Kolosî 1 - Пәймана Ну (Инщил)

Сьлавкьрьн

¹ Жь Паԝлосе бь әʼмьре Хԝәде шандийе Мәсиһ Иса у жь Тимотʼейойе бьра,

² щьмәʼта Хԝәдерʼа, ԝан хушк-бьрайед амьнә йәктийа Мәсиһда кӧ Колосйайеда дьминьн: Дә бьра кʼәрәм у әʼдьлайийа Хԝәдейе Баве мә ль ԝә бә.

Дӧа у шькьрдайина Паԝлос

³ Әм тʼьме гава бона ԝә дӧа дькьн, шькьрийа хԝә ль Хԝәдейе Баве Хӧдане хԝә Иса Мәсиһ тиньн,

⁴ чьмки мә бона ԝе баԝәрийа ԝәйә сәр Мәсиһ Иса у ԝе һʼьзкьрьна ԝәйә һьндава тʼәмамийа щьмәʼта Хԝәдеда бьһистийә.

⁵ Әв йәк жь ве гӧмане те, йа кӧ әʼзманада ԝәрʼа те хԝәйикьрьне, бона кʼижане ԝә бьһистийә, гава пешда хәбәра Мьзгинийейә рʼаст

⁶ гьһиштә ԝә. У әԝ Мьзгини тʼәмамийа дьнйайеда дьгьһижә у бәр дьдә, чаԝа нава ԝәда жи жь ԝе рʼожеда, гава ԝә бьһист у кʼәрәма Хԝәде тʼәмамийа рʼастийа ԝева нас кьр.

⁷ Һун ве йәке жь һәвалхӧламе мәйи һʼьзкьри Епафрас һин бунә, кӧ һьндава мәда бәрдәстики Мәсиһи амьн ә.

⁸ Әԝи бона ԝе һʼьзкьрьна кӧ Рʼӧһʼ дайә ԝә мәрʼа гот.

⁹ Бона ԝе йәке жи жь ԝе рʼожеда гьрти, гава мә бона ԝә бьһист, мә дәст жь дӧа у һивикьрьне нәкʼьшандийә, ԝәки һун занәбуна әʼмьре Хԝәдеда гьһишти бьн, бь һʼәму сәрԝахти у занәбуна рʼӧһʼанива тʼьжи бьн,

¹⁰ ԝәки һун бькарьбьн хԝә ӧса хԝәй кьн, чаԝа лайиԛи Хӧдан ә, һәр алийава ль Ԝи хԝәш бен, һәр ԛәнщикьрьнеда хԝәйибәр бьн, бь занәбуна Хԝәде бьгьһижьн.

¹¹ Бьра һун анәгори тʼәмамийа ԝе ԛәԝата Ԝийә кӧ жь зорайийа Ԝийә хԝәйирʼумәт те ԛәԝат бьн, кӧ һун һәр тьштида бь думька дьреж сәбьр бькьн. Бь әшԛ

¹² шькьрийа хԝә бьдьнә Баве, кӧ һун лайиԛи ве йәке кьрьнә, ԝәки һун Пʼадшатийа рʼонайеда тʼәви щьмәʼта Ԝи бьбьнә хԝәйипʼар.

¹³ Әԝи әм жь һʼӧкӧмәтийа тәʼристанийе хьлаз кьрьн у щи-гӧһасти Пʼадшатийа Кӧрʼе Хԝәйи һʼьзкьри кьрьн,

¹⁴ пе кʼижани әм аза бун, аԝа готи мә бахшандьна гӧна станд.

Кʼи йә Мәсиһ у шьхӧле Ԝи чь йә?

¹⁵ Әԝ ә сурәте Хԝәдейе кӧ хӧйа набә, Әԝ Ньхӧрийе сәр һʼәму әʼфьринарʼа.

¹⁶ Чьмки бь дәсте Ԝи һәр тьштед ль әʼрд у әʼзмана әʼфьринә, чь кӧ хӧйа дьбьн, чь кӧ хӧйа набьн, һәгәр кʼӧрси йан хӧданти бьн, һәгәр сәрԝерти йан һʼӧкӧмәти бьн, һәр тьшт бь дәсте Ԝи у бона Ԝи әʼфьринә.

¹⁷ Әԝ бәри һәр тьшти һәбу у һәр тьшт бь сайа сәре Ԝи щийе хԝәда дьминьн.

¹⁸ Әԝ ә сәре Бәдәне, аԝа готи сәре щьвине, дәстпебуна ԝе у ньхӧрийе жь нава мьрийа, ԝәки һәр тьштида Әԝ бьбә Йе пеш.

¹⁹ Чьмки ль Хԝәде хԝәш һат, кӧ тʼәмамийа бьнйатʼа хԝәдетийе нава Ԝида бә

²⁰ у бь Ԝи һәр тьшти тʼәви Хԝә ль һәв бинә, һәгәр ль сәр әʼрде бә, йан жи ль әʼзмана бә, бь ԝе хуна Ԝийә сәр хаче рʼьжийайи әʼдьлайийе бькә.

²¹ Һун жи кӧ ԝәхтәке жь дәст фькьр у кьрьнед хԝәйә хьраб, хәриб у нәйаред Хԝәде бун,

²² ле ньһа Әԝи бь мьрьна Мәсиһә бәдәни һун тʼәви Хԝә ль һәв анин, ԝәки ԝә ль бәр Хԝә пироз, беләкʼә у бесущ бьдә сәкьнандьне.

²³ Ле тʼәне гәрәке һун баԝәрийеда һʼимгьрти ԛәԝин бьминьн у жь ԝе гӧмана Мьзгинийе нәкʼәвьн, йа кӧ ԝә бьһист у ԝан һʼәмуйарʼа, йед кӧ бьн пʼәрʼе әʼзменда дьминьн һатә даннасинкьрьне. У әз, Паԝлос бумә бәрдәстийе ԝе.

Щәфайед Паԝлосә бона щьвина Хԝәде

²⁴ Әз ньһа ван щәфайед хԝәда, кʼижана кӧ бона ԝә дькʼьшиньм, ша мә у ԝан тәнгасийед Мәсиһә майин бь щанийа хԝә бона Бәдәна Ԝи, йа кӧ щьвин ә, тʼәмам дькьм.

²⁵ Әз ԝе щьвинерʼа бумә бәрдәсти, әв йәк алийе Хԝәдеда чаԝа дәйн кʼәтә стуйе мьн, ԝәки готьна Хԝәде тʼәмамийе пева бьгьһиньмә ԝә,

²⁶ әԝ сӧрʼа кӧ жь дәԝр у ԛӧрʼнада вәшарти бу, ле ньһа щьмәʼта Ԝива әʼйан бу.

²⁷ Хԝәде хԝәст ль бәр щьмәʼта Хԝә вәкә, кӧ чь дәԝләмәндтикә хԝәйирʼумәт ве сӧрʼеда бона һʼәму мьләта һәйә. У әԝ сӧрʼ әв ә, кӧ Мәсиһ нава ԝәда йә, аԝа готи һун гӧмана ԝе йәке нә, кӧ пʼара рʼумәте бьн.

²⁸ Әм Ԝи даннасин дькьн, һәр кәси ширәт дькьн, һәр кәси бь һʼәму сәрԝахтийе һин дькьн, ԝәки һәр кәси йәктийа Мәсиһда гьһишти ль бәр Хԝәде бьдьнә сәкьнандьне.

²⁹ Бона ԝе йәке жи әз дьхәбьтьм у анәгори ԝе ԛәԝата Ԝи шәрʼе хԝә дькьм, Йа кӧ нава мьнда бь зорайи йа Хԝә дькә.