یعقوب 4 - Пәймана Ну (Инщил)

Йаре дьне, нәйаре Хԝәде

¹ Жь кʼӧ нә әԝ шәрʼ у дәʼԝе нава ԝәда? Нә жь тәмед ԝә нә, кӧ нава дьле ԝәда шәрʼе хԝә дькьн?

² Чʼәʼве ԝә ль тьшта йә, ле накʼәвә дәсте ԝә, дькӧжьн у чʼәʼвнәбарийе дькьн, ле нькарьн бьгьһижьнә мәрәме хԝә, һьнге һун һәврʼа дькʼәвьнә һʼӧщәте у шәрʼ дькьн. Һун дәст нахьн, чьмки һун һиви жь Хԝәде накьн.

³ У гава һиви дькьн, настиньн, чьмки сәр нета хьрабийе һиви дькьн, ԝәки кʼефед дьле хԝә дәрбаз кьн.

⁴ Беәʼсьлно! Һун ньзаньн кʼе ве дьне һʼьз дькә, әԝ нәйартийе ль Хԝәде дькә? Аԝа кʼи дьхԝазә бьбә йаре дьне, әԝ хԝә дькә нәйаре Хԝәде.

⁵ Йан тʼәхмина ԝә бадиһәԝа ньвисар дьбежә, кӧ Хԝәде дәмана ԝи рʼӧһʼе бәр мәда йә?

⁶ Ле бәле әԝ һе кʼәрәме дьдә мә. Ләма ньвисар дьбежә: «Хԝәде мьԛабьли кʼӧбар-бабаха йә, ле кʼәрәме дьдә шкәстийа».

⁷ Аԝа бәр Хԝәде шкәсти бьн. Мьԛабьли мирещьн бьсәкьньн у әԝе жь ԝә бьрʼәвә.

⁸ Хԝә ль Хԝәде бьгьрьн, Хԝәде жи ԝе Хԝә ль ԝә бьгьрә. Дәстед хԝә бьшон, гӧнәкʼарно, дьле хԝә паԛьж кьн, дӧдьлино.

⁹ Бьнәʼльн, шин у гьри бьн, бьра кʼәне ԝә бьбә шин у әшԛа ԝә жи кʼәдәр.

¹⁰ Ль бәр Хӧдан хԝә бьшкеньн у Әԝе ԝә бьльнд кә.

Хәйба бьре хԝә нәкә

¹¹ Хәйба һәвдӧ нәкьн хушк-бьрано. Кʼи хәйба бьре хԝә дькә, йан лома бьре хԝә дькә, әԝ хәйба Ԛануне дькә у лома Ԛануне дькә. Ле һәгәр тӧ лома Ԛануне дьки, иди тӧ Ԛануне наԛәдини, ле һʼакьме ԝе йи.

¹² Тʼәне Ԛанундарәк у Һʼакьмәк һәйә, кӧ дькарә һьн хьлаз кә у һьн жи ӧнда кә. Ле тӧ кʼи йи кӧ лома һәвале хԝә дьки?

Һʼәвза хԝә жь кʼӧбарийе бькьн

¹³ Ньһа һун гӧһдар бьн, йед кӧ дьбежьн: «Иро йан сьбе әме һәрʼьнә фьлан бажари у ль ԝе дәре саләке бьминьн, тʼӧщарәтийе бькьн у ԛазьнщ кьн».

¹⁴ Һун ньзаньн ԝе сьбе чь бе сәре ԝә. Әʼмьре ԝә чь йә? Һун мина мьже нә, һәԝ дьньһерʼи һәйә, һәԝ дьньһерʼи тʼӧнә.

¹⁵ Гәрәке һун аһа бежьн: «Һәгәр Хӧдан бьхԝазә, әме бьжин у фьлан йан беван тьшти бькьн».

¹⁶ Ле һун бь кʼӧбар-бабахийа хԝә дьфьрʼьн. Һәр пʼәйдайинәкә аһа хьраби йә.

¹⁷ Аԝа әԝе кӧ занә ԛәнщийе бькә у накә, әԝ жерʼа гӧнә йә.