Îbranî 3 - Пәймана Ну (Инщил)

Иса жь Муса мәстьр ә

¹ Аԝа хушк-бьрайед пироз, һун кӧ һәвал-пʼаред ԝе газийа әʼзмен ьн, ль Иса бьньһерʼьн, Ԝи шандийи у Сәрәккʼаһине кӧ әм иԛрар дькьн.

² Әԝ һьндава Хԝәдеда амьн бу, Йе кӧ Әԝ бона ве йәке кʼьфш кьр, чаԝа Муса жи тʼәмамийа мала Ԝида амьн бу.

³ Бәле Иса һаԛаси жь Муса зедәтьр һежайи рʼумәте бу, чьԛаси ԛәдьре йе кӧ мале чедькә, жь ԛәдьре мале зедәтьр ә.

⁴ (Фәʼмдари йә, һәр маләк бь дәсте йәки те чекьрьне, ле йе һәр тьшт әʼфьрандийә, Хԝәде йә.)

⁵ Рʼаст ә Муса тʼәмамийа мала Ԝида хӧламәки амьн бу, бона шәʼдәтийа ԝан тьштед кӧ Хԝәде ԝе бьгота.

⁶ Ле Мәсиһ чаԝа кӧрʼ һьндава мала Хԝәдеда амьн бу. У әԝ мала Ԝи әм ьн, һәгәр әм ԝе әʼгитийе у гӧмана кӧ әм пе дьфьрʼьн ԛәԝин бьгьрьн.

Бона щьмәʼта Хԝәде рʼьһʼәтик һәйә

⁷ Бона ве йәке чаԝа Рʼӧһʼе Пироз дьбежә: «Иро һәгәр һун дәнге Ԝи бьбьһен,

⁸ мина кал-бавед хԝә сәрһʼьшк нибьн, чаԝа кӧ ԝана сәри һьлда, гава бәрʼийеда һатьнә щерʼьбандьне,

⁹ ԝе дәра кӧ кал-бавед ԝә бь ԛәлпе хьраб Әз щерʼьбандьм у тʼәмамийа чьл сали жи кьред Мьн дитьн.

¹⁰ Ләма жи һʼиле Мьн жь ԝи ньсьли чу у Мьн гот: ‹Дьлада тʼьме әԝ хальфи нә у рʼийа Мьн нас нәкьрьнә›.

¹¹ Аԝа Мьн жи жь һерса сонд хԝар гот: ‹Тʼӧ щар әԝе нәкʼәвьнә рʼьһʼәтийа Мьн!›»

¹² Һаш жь хԝә һәбьн хушк-бьрано, нәбә кӧ нава ԝә йәкида дьләки хьраб у нәбаԝәр һәбә, кӧ пьшта хԝә бьдә Хԝәдейе сах.

¹³ Ле һәр рʼож дьл бьдьнә һәв, һʼәта кӧ ньвисареда бона мә «иро» һәйә, ԝәки жь ԝә тʼӧ кәс бь гӧна нәхапә, нәбә сәрһʼьшк.

¹⁴ Чьмки әм тʼәви Мәсиһ бунә хԝәйипʼар, һәгәр тʼәне әм ԝе баԝәрийе жь сәрида һʼәта хьлазийе ԛәԝин бьгьрьн.

¹⁵ Аԝа чаԝа жор һатә готьне: «Иро һәгәр һун дәнге Ԝи бьбьһен, сәрһʼьшк нибьн, чаԝа ԝәхте сәрһьлданеда».

¹⁶ Әԝ кʼи бун, йед кӧ бьһистьн у сәри һьлдан? Әԝ һʼәму нибун, йед кӧ бь дәсте Муса жь Мьсьре дәркʼәтьбун?

¹⁷ Чьл сали һʼиле Хԝәде жь кʼе чу? Нә жь ԝан чу, йед кӧ гӧнә кьрьн, щьнйазед ԝан бәрʼийеда ман?

¹⁸ У Хԝәде бона кʼе сонд хԝар кӧ нәкʼәвьнә рʼьһʼәтийа Ԝи, һәгәр нә бона нәельма?

¹⁹ Иди әм дьбиньн кӧ әвана жь дәст нәбаԝәрийа хԝә нькарьбун бькʼәтанайе.