ԛәԝата хԝә дәр бенә щерʼьбандьне. Әԝе щерʼьбандьнеда дәлиләке жи бькә, кӧ һун бькарьбьн тәйах кьн.

¹⁴ Аԝа дәлалед мьн, жь пʼутпʼарьстийе бьрʼәвьн.

¹⁵ Әз чаԝа тʼәви сәрԝахта хәбәр дьдьм. Һун хԝәха бьдьнә бәр һʼәсаба, әз чь дьбежьм.

¹⁶ Әԝ кʼаса Шива Хӧдан, йа кӧ әм пе шькьрийе дьдьн, нә һәләԛәтийа хуна Мәсиһ ә? Әԝ нане кӧ әм кәрдькьн, нә һәләԛәтийа бәдәна Мәсиһ ә?

¹⁷ Нанәк һәйә, ләма әм һʼәму жи бәдәнәк ьн, чьмки әм һʼәму жи жь ԝи нани кәрдькьн.

¹⁸ Дина хԝә бьдьнә щьмәʼта Исраеле: Әԝед кӧ ԛӧрбана дьхԝьн, тʼәви ԝе пʼара горигәһе набьн?

¹⁹ Бәле әз чь бежьм? Гәло пʼут жь хԝә тьштәк ә, йан ԛӧрбанед пʼутарʼа тенә дайине бәрга тьштәки дьгьрьн?

²⁰ На хер! Ле готьна мьн әв ә, кӧ әԝ тьштед пʼутпʼарьст дькьнә ԛӧрбан, щьнарʼа дькьн, нә кӧ Хԝәдерʼа. У әз нахԝазьм кӧ һәләԛәтийа ԝә тʼәви щьна һәбә.

²¹ Һун нькарьн һьн кʼаса Хӧдан вәхԝьн, һьн жи кʼаса щьна. Һун нькарьн һьн жь сьфра Хӧдан бьхԝьн, һьн жи жь сьфра щьна.

²² Йан әм бькьн кӧ хирәта Хӧдан ԛәбул нәкә? Чьма әм жь Ԝи ԛәԝаттьр ьн?

²³ Дьбежьн: «Һәр тьшт әʼдәт ә», бәле, ле һәр тьшт нә кʼар ә. «Һәр тьшт әʼдәт ә», ле һәр тьшт ава накә.

²⁴ Нәбә кӧ йәк кʼара хԝә бьгәрʼә, ле йа һәвале хԝә.

²⁵ Чь кӧ ԛәсабханада те фьротане бьхԝьн, пәй пьрс-пьрсийара нәкʼәвьн, бона фькаркьрьна исафе.

²⁶ Чаԝа ньвисар ә: «Дьнйа бь хер-хьзна хԝәва йа Хӧдан ә».

²⁷ Һәгәр жь нәбаԝәра йәк ԝә тʼәглиф кә у һун бьхԝазьн һәрʼьн, чь бьдьнә бәр ԝә бьхԝьн, пәй пьрс-пьрсийара нәкʼәвьн, бона фькаркьрьна исафе.

²⁸ (Ле һәгәр йәк ԝәрʼа бежә: «Әва ԛӧрбан ә», иди нәхԝьн бона йе кӧ һун пе һʼәсандьн у бона фькаркьрьна исафе.

²⁹ Готьна мьн нә бона фькара исафа ԝә йә, ле йа һәвале ԝә.) Чьма гәрәке азайийа мьн бона фькара исафа йәки майин бе ломәкʼаркьрьне?

³⁰ Һәгәр әз шькьрийе дьдьмә Хԝәде дьхԝьм, чьма бона ԝе йәке хәйба мьн дькьн, ԝәки әз шькьрийа хԝә Хԝәде тиньм?

³¹ Аԝа һәгәр һун бьхԝьн, вәхԝьн, йан чь шьхӧли кӧ һун бькьн, һәр тьшти бона шькьрдайина Хԝәде бькьн.

³² Нә ньг бавежьнә бәр щьһуйа, нә бәр нәщьһуйа, нә жи бәр щьвина Хԝәде,

³³ чаԝа әз жи һәр алийава ль һʼәмуйа хԝәш тем у кʼара хԝә нагәрʼьм, ле йа гәләка, ԝәки хьлаз бьн.