Kolosî 2 - Пәймана Ну (Инщил)

¹ Әз дьхԝазьм һун заньбьн кӧ әз чь шәрʼи дькьм бона ԝә, йед Лаԝдькйайе у һʼәмуйед кӧ рʼу бь рʼу әз нәдитьмә.

² Әз аһа дькьм, ԝәки дьлшьдийайи бьн, һʼьзкьрьнеда бьбьн йәк у бьгьһижьнә тʼәмамийа дәԝләмәндтийа фәʼмдарийе. Һьнге әԝе сӧрʼа Хԝәде нас кьн, кӧ Мәсиһ ә.

³ Әԝ ә кʼьлита һʼәму хьзна занәбуне у сәрԝахтийа вәшарти.

⁴ Әз ве йәке дьбежьм, ԝәки тʼӧ кәс ԝә бь заре ширьн нәхальфинә.

⁵ Рʼаст ә әз бәдәна хԝәда жь ԝә дур ьм, ле рʼӧһʼе хԝәда тʼәви ԝә мә у әз ша мә кӧ пʼәргалийа ԝәйә тʼьфаԛ у әԝ баԝәрийа ԝәйә сәр Мәсиһ шьдийайи дьбиньм.

Жийина йәктийа Мәсиһда

⁶ Аԝа ԝә чаԝа Хӧдан Мәсиһ Иса ԛәбул кьр, ӧса жи йәктийа Ԝида бьжин,

⁷ рʼаԝ авити, сәр Ԝи чекьри у баԝәрийеда шьдийайи һʼимгьрти бьн, чаԝа һун һатьнә һинкьрьне. У һәр гав бь дьле рʼази шькьрийе бьдьнә Ԝи.

⁸ Һаш жь хԝә һәбьн, нәбә кӧ йәк бь сәрԝахтийа дәрәԝә пʼучʼ дьле ԝә бькә һесир. Әԝ жь әʼдәтед мәрьва у сьхьред ве дьнйайе тен, нә жь Мәсиһ.

⁹ Чьмки тʼәмамийа бьнйатʼа Хԝәдетийе нава Мәсиһе бәдәнида йә

¹⁰ у һун жи йәктийа Ԝида гьһишти нә, кӧ сәре һʼәму сәрԝертийа у һʼӧкӧмәтийа йә.

¹¹ Йәктийа Ԝида һун бь сьнәта бе дәст жь алийе Мәсиһда дьле хԝәда һатьнә сьнәткьрьне, жь бьнйатʼа хԝәйә гӧнәкʼар һатьнә бьрʼине.

¹² Гава һун пе аве һатьнә ньхӧмандьне, тʼәви Ԝи һатьнә дәфьнкьрьне у бь ԝе ньхӧмандьне жи һун тʼәви Ԝи жь мьрьне рʼабун, чьмки ԝә баԝәрийа хԝә бь ԛәԝата Ԝи Хԝәдейи ани, Йе кӧ Мәсиһ жь мьрьне рʼакьр.

¹³ У һун ԝәхтәке бь рʼӧһʼани нава нәһәԛийа у бьнйатʼа хԝәйә гӧнәкʼарә нәсьнәткьрида мьри бун, ле Хԝәде һун тʼәви Мәсиһ сах кьрьн. Әԝи һʼәму нәһәԛийед мә бахшандьнә мә

¹⁴ у әԝ кʼахаза дәйнед мәйә кӧ бь ԛәйдә-ԛануни мьԛабьли мә һатьбу ньвисаре рʼәсит кьр, жь наве һьлда хачва мьх кьр.

¹⁵ Бь ԝи хачи Мәсиһ чʼәкед сәрԝер у һʼӧкӧмәтед тәʼристанийе да данине, әԝ чаԝа һесир пәй Хԝә бьрьн, нава кʼома Хԝәйә сәркʼәтида кьрьнә сосрәт.

¹⁶ Аԝа гӧһ нәдьнә тʼӧ кәси, йед кӧ бона пьрса хԝарьн, вәхԝарьне йан жи бона пьрса щәжьна у щәжьнед һива ну ӧса жи рʼожед шәмийа, ԝә ломәкʼар дькьн.

¹⁷ Әв һʼәму сийа ԝан тьшта нә, йед кӧ ԝе бен, ле рʼасти Мәсиһ ә.

¹⁸ Нәбә кӧ йәк дәсте ԝә жь ләщхәлате бькә, йе кӧ бь хԝәньмьзкьрьна һʼьләкʼари, мьлйакʼәт-һʼәбандьне у бь гиробуна дитьнед бәр чʼәʼва мьжул ә. Йед ӧса бь фькьред пʼучʼә мәрьвайи пʼьшька хԝәда дьԝәрьмьн

¹⁹ у хԝә иди ль Сери нагьрьн, кӧ Мәсиһ ә. Бь Ԝи тʼәмамийа бәдәне бь пʼәвгьрек у севькава һәвва гьредайи те хԝәйикьрьне у бь гиһандьна Хԝәде дьгьһижә, ль гора хԝәстьна Ԝи.

²⁰ Аԝа һәгәр һун тʼәви Мәсиһ мьрьнә у жь сьхьред ве дьнйайе аза бунә, иди һун чьма мина бәре пәй әʼрф-әʼдәтед ве дьнйайе дьчьн? Һун чьма гӧһ дьдьнә тʼәмийед аһа? Мәсәлә:

²¹ «Незик нәбә, тәʼм нәкә, ле нәкʼәвә».

²² Әв һʼәму мьжули жи ԝе пʼучʼ бьн һәрʼьн, әвана жь тʼәми у һинкьрьнед мәрьва нә.

²³ Фәʼмдари йә кӧ әв әʼрф-әʼдәт чаԝа сәрԝахти хӧйа дьбьн, гава дькьнә стуйе хԝә кӧ мьлйакʼәта бьһʼәбиньн, хԝә ньмьз кьн у бәдәна хԝә бьдьнә щәфе, ле әв һʼәму мьԛабьли бьнйатʼа гӧнәкʼар тʼӧ тьшти накьн.