Galatî 5 - Пәймана Ну (Инщил)

Азайийа хԝә хԝәй кьн

¹ Бона азайийе Мәсиһ әм аза кьрьнә! Ԝе азайийе ԛәԝин бьгьрьн у диса нәкʼәвьнә бьн ԝи нире хӧламтийе.

² Бьбьһен, әз Паԝлос ԝәрʼа дьбежьм: Һәгәр һун бьһельн кӧ һун бенә сьнәткьрьне, Мәсиһ тʼӧ кʼаре надә ԝә.

³ Әз һәр мәрьвәкирʼа диса меркʼими дьбежьм, йе кӧ изьне дьдә хԝә кӧ әԝ бе сьнәткьрьне, әԝ дәйндар ә кӧ тʼәмамийа Ԛануне бьԛәдинә.

⁴ У һәгәр һун бь Ԛанун ԛәдандьне дьхԝазьн рʼаст һʼәсаб бьн, ԝәки ӧса йә һун жь Мәсиһ ԛәтийайи нә у жь кʼәрәме кʼәти нә.

⁵ Ле чь жь мә дькʼәвә, әм бь сайа Рʼӧһʼе Пироз у пе баԝәрийе һʼәйра ԝе рʼастһʼәсаббунеда нә, йа кӧ әм теда гӧман ьн.

⁶ Чьмки йәктийа Мәсиһ Исада, нә сьнәткьрьн тьштәк ә, нә жи нәсьнәткьрьн, ле сәри баԝәри йә кӧ бь һʼьзкьрьне йа хԝә дькә.

⁷ Һун рʼьнд пешда дьчун! Кʼе һун данә сәкьнандьне, кӧ ельми рʼастийе нәбьн?

⁸ Әва һелана нә жь Ԝи йә, Йе кӧ гази ԝә кьрийә.

⁹ «Һьнәк һәвиртьрʼшк тʼәмамийа һәвир һьлтинә».

¹⁰ Ле әз бь йәктийа мәйә Хӧданда ԝәда гӧман ьм, кӧ һуне тьштәки майин нәфькьрьн, ле әԝе фькьред ԝә тʼәви һәв дькә ԝе сәр бәла хԝә вәбә, кʼи жи һәбә.

¹¹ Ле әз хушк-бьрано, һәгәр һәла һе сьнәткьрьне даннасин дькьм, иди чьма темә зерандьне? Ԝәки ӧса йә гәрәке тʼӧ кәсе жь хаче Мәсиһ пʼьшк нәбуйа.

¹² Хԝәзи йед кӧ фькьред ԝә тʼәви һәв дькьн, хԝәха хԝә кʼокеда жи бьбьрʼийана!

¹³ Һун азайийерʼа һатьнә газикьрьне хушк-бьрано, ле тʼәне әԝ азайийа ԝә бьра нәбә мәщала хԝәстьна бьнйатʼа инсен. Дәԝса ԝе бь һʼьзкьрьне һәвдӧрʼа хӧламтийе бькьн.

¹⁴ Чьмки тʼәмамийа Ԛануне бь ве готьне те сери: «Һәвале хԝә ԝәкә хԝә һʼьз бькә».

¹⁵ Ле һәгәр һун дәв бавежьнә һәвдӧ, һәвдӧ бьхԝьн, мьԛати хԝә бьн, кӧ кʼока һәвдӧ нәйньн.

Бәред Рʼӧһʼе Пироз у бьнйатʼа мәрьвайе

¹⁶ Аԝа әз дьбежьм, бь сайа Рʼӧһʼе Пироз бьмәшьн у һуне хԝәстьнед бьнйатʼа инсен нәкьн.

¹⁷ Чьмки хԝәстьна бьнйатʼа инсен мьԛабьли Рʼӧһʼ ә, Рʼӧһʼ мьԛабьли бьнйатʼа инсен ә. Әв һәр дӧ ль һәв накьн, ләма һун нькарьн хԝәстьнед хԝә бькьн.

¹⁸ Ле һәгәр һун бь Рʼӧһʼ тенә рʼебәрикьрьне, һун накʼәвьнә бьн дәсте Ԛануне.

¹⁹ Аԝа кьред бьнйатʼа инсен әʼйан ьн: Бенамуси, һʼәрами, толти,

²⁰ пʼутпʼарьсти, пирәсерти, нәйарти, шәрʼ-дәʼԝ, һʼәвсуди, һерскʼәтьн, һәврʼькʼи, дӧтирәти, щӧдәти,

²¹ чʼәʼве хьраб, меркӧжи, сәрхԝәш, кучʼьксанти у чь кӧ мина ван ьн. Әз ньһа ԝәрʼа дьбежьм, чаԝа кӧ мьн пешда жи ԝәрʼа готьбу, кӧ йед ван тьшта дькьн, Пʼадшатийа Хԝәде ԝар набьн.

²² Ле бәред Рʼӧһʼ әв ьн: Һʼьзкьрьн, шабун, әʼдьлайи, сәбьркьрьн, ширьнайи, ԛәнщи, амьни,

²³ мьлукти, хԝәгьртьн. Һьндава ван тьштада ԛанун тʼӧнә.

²⁴ У әԝед кӧ пʼара Мәсиһ Иса нә, бьнйатʼа хԝә бь тʼәви тәмед хьраб у һавьжийава сәр хач кӧштьнә.

²⁵ Әм кӧ бь сайа Рʼӧһʼ дьжин, бь рʼебәрийа Рʼӧһʼ бьмәшьн.

²⁶ Әм кʼӧбар нәбьн, агьре һәв гӧрʼ нәкьн у һʼәвсудийе ль һәвдӧ нәкьн.