یعقوب 5 - Пәймана Ну (Инщил)

Бона дәԝләтийа

¹ Ньһа һун бьбьһен, дәԝләтино! Бьгьрин у шине бькьн бона ԝе бәләнгазийа кӧ ԝе бе сәре ԝә.

² Һәбука ԝә рʼьзи йә, кʼьнщед ԝә жи бунә хӧре бьзузе.

³ Зерʼ у зиве ԝә зәнг гьртьн ә у зәнга ԝане бьбә шәʼде мьԛабьли ԝә у мина алава егьр гоште ԝә һʼуфи хԝә кә. Ԝә бона рʼожед ахьрийе хьзнә хԝәрʼа тʼоп кьр!

⁴ Ԝә әԝ һәԛед пʼалед кӧ әʼрде ԝә дьдьрутьн нәдане. Ва йә әԝ һәԛ дькьнә зарин. Шькийате ԝан пʼала гьһиштийә гӧһе Хӧдане Зор.

⁵ Ԝә ль сәр дьне чʼәʼве хԝә тьштәкида нәһьштийә, ль гора дьле хԝә хԝарийә-вәхԝарийә, чаԝа кʼозикьри, бона рʼожа сәржекьрьне.

⁶ Ԝә әԝ мәрьвед рʼаст ломәкʼар кьрьн у кӧштьн, кʼижан кӧ мьԛабьли ԝә рʼанәбун.

Сәбьр у дӧа

⁷ Аԝа хушк-бьрано, сәбьр кьн һʼәта һатьна Хӧдан. Дина хԝә бьдьне, щоткʼар һивийа бәре әʼрдейи бь ԛимәт ә, бона ԝе йәке сәбьр дькә һʼәта барана пешьн у пашьн ледә.

⁸ Һун жи сәбьр кьн, гӧмана хԝә ӧнда нәкьн, чьмки һатьна Хӧдан незик ә.

⁹ Бина хԝә жь һәвдӧ тәнг нәкьн хушк-бьрано, кӧ диԝана ԝә нәбә. Ва йә һʼакьм пьшт дери сәкьни йә.

¹⁰ Хушк-бьрано, алийе тәʼли-тәнгийа у сәбьреда чʼәʼв бьдьнә ԝан пʼехәмбәра, йед кӧ бь наве Хӧдан хәбәр данә.

¹¹ Бәле әм хԝәзийа хԝә ль йед сәбьр дькьн тиньн. Ԝә бона сәбьра Ибо бьһистийә у ԝә дит, Хӧдан ахьрийа ԝи чаԝа хер кьр, чьмки Хӧдан гәләки исаф у рʼәʼм ә!

¹² Бәри һәр тьшти хушк-бьрайед мьн, сонд нәхԝьн, нә бь әʼзмен, нә бь әʼрде, нә жи сондәкә майин. Бьра «Бәле»-йа ԝә бәле бә, «На»-йа ԝә на бә, ԝәки һун диԝане сәр хԝәда нәйньн.

¹³ Һәгәр йәк жь ԝә тәʼли-тәнгийеда йә, бьра дӧа бькә. Һәгәр йәк ша йә, бьра әшԛи Хԝәде бьстьре.

¹⁴ Һәгәр йәк жь ԝә нәхԝәш ә, бьра гази бәрпьрсийаред щьвине кә, сәр ԝида бьра дӧа бькьн, бь наве Хӧдан бь рʼун рʼун кьн.

¹⁵ У дӧайе бь баԝәрийе ԝе йе нәхԝәш ԛәнщ кә у Хӧдан ԝе ԝи рʼакә сәр пʼийа. У һәгәр гӧнәк жи кьрьбә, ԝе ԝи бе бахшандьне.

¹⁶ Ләма бәр һәв гӧнед хԝә бьдьнә рʼуйе хԝә у бона һәв дӧа бькьн, ԝәки һун ԛәнщ бьн. Дӧайе йе рʼаст гәләки ԛәԝат ә у һʼӧкӧм дькә.

¹⁷ Елйас хут мәрьвәки мина мә бу, бь дьл у щан дӧа кьр, кӧ баран нәбарә у се сал у нива сәр әʼрде баран нәбари.

¹⁸ У паше диса дӧа кьр, жь әʼзмен баран бари у әʼрде бәре хԝә да.

¹⁹ Гәли хушк-бьрайед мьн! Һәгәр йәк жь ԝә жь рʼийа рʼастийе бькʼәвә у йәки дьн ԝи вәгәрʼинә,

²⁰ бьра әԝ заньбә йе кӧ гӧнәкʼар жь рʼийа ԝийә хальфи вәдьгәрʼинә, әԝ рʼӧһʼәки жь мьрьне хьлаз дькә у гәләк гӧна рʼәсит дькә.