Îbranî 6 - Пәймана Ну (Инщил)

¹ Аԝа әм һинбунед пешьнә сәр Мәсиһ алики бьһельн, бенә сәр һинбуна гьһишти. Әм диса һʼим нәвежьн нәйенә сәр вәгәрʼандьна жь ԝан кьрьнед кӧ дьбьнә бәрбь мьрьне, Хԝәдебаԝәркьрьне,

² һинбуна сәр ньхӧмандьна, дәстданине, рʼабуна мьрийа у диԝана һʼәта-һʼәтайе.

³ Әме бь дәстура Хԝәде һинбуна гьһиштида пешда һәрʼьн!

⁴ Чьмки йед кӧ щарәке һатьнә рʼонайикьрьне, пʼешкʼеша әʼзмен тәʼм кьрьнә у Рʼӧһʼе Пироз пʼар стандьн,

⁵ ӧса жи хәбәра Хԝәдейә ԛәнщ у ԛәԝатед дьнйа ԝе бе тәʼм кьрьнә,

⁶ һәгәр әԝ жь ԝе баԝәрийе бькʼәвьн, иди набә кӧ әԝана диса вәгәрʼьн сәр хԝәда бен, чьмки әԝана щарәкә дьн Кӧрʼе Хԝәде нав хԝәда хач дькьн у дькьнә сосрәт.

⁷ Әԝ әʼрде кӧ гәләк щара баран сәрда дьбарә, ава хԝә дьстинә у дәрәмәта кʼар дьдә ԝан, бона кʼижана те бещәркьрьне, дӧайе Хԝәде те сәр ԝе.

⁸ Ле әԝе кӧ дьрʼи у стьрийа дьгьһинә, бекер ә у һежайи ньфьрʼе йә, ахьрийа ԝе жи шәԝат ә.

⁹ Рʼаст ә әм аһа хәбәр дьдьн дәлално, ле әм ԝәда гӧман ьн, ԝәки һун сәр рʼекә һе ԛәнщ ьн, кӧ ԝә дьбә бәрбь хьлазбуне.

¹⁰ Хԝәде сәр нәһәԛийе нинә, ԝәки кьред ԝә у әԝ һʼьзкьрьна кӧ ԝә бона наве Ԝи да кʼьфше бир бькә, йа кӧ ԝә щьмәʼта Хԝәдерʼа хьзмәткʼари кьр у дькьн жи.

¹¹ Ле әм мӧһʼтащ ьн ԝәки жь ԝә һәр йәк һʼәта хьлазийе ԝе хирәте бьдә кʼьфше, кӧ гӧмана ԝә һʼимгьрти бьминә.

¹² Әм нахԝазьн кӧ һун хԝәрʼанәдити бьн, ле чʼәʼв бьдьнә ԝан, йед кӧ бь баԝәрийе у сәбьре созед Хԝәде ԝар дьбун.

Созе Хԝәдейә әʼсәйи

¹³ Гава Хԝәде соз да Бьраһим, Әԝи бь сәре Хԝә сонд хԝар, чьмки кәсәки жь Ԝи мәстьр тʼӧнәбу кӧ бь ԝи сонд бьхԝара.

¹⁴ Һьнге гот: «Рʼаст Әзе зӧрʼәта тә гәләки бәрәкʼәт кьм, Әзе тә пʼьрʼ зедә кьм».

¹⁵ У бь ви аԝайи Бьраһим бь думька дьреж гьһиштә созе Хԝәде.

¹⁶ Рʼаст ә мәрьв пе сәре йе жь хԝә мәстьр сонд дьхԝьн у сонд һʼәму шәрʼ-дәʼԝе нава ԝанда сафи дькә.

¹⁷ Бь ве йәке Хԝәде хԝәст ԝанарʼа, йед кӧ ԝе соз же бьстандана һе бьда кʼьфше, кӧ әԝ ԛьрара Хԝә нагӧһезә, иди созе Хԝә бь сондхԝарьне шьданд.

¹⁸ Аԝа иди дӧ тьшт һәнә, соз у сонде Хԝәдейә кӧ найенә гӧһастьне, кʼижанада набә кӧ әԝ дәрәԝ дәре. Ван һәр дӧ тьштада дьлдайинәкә мәйә әʼсәйи һәйә, кӧ әм ле сьтʼар бунә, ләма жи әм дькарьн хԝә бавежьнә ԝе гӧмана пешийа хԝә.

¹⁹ Әва гӧмана бона жийина мә дьбә ләнгәрәкә һʼимгьрти у амьн, кӧ пʼәрʼда пирозгәһа әʼзменрʼа дәрбази һьндӧрʼе Щийе Һәри Пироз дьбә,

²⁰ ԝе дәра кӧ Иса чаԝа пешикʼеш бона мә кʼәтийе. Әԝ буйә сәрәккʼаһине һʼәта-һʼәтайе мина Мәлкʼи-Садьԛ.