Îbranî 11 - Пәймана Ну (Инщил)

Баԝәри у йед хԝәйибаԝәри

¹ Баԝәри әʼсәйийа ԝан тьшта йә, кӧ әм теда гӧман ьн у избатийа ԝан тьшта йә, кӧ мәва нә хӧйа нә.

² Бь баԝәрийе пешийед мә ль Хԝәде хԝәш һатьн.

³ Бь баԝәрийе мәва әʼйан ә кӧ дьнйа бь хәбәра Хԝәде әʼфьрийә у әԝ тьштед кӧ тенә дитьне жь ԝан тьштед кӧ найенә дитьне чебунә.

⁴ Бь баԝәрийе Һабил һʼәдикә жь һʼәдийа Ԛайин четьр да Хԝәде. Бь ԝе баԝәрийе әԝ һатә бәгәмкьрьне чаԝа йәки рʼаст, чьмки һʼәдийед ԝи ль Хԝәде хԝәш һатьн. Рʼаст ә Һабил мьр, ле бь баԝәрийа хԝә һе хәбәр дьдә.

⁵ Бь баԝәрийе Һәнох жь дьне һатә һьлатьне, кӧ мьрьне нәбинә. Әԝ тʼӧ щийи кʼьфш нәбу, чьмки Хԝәде әԝ һьлдабу. Ньвисареда һатийә готьне, кӧ бәри һьлатьна ԝи, әԝ ль Хԝәде хԝәш һатьбу.

⁶ У бе баԝәри тʼӧ щар набә кӧ инсан ль Хԝәде хԝәш бе, чьмки әԝе кӧ незики Хԝәде дьбә, гәрәке баԝәр бькә, кӧ Хԝәде һәйә у ԝе ԝан хәлат кә, кʼижан кӧ ль Ԝи дьгәрʼьн.

⁷ Бь баԝәрийе Нӧһ бона тьштед кӧ һе нәдьһатьнә кʼьфше фәрман жь Хԝәде станд у бь хофа Хԝәде рʼабу бона хьлазбуна мала хԝә гәми чекьр. Нӧһ бь ԝе баԝәрийе диԝана дьне кьр у бу хԝәйиԝаре ԝе рʼастһʼәсаббуне, йа кӧ жь баԝәрийе те.

⁸ Бь баԝәрийе, гава Бьраһим һатә газикьрьне, гӧһдари кьр, кӧ һәрʼә ԝи щийе кӧ ԝе чаԝа ԝар бьстанда. У рʼабу чу, ле ньзаньбу жи кʼӧда дьчә.

⁹ Бь баԝәрийе чаԝа фьрари ԝи ԝәлате хәрибда ма, йе кӧ Хԝәде жерʼа соз дабу. У чадьрада тʼәви Исһаԛ у Аԛуб ма, кӧ әԝ жи хԝәйийед ԝи ԝаре создайи бун.

¹⁰ Чьмки әԝ һивийа ԝи бажаре хԝәйирʼькʼьне мьԛәрʼм бу, әʼфьрандар у авакьре кʼижани Хԝәде йә.

¹¹ Бь баԝәрийе Бьраһим, кӧ заньбу Сәрайе зарʼ нәдани, әԝе ԛәԝата бәре зька станд у ԝе мәзьнайийа ԝида зарʼәк ԝирʼа бу. Чьмки баԝәр кьр, кӧ Йе ԝирʼа соз дайә амьн ә.

¹² У жь ԝи йәки, йе кӧ иди бәр мьрьне бу, ԝәкә стәйркед әʼзмен у ԛума дәве бәʼре беһʼәсаб мәри дьне кʼәтьн.

¹³ Әв һʼәму жи кӧ баԝәрийеда мьрьн, ле созед Хԝәде нәстандьн. Әԝана тʼәне әԝ соз дурва дитьн, ша бун у хԝә мӧкӧрʼ һатьн, кӧ әԝ мәринә хәриб у фьрари нә ль сәр дьне.

¹⁴ Әԝед кӧ тьштед аһа дьбежьн, дьдьнә кʼьфше кӧ әԝ ль ԝәлатәки бона хԝә дьгәрʼьн.

¹⁵ У һәгәр бона ԝи ԝәлати бир банина жь кʼидәре кӧ әԝ дәркʼәтьбун, мәщала ԝан ԝе һәбуйа вәгәрʼийана ԝьр.

¹⁶ Ле жь бәр ԝева дәмана ԝәлатәки һе ԛәнщда бун, аԝа готи йе әʼзмани. Ләма Хԝәде ве йәкеда шәрмийе набинә, кӧ әԝ жерʼа бежьн: «Хԝәдейе мә», чьмки Әԝи бона ԝан бажарәк һазьр кьрийә.

¹⁷ Бь баԝәрийе Бьраһим кӧ жь Хԝәде һатә щерʼьбандьне, Исһаԛ кьрә ԛӧрбан. Әԝи соз стандьбун, ле диса кӧрʼе хԝәйи тайе тʼәне дькьрә ԛӧрбан,

¹⁸ бона кʼижани Хԝәде готьбуйе: «Зӧрʼәта тәйе Исһаԛда бе навкьрьне».

¹⁹ Чьмки Бьраһим дьле хԝәда дьгот, кӧ Хԝәде дькарә Исһаԛ жь мьрьне жи рʼакә у әԝи бь сурәти чаԝа жь мьрьне рʼабуйи кӧрʼе хԝә пашда станд.

²⁰ Бь баԝәрийе Исһаԛ бона ԝан тьштед кӧ ԝе бьԛәԝьмийана, дӧа ль Аԛуб у Әсаԝ кьр.

²¹ Бь баԝәрийе Аԛуб бәр мьрьне дӧа ль һәр кӧрʼәки Усьв кьр у хԝә авитә сәр шьва дәсте хԝә, сәре хԝә бәр Хԝәде дани.

²² Бь баԝәрийе Усьв бәр мьрьне бона дәркʼәтьна жь Мьсьре кьрә бира зарʼед Исраел у бона һәстуйед хԝә тʼәми да ԝан.

²³ Бь баԝәрийе гава Муса жь дийа хԝә бу, бь дәстед де у баве хԝә се мәһа һатә вәшартьне. Ԝан дит кӧ кӧрʼьк бәдәԝ ә, жь фәрмана пʼадше нәтьрсийан.

²⁴ Бь баԝәрийе Муса гава мәзьн бу, нәхԝәст кӧ «кӧрʼе ԛиза Фьрәԝьн» бе һʼәсабе.

²⁵ Әԝ фькьри, кӧ һе ԛәнщ ә тʼәви щьмәʼта Хԝәде бьчәрчьрә, нә кӧ ԝәхтәки кьн нава кʼефа гӧнада дәрбаз кә.

²⁶ Әԝи ԛара Мәсиһ һе һәбунәкә мәзьн һʼәсаб кьр, нә кӧ хьзнед Мьсьре, чьмки чʼәʼвньһерʼи бу, кӧ һәԛе хԝә бьстанда.

²⁷ Бь баԝәрийе Муса Мьсьр һьшт у жь һерса пʼадше нәтьрсийа, чьмки Муса әԝе кӧ нәдьһатә кʼьфше дьдит у сәр йа хԝә ма.

²⁸ Бь баԝәрийе Муса щара пешьн Щәжьна Дәрбазбуне тʼәстиԛ кьр у хун шемика да рʼәшандьне, ԝәки Мьлйакʼәте Мьрьне ль ньхӧрийед ԝан нәкʼәта.

²⁹ Бь баԝәрийе щьмәʼта Исраеле бәʼра Соррʼа чаԝа бәжерʼа дәрбаз бу. Гава мьсьрийа жи кьр кӧ дәрбаз бьн, хәньԛин.

³⁰ Бь баԝәрийе суред бажаре Әриһайе кʼәтьн, гава һʼәфт рʼожа дора ԝан зьвьрʼин.

³¹ Бь баԝәрийе Рʼәхаба чʼәʼвдәр кӧ щәʼсус бь әʼдьлайи ԛәбулкьрьн, тʼәви нәбаԝәра ӧнда нәбу.

³² Әз иди чь бежьм? Ԝәхт тʼере накә, кӧ бона Гидәйон, Бараԛ, Шьмшон, Йефта, Даԝьд, Самуел у пʼехәмбәра гьли кьм,

³³ йед кӧ бь баԝәрийе пʼадшати бьндәст кьрьн, һәԛи кьрьн, соз стандьн, дәве шера данә гьртьне,

³⁴ кʼура агьр тәмьрандьн, жь дәве шур хьлаз бун, жь бетʼаԛәтийе ԛәԝат гьртьн, нава шәрʼда бунә мерхас, бәри ордийед хәриб дан.

³⁵ Кʼӧлфәта мьрийед хԝә сахбуйи стандьн. Һьнәка жи азайи нәхԝәстьн у нава щәфада мьрьн, ԝәки жь мьрьне рʼабьн бьгьһижьнә жийинәкә һе ԛәнщ.

³⁶ Һьнәкед майин жи бәр ԛамчийа, нава ԛара, ӧса жи бь ԛәйд-зьнщира у кәлада һатьнә зерандьне.

³⁷ Әԝ данә бәр кәвьра, бь бьрʼәка һатьнә бьрʼине, бь шура һатьнә кӧштьне, пʼостед пез у бьзьнада гәрʼийан, хәлайи-щәлайи, тәнгаси у щәфа кʼьшандьн.

³⁸ Дьнйа нә лайиԛи ԝан бу! Әԝ ль бәрʼи у чʼийа дьгәрʼийан, шкәфт у нәʼлада дьман.

³⁹ Әв һʼәму баԝәрийа хԝәда бәрбьчʼәʼв бун, ле созе Хԝәде нәстандьн,

⁴⁰ чьмки Хԝәде бона мә һе тьштәки ԛәнщ һазьр кьрийә, ԝәки әԝана бейи мә нәгьһижьнә кʼамьлтийе.