Korîntî I, 1 - Пәймана Ну (Инщил)

Сьлавкьрьн

¹ Жь Паԝлосе кӧ бь әʼмьре Хԝәде шандитийа Мәсиһ Исарʼа газикьри, тʼәви Состенисе бьра,

² щьвина Хԝәдейә Корьнтʼерʼа, бӧһӧрти-жьбарәбуйийед йәктийа Мәсиһ Исада, йед пирозбунерʼа газикьри, тʼәви ԝан һʼәмуйед кӧ һәр дәра гази наве Хӧдане мә Иса Мәсиһ дькьн, Әԝ Хӧдане ԝан у мә йә:

³ Дә бьра кʼәрәм у әʼдьлайийа Хԝәдейе Баве мә у Хӧдан Иса Мәсиһ ль ԝә бә.

Шькьрдарийа Паԝлос

⁴ Әз һәр гав бона ԝә шькьрийе дьдьмә Хԝәдейе хԝә, бона ԝе кʼәрәма Ԝи, йа кӧ бь сайа Мәсиһ Иса ԝәрʼа һатийә дайине.

⁵ Бәле һун бь йәктийа Ԝи һәр тьштида дәԝләти бун, һәр хәбәрдане у һәр занәбунеда.

⁶ Һинкьрьна дәрһәԛа Мәсиһда нава ԝәда һʼиме хԝә ӧса гьртийә,

⁷ кӧ һун кемасийа тʼӧ пʼешкʼеше накʼьшиньн, гава һивийа хӧйабуна Хӧдане мә Иса Мәсиһ ьн.

⁸ Әԝе ԝә һʼәта хьлазийе һʼимгьрти хԝәй кә, кӧ һун Рʼожа һатьна Хӧдане мә Иса Мәсиһ беләкʼә бьн.

⁹ Амьн ә әԝ Хԝәдейе кӧ гази ԝә кьр, ԝәки һун тʼәви Кӧрʼе Ԝи Иса Мәсиһе Хӧдане мә бьн.

Дӧтирәтийа щьвина Корьнтʼеда

¹⁰ Дә әз иди һиви жь ԝә дькьм хушк-бьрано, бь наве Хӧдане мә Иса Мәсиһ, бьра готьна ԝә һʼәмуйа йәк бә у дӧтирәти нава ԝәда тʼӧнәбьн, ле һʼәму жи бь һәврʼа бьн у сәр нет-мәрәмәки бьн.

¹¹ Чьмки мьн сальхе ԝә жь мала Хьлойе һьлда хушк-бьрано, кӧ нава ԝәда дәʼԝ-доз һәнә.

¹² Аԝа готи дьхԝазьм бежьм, ԝәки нава ԝәда йәк дьбежә: «Әз Паԝлоси мә», йәк дьбежә: «Әз Аполойи мә», йәк жи дьбежә: «Әз Пәтруси мә» у йәки дьн жи дьбежә: «Әз Мәсиһи мә».

¹³ Чьма Мәсиһ пʼарәвәбуйи йә? Чьма Паԝлос бона ԝә хач буйә? Йан бь наве Паԝлос һун пе аве һатьнә ньхӧмандьне?

¹⁴ Әз жь Хԝәде рʼази мә, кӧ мьн жь ԝә тʼӧ кәс нәньхӧманд, пештьри Кьриспо у Гайос.

¹⁵ Ньһа тʼӧ кәс нькарә бежә, кӧ һун бь наве мьн һатьнә ньхӧмандьне.

¹⁶ (Рʼаст ә мьн мала Стәйфан жи ньхӧманд. Ле ԝәки майин найе бира мьн, кӧ мьн йәки дьн ньхӧмандьбә.)

¹⁷ Чьмки Мәсиһ әз ньхӧмандьнерʼа нәшандьм, ле Мьзгинидайинерʼа у әз ве йәке надьмә зора хәбәрдана зьмен, кӧ нәбә ԛәԝата хаче Мәсиһ бәр тьштәки нәйе һʼәсабе.

Мәсиһ ԛӧдрәта Хԝәде у сәрԝахтийа Хԝәде йә

¹⁸ Рʼаст ә һинкьрьна дәрһәԛа хачда ӧндабуйийарʼа беһʼьши йә, ле мә хьлазбуйийарʼа, ԛәԝата Хԝәде йә.

¹⁹ Чаԝа ньвисар ә: «Әзе сәрԝахтийа сәрԝахта ӧнда кьм у билантийа билана бәтал кьм».

²⁰ Кʼанен сәрԝахт? Кʼанен занә? Кʼанен аԛьлмәндед ве дьнйайе? Нә сәрԝахтийа ве дьнйайе Хԝәде кьрә беһʼьши?

²¹ Чьмки сәрԝахтийа Хԝәде нәһьшт кӧ дьнйа бь сәрԝахтийа хԝә Ԝи нас кә, ле ль Хԝәде хԝәш һат, бь ԝе һинкьрьна «беһʼьши» йед кӧ баԝәр дькьн хьлаз кә.

²² Щьһу кʼәрәмәта дьхԝазьн у йунан жи сәрԝахтийе дьгәрʼьн.

²³ Ле әм, Мәсиһе хачбуйи даннасин дькьн, щьһуйарʼа пʼьшкбун ә, нәщьһуйарʼа жи беһʼьши,

²⁴ ле бона йед кӧ Хԝәде гази ԝан дькә, һәгәр щьһу бьн, һәгәр нәщьһу, әԝ хәбәр Мәсиһ ә, ԛәԝата Хԝәде у сәрԝахтийа Хԝәде.

²⁵ Чьмки әԝ кьред Хԝәдейә кӧ бәр чʼәʼве мәрьва беһʼьши хӧйа дьбьн, әԝ жь сәрԝахтийа мәрьвайе сәрԝахттьр ьн у бәр чʼәʼве мәрьва чьԛас сьстийа Хԝәде хӧйа дьбә, әԝ жь ԛәԝата мәрьвайе ԛәԝаттьр ә.

²⁶ Дина хԝә бьдьне хушк-бьрано, һун кʼи бунә кӧ Хԝәдеда һатьнә газикьрьне: Алийе дьнеда жь ԝә гәләк нә сәрԝахт бунә, жь ԝә гәләк дьнеда нә зор бунә у нә жи жь ԝә гәләк малед рʼәнгинда бунә.

²⁷ Ле Хԝәде беһʼьшед дьне бьжартьн, ԝәки сәрԝахта бьдә шәрме у сьстед дьне бьжартьн, ԝәки йед ԛәԝат бьдә шәрме

²⁸ у Хԝәде йед дьнебехәбәрә берʼумәт у йед нә тʼӧ тьшт бьжартьн, кӧ һәйинед бәрбьчʼәʼв рʼәт кә һәрʼә,

²⁹ ԝәки тʼӧ ԛул-бәндә ль бәр Хԝәде пе хԝә нәфьрʼә.

³⁰ Әԝи һун тʼәви Мәсиһ Иса кьрьн у Мәсиһ бона мә кьрә сәрԝахти. Әм бь Ԝи рʼаст тенә һʼәсабе, пироз у аза дьбьн.

³¹ Аԝа чаԝа ньвисар ә: «Йе кӧ дьфьрʼә, бьра бь Хӧдан бьфьрʼә».