Îbranî 2 - Пәймана Ну (Инщил)

Мьԛати хԝә бьн, кӧ хьлазбуна мәзьн ԝар бьн

¹ Бона ве йәке гәрәке әм һе гәләки гӧһ бьдьнә ԝан тьштед мә бьһистьнә, ԝәки әм жь ԝан нәхальфьн.

² Чьмки һәгәр әԝ хәбәра пе мьлйакʼәта һатә готьне һʼимгьрти ма у һʼәму нәһәԛийе у беельмийе һәԛе хԝә рʼаст стандьн,

³ ле әме чаԝа хԝә хьлаз кьн һәгәр әм гӧһ нәдьнә ԝе хьлазбуна мәзьн? Бона ве хьлазбуне Хӧдан пешда даннасин кьр у йед кӧ дәнге Ԝи бьһистьн мәва әʼсәйи кьрьн.

⁴ Сәрда жи Хԝәде бь нишана, кʼәрәмәта, щурʼә-щурʼә кьред ԛәԝат у пʼешкʼешед Рʼӧһʼе Пирозә бәлакьри шәʼдәти да, чаԝа кӧ әʼмьре Ԝи бу.

Йе кӧ мә бәрбь хьлазбуне дьбә

⁵ Хԝәде нә кӧ мьлйакʼәт кьрьнә сәрԝеред ԝе дьнйа кӧ ԝе бе, сәр кʼижане әм хәбәр дьдьн.

⁶ Ле ньвисар щики шәʼдәтийе дьдә у дьбежә: «Йа Хԝәде, инсан чь йә кӧ ԝи бир тини, йан бәнде ве дьне кӧ бона ԝи хәм дьки?

⁷ Тә һьнәк ԝәхт әԝ жь мьлйакʼәта ньмьзтьр кьр, бь рʼумәт у һӧрмәте әԝ тʼащ кьр,

⁸ һʼәму тьшт кьрьнә бьне ньгед ԝи». Аԝа Йе кӧ һәр тьшт кьрьнә бьне ньгед ԝи, тьштәк нәһьшт кӧ нәкьрьбә бьне ньга. Ле ньһа әм һе һәр тьшти бьне ньгед инсенда набиньн.

⁹ Ле әм ньһа Иса бь рʼумәт у һӧрмәт кʼофи ль сери дьбиньн, Йе кӧ һьнәк ԝәхт бона щәфе мьрьне жь мьлйакʼәта һатьбу ньмьзкьрьне, ԝәки бь кʼәрәма Хԝәде бона һʼәмуйа мьрьн бьдита.

¹⁰ Бәле һежа бу кӧ Хԝәде, Йе кӧ һәр тьшт бона Хԝә әʼфьрандийә у бь дәсте Хԝә хԝәй дькә Рʼебәре хьлазбуна ԝан бь щәфа кʼамьл бькьра, ԝәки гәләк лаԝ тʼәви рʼумәта Иса бькьрана.

¹¹ Әԝе кӧ пироз дькә у әԝед кӧ пироз дьбьн, әв һʼәму жи жь Бавәки нә. Ләма Әԝ ве йәкеда шәрмийе набинә, кӧ ԝан хушк-бьрайед Хԝә һʼәсаб кә

¹² у дьбежә: «Дәрһәԛа наве Тәда Әзе хушк-бьрайед Хԝәрʼа бежьм, щьвинеда Әзе әшԛи Тә бьстрем».

¹³ У аһа жи дьбежә: «Әзе гӧмана Хԝә бьдьмә сәр Хԝәде». У аһа жи: «Ва мә Әз у әԝ зарʼед кӧ Хԝәде данә Мьн».

¹⁴ Чаԝа кӧ зарʼ хун у гошт ьн, Иса Хԝәха жи бу мина ԝан, кʼәтә бьнйатʼа мәрьвайе, ԝәки бь ви аԝайи пе мьрьна Хԝә, йе кӧ һʼӧкӧме ԝи сәр мьрьне һәйә ӧнда кә, аԝа готи мирещьн

¹⁵ у йед кӧ тʼәмамийа әʼмьре хԝәда һесиред тьрса мьрьне бунә хьлаз кә.

¹⁶ Бәле фәʼмдари йә, кӧ Әԝ аликʼарийа мьлйакʼәта накә, ле аликʼарийа зӧрʼәта Бьраһим дькә.

¹⁷ Ләма жи Иса гәрәке бь һәр алийава бьбуйа мина хушк-бьра, кӧ бьбуйа сәрәккʼаһинәки рʼәʼм у амьн ль хьзмәткʼарийа бәр Хԝәдеда, ԝәки гӧнед щьмәʼте бьда кʼәԝандьне.

¹⁸ Чаԝа Әԝи щәфа кʼьшанд, һатә щерʼьбандьне, ӧса жи дькарә аликʼарийа ԝан бькә, йед кӧ дькʼәвьнә нава щерʼьбандьне.