Îbranî 1 - Пәймана Ну (Инщил)

Хԝәде бь Кӧрʼе Хԝә хәбәр дьдә у Кӧрʼ жь мьлйакʼәта мәстьр ә

¹ Гәләк щара у бь гәләк щурʼа Хԝәде пешда пе пʼехәмбәра кал-бавед мәрʼа хәбәр дайә,

² ле ван рʼожед ахьрийеда пе Кӧрʼе Хԝә мәрʼа хәбәр да, Кʼижан кӧ кʼьфш кьр, ԝәки ахьрийе бьбә хԝәйиԝаре һәр тьшти у бь Ԝи жи әʼрд у әʼзман әʼфьранд.

³ Әԝ нура рʼумәта Хԝәде йә, хут мина һәйинтийа Ԝи йә, Әԝ бь ԛәԝата хәбәра Хԝә һәр тьшти хԝәй дькә. Гава Әԝи мәщала шуштьна гӧнед мәрьва һазьр кьр, ль жор һәрәма мәзьнайийа Хԝәдейә рʼасте рʼуньшт.

⁴ Кӧрʼ һаԛаси жь мьлйакʼәта жортьр кʼәт, чьԛаси әԝ наве кӧ Ԝи станд жь навед ԝан мәстьр ә.

⁵ Чьмки Хԝәде тʼӧ мьлйакʼәтирʼа аһа нәготийә: «Тӧ Кӧрʼе Мьн и, Тӧ иро Мьнрʼа буйи» у диса: «Әзе баве Ԝи бьм, Әԝе жи Кӧрʼе мьн бә».

⁶ У гава Хԝәде ньхӧрийе Хԝә дьшинә дьнйайе, аһа жи дьбежә: «Бьра һʼәму мьлйакʼәтед Хԝәде сәре хԝә бәр Ԝи дайньн».

⁷ Ле бона мьлйакʼәта аһа дьбежә: «Әԝ мьлйакʼәтед Хԝә дькә ба у бәрдәстийед Хԝә алава егьр».

⁸ Ле бәле бона Кӧрʼ Хԝәде дьбежә: «Тʼәхте Тә Хԝәдейо, тʼәхте һʼәта-һʼәтайе йә, шьва пʼадшатийа Тә шьва һәԛийе йә.

⁹ Тӧ һәԛийе һʼьз дьки у дьжәни нәһәԛийе, ләма жи Хԝәдейо, Хԝәдейе Тә Тӧ бь рʼуне шабуне рʼункьри, жь һәвалед Тә зедәтьр».

¹⁰ У аһа жи дьбежә: «Йа Хӧдан, Тә пешийе һʼиме дьнйайе дани у әʼзман кьред дәстед Тә нә.

¹¹ Әԝе ԝеран бьн һәрʼьн, ле Те бьмини, һʼәмуйе мина щьла бьпʼьзьньн.

¹² Те ԝан һәв бьпʼечʼи мина ԛапʼут, мина кʼьнща ԝе бенә гӧһастьне. Ле Тӧ диса Әԝ и у салед Тә ԝе кем нәбьн».

¹³ Кʼижан мьлйакʼәтирʼа Хԝәде готийә: «Кʼеләка Мьнә рʼасте рʼуне, һʼәта Әз нәйаред Тә бькьмә бьне пʼийед Тә»?

¹⁴ Иди мьлйакʼәт чь нә? Әԝ һʼәму жи рʼӧһʼед бәрдәсти нә, кӧ бона хьзмәткʼарийа ԝан тенә шандьне, йед кӧ хьлазбуне ԝе ԝар бьн.