Îbranî 10 - Пәймана Ну (Инщил)

Ԛӧрбанбуна Мәсиһ сәр ԛӧрбанед Ԛануна Мусарʼа йә

¹ Ԛанун сийа ԝан тьштед ԛәнщ ә, кʼижанә кӧ тен, ле нә хут мина ԝан йәка йә. Бона ве йәке Ԛанун пе ԝан ԛӧрбанед кӧ һәр сал пәйһәв-пәйһәв тенә дайине нькарә ԝан кʼамьл бькә, йед кӧ бь ԛӧрбандайине незики Хԝәде дьбьн.

² Һәгәр паԛьж буна, ԝана ԝе дәст жь ԛӧрбандайине бькʼьшанда, чьмки бь щарәке йед хԝәйиԛӧрбан ԝе бьһатана паԛьжкьрьне, жь ԝьр шунда бона гӧна исафа ԝан ԝе ль ԝан һьлнәһата.

³ Ле әԝ ԛӧрбан һәр сал гӧнед ԝан тиньнә бира ԝан.

⁴ Чьмки хуна щанәга у нерийа тʼӧ щар нькарә гӧна рʼәсит кә.

⁵ Ләма жи, гава Мәсиһ ԝе бьһата ве дьне, гот: «Тә ԛӧрбан у һʼәди нәхԝәстьн, ле Тә бона Мьн ԛальбәк һазьр кьр.

⁶ Дийарийед тʼәвайишәԝате у ԛӧрбанед жь бәр гӧнава Тә хԝәш нәһатьн.

⁷ Һьнге Мьн гот: ‹Ва мә йа Хԝәде, Әз һатьм әʼмьре Тә биньмә сери, чаԝа бона Мьн кʼьтебеда ньвисар ә›».

⁸ Пешийе дьбежә: «Ԛӧрбан у һʼәди, дийарийед тʼәвайишәԝате у ԛӧрбанед жь бәр гӧнава Тә нәхԝәстьн у әԝ ль Тә хԝәш нәһатьн» (ле әԝ анәгори Ԛануне тенә дайине).

⁹ Паше дьбежә: «Ва мә йа Хԝәде, Әз һатьм кӧ әʼмьре Тә биньмә сери». Йа пешьн, Мәсиһ ԝеда давежә, кӧ йа дӧда тʼәстиԛ кә.

¹⁰ Бь ви аԝайи Иса Мәсиһ әʼмьре Хԝәде ани сери, щарәке бона һәр тʼьм бәдәна Хԝә кьрә ԛӧрбан, бь ве йәке әм паԛьж кьрьн.

¹¹ Һәр кʼаһинәк, һәр рʼож нава хьзмәткʼарийа хԝәда йә у гәләк щара хут ԝан ԛӧрбана дьдә, кʼижанед кӧ тʼӧ щар нькарьн гӧна рʼәсит кьн.

¹² Ле Әви кʼаһини тʼәне щарәке бона гӧна ԛӧрбан да у пәйрʼа һʼәта-һʼәтайе кʼеләка Хԝәдейә рʼасте рʼуньшт

¹³ у жь ԝьр шунда һивийе йә, һʼәта кӧ дьжмьнед Ԝи бьн пʼийед Ԝида бенә данине.

¹⁴ Бь ԛӧрбанәке Әԝи йед кӧ паԛьж дьбьн һʼәта-һʼәтайе кʼамьл кьрьн.

¹⁵ Рʼӧһʼе Пироз жи шәʼдәтийе дьдә мә. Пешийе дьбежә:

¹⁶ «Әв ә әԝ пәйман, йа кӧ Әзе тʼәви ԝан гьредьм, пәй ԝан рʼожарʼа, Хӧдан дьбежә. Әзе ԛанунед Хԝә бькьмә дьле ԝан у һʼьшед ԝанда ԝан бьньвисьм».

¹⁷ Паше дьбежә: «Әзе гӧнә у нәһәԛийед ԝан иди бир нәйньм».

¹⁸ У әԝ дәра кӧ бахшандьн һәйә, иди бона гӧна һʼәди кер найе.

Дә бьра әм незики Хԝәде бьн

¹⁹ Аԝа хушк-бьрано, бь сайа хуна Иса әм дькарьн меркʼими бькʼәвьнә Щийе Һәри Пироз,

²⁰ ԝе рʼийа нуйә сахрʼа, йа кӧ Әԝи бона мә нава ԝе пʼәрʼдерʼа вәкьр, аԝа готи бь бәдәна Хԝә.

²¹ Аԝа кӧ Кʼаһинәки мәйи мәзьн һәйә сәр мала Хԝәде,

²² әм дькарьн бь дьле рʼаст незики Хԝәде бьн, баԝәрийева тʼьжи, исафа хԝәда бь хунрʼәшандьне жь хьрабийе паԛьжбуйи у ԛальбе хԝә жи пе ава зәлал шушти.

²³ Дә әм ԝе гӧмана кӧ әм иԛрар дькьн ԛәԝин бьгьрьн у жь щи нәһʼәжьн, чьмки амьн ә, Әԝе кӧ соз дайә.

²⁴ У бьра әм бона һәвдӧ хәм бькьн, ԝәки һʼьзкьрьне у ԛәнщикьрьнеда һелана бьдьнә һәв.

²⁵ Бьра әм дәст жь льһәвщьвине нәкʼьшиньн, чаԝа кӧ һьнәка хԝәрʼа кьрийә хәйсәт, ле әм дьл бьдьнә һәв у һе зедә, чьмки һун дьбиньн кӧ Рʼожа Ахрәте незик дьбә.

²⁶ Чьмки һәгәр мә рʼасти нас кьрийә ԛәбул кьрийә у пәйрʼа бь һʼәмде хԝә нава гӧнада бьминьн, иди жь вьр шунда бона бахшандьна гӧна ԛӧрбан бәрга тʼӧ тьшти нагьрә,

²⁷ ле тʼәне бь ләрьзәке дьминә һивийа диԝане у кʼура агьр, кӧ ԝе йед мьԛабьли Хԝәде һʼуфи хԝә кә.

²⁸ Йәки һәгәр Ԛануна Муса бьтʼәрʼьбанда, гава дӧ йан се шәʼдә һәбуна, бе рʼәʼм дьһатә кӧштьне.

²⁹ Ле тʼәхмина ԝә, әԝе һе чьԛаси һежайи щәзайе гьран бә, йе кӧ Кӧрʼе Хԝәде дайә бьн пʼийед хԝә у Хуна пәймане һʼәрам һʼәсаб кьрийә, бь Кʼижане әԝ паԛьж бу у Рʼӧһʼе кʼәрәмдайине беһӧрмәт кьрийә?

³⁰ Бәле әм Ԝи нас дькьн, Йе кӧ гот: «Һʼәйфһьлдан йа Мьн ә, Әзе һьлиньм». У диса: «Хӧдан ԝе диԝана щьмәʼта Хԝә бькә».

³¹ Тьштәки тьрс у хоф ә, кӧ бькʼәвьнә дәсте Хԝәдейе сах!

³² Ԝан рʼожед пешьн бир биньн, гава һун һатьнә рʼонайикьрьне, ԝә шәрʼәки чаԝайи гьран бь щәфава дькʼьшанд.

³³ Щарна бь ԛара у зерандьна һун ашкәрә дьһатьнә рʼәзилкьрьне, щарна жи тʼәви һʼале ԝан дьбун, йед кӧ әԝ тьшт дькʼьшандьн.

³⁴ Һун дькʼәтьнә һʼале гьртийа жи у гава һәбука ԝә жи тʼалан кьрьн, һун бь ԝе йәке әшԛ у ша бун, чьмки ԝә хԝәха заньбу кӧ һәбука ԝәйә һе ԛәнщ у һәр тʼьм һәйә.

³⁵ Аԝа ԝе гӧмана хԝә ӧнда нәкьн, йа кӧ һежайи һәԛе мәзьн ә.

³⁶ Ԝәрʼа сәбьр лазьм ә кӧ һун әʼмьре Хԝәде биньнә сери у бьгьһижьнә созе Ԝи.

³⁷ Чаԝа ньвисар ә: «Пәй ԝәхтәки кьнрʼа, Әԝе кӧ ԝе бе, ԝе бе у дәрәнги нәбә.

³⁸ Ле йе бәр Мьн рʼаст, ԝе бь баԝәрийе бьжи у һәгәр әԝ пашда вәкʼьшә, Әз ԝи бәгәм накьм».

³⁹ Ле әм нә жь ԝан ьн, кӧ пашда вәкʼьшьн у ӧнда бьн, ле әм әԝ ьн, кӧ баԝәр дькьн, ԝәки рʼӧһʼед мә хьлаз бьн.