Galatî 6 - Пәймана Ну (Инщил)

Баред һәвдӧ һьлдьн

¹ Хушк-бьрано, һәгәр йәк нәһәԛикеда бе гьртьне, һун кӧ рʼӧһʼани нә, ԝи биньнә сәр рʼийа рʼастийе, ле бь рʼӧһʼе мьлуктийе. Ле һаш жь хԝә жи һәбьн, кӧ һун нәкʼәвьнә щерʼьбандьне.

² Баред һәвдӧ һьлдьн у бь ви аԝайи һуне ԛануна Мәсиһ бьԛәдиньн.

³ Һәгәр йәк хԝә дәԝса тьштәки датинә у хԝәха нә тʼӧ тьшт ә, әԝ хԝәха хԝә дьхапинә.

⁴ Бьра һәр кәс кьрьнед хԝә бьдә сәр мезине у паши һьнге жь хԝә рʼази бә, нә кӧ хԝә һьмбәри һәвале хԝә кә.

⁵ Чьмки һәр кәсе хӧрща хԝә һьлгьрә.

⁶ Әԝе һини хәбәра Хԝәде дьбә, гәрәке һәр тьштед ԛәнщ тʼәви дәрсдаре хԝә пʼар кә.

⁷ Нәхапьн, Хԝәде набә пекʼәни. Чьмки мәрьв чь дьчинә, ԝе жи дьчьнә.

⁸ Кʼи кӧ бона бьнйатʼа хԝә дьчинә, әԝе жь ԝе бьнйатʼе мьрьне бьчьнә, ле кʼи кӧ бона Рʼӧһʼ бьчинә, ԝе жь Рʼӧһʼ жийина һʼәта-һʼәтайе бьчьнә.

⁹ Жь ԛәнщикьрьне жи ащьз нәбьн, чьмки әме ԝәхтда бьчьньн һәгәр әм нәдьнә дәр.

¹⁰ Аԝа һʼәта кӧ ԝәхт дәстед мәда йә, һʼәмуйарʼа ԛәнщийе бькьн, илаһи нәфәред мала Хԝәдерʼа.

Тʼәми у сьлавед ахьрийе

¹¹ Дина хԝә бьдьне, әз бь чь һʼәрфед гьр ньһа ԝәрʼа дьньвисьм.

¹² Әԝед кӧ дьхԝазьн жь дәрвава хԝә бьдьнә кʼьфше, әԝ пʼейи сәр ԝә дькьн, кӧ һун бенә сьнәткьрьне. Ле әвана ве йәке дькьн, кӧ тʼәне бона хаче Мәсиһ әԝ нәйенә зерандьне.

¹³ Әԝед хԝәйисьнәт хԝәха Ԛануне хԝәй накьн, ле дьхԝазьн кӧ һун бенә сьнәткьрьне, ԝәки әԝ бь нишана ԛальбе ԝәйи мәрьвайи бьфьрʼьн.

¹⁴ Ле жь мьн накʼәвә кӧ әз бь тьштәки дьн бьфьрʼьм, пештьри бь хаче Хӧдане мә Иса Мәсиһ, бь кʼижани дьнйа бона мьн хачбуйи йә, әз жи бона дьнйайе.

¹⁵ Бәле нә сьнәткьрьн тьштәк ә, нә жи нәсьнәткьрьн, ле сәри әԝ ә, кӧ бьбьн әʼфьринәки ну.

¹⁶ Дә бьра әʼдьлайи у рʼәʼм сәр ԝан һʼәмуйа бә, кʼижанед кӧ анәгори ве йәке дьжин у ӧса жи сәр Исраела Хԝәде бә.

¹⁷ Жь вьр шунда бьра тʼӧ кәс зәʼмәте нәдә мьн, чьмки мьн даха бьринед Иса һьлдайә сәр бәдәна хԝә.

¹⁸ Дә бьра кʼәрәма Хӧдане мә Иса Мәсиһ тʼәви рʼӧһʼе ԝә бә хушк-бьрано. Амин.