Galatî 1 - Пәймана Ну (Инщил)

Сьлавкьрьн

¹ Әз Паԝлосе шанди, нә кӧ жь алийе мәрьвада йан бь дәсте мәрьва кʼьфшбуйи мә, ле бь дәсте Иса Мәсиһ у Бав Хԝәде, Йе кӧ Әԝ жь мьрьне рʼакьр,

² әз бь һʼәму баԝәрмәндава тʼәвайи бәрбьрʼи ԝә щьвинед Галатйайеда дьбьм.

³ Дә бьра кʼәрәм у әʼдьлайийа Хԝәде Баве мә у Хӧдан Иса Мәсиһ ль ԝә бә,

⁴ Йе кӧ щанийа Хԝә анәгори әʼмьре Баве мә Хԝәде жь бәр гӧнед мәва да, ԝәки мә жь ви зәмане ньһайи хьраб хьлаз кә.

⁵ Шькьр жь Хԝәдерʼа һʼәта-һʼәтайе! Амин.

Рʼасти тʼәне Мьзгиникеда йә

⁶ Әз әʼщебмайи дьминьм, кӧ һун ӧса зу пьшта хԝә дьдьнә Хԝәдейе кӧ бь сайа кʼәрәма Мәсиһ гази ԝә кьр у бәре хԝә дьдьнә мьзгиникә дьн.

⁷ Рʼаст мьзгиникә дьн тʼӧнә, ле һьнәк һәнә ԝә тʼәви һәв дькьн у дьхԝазьн Мьзгинийа Мәсиһ бьгӧһезьн.

⁸ Ле һәгәр әм йан мьлйакʼәтәк жи жь әʼзмен бе, мьзгиникә ӧса бьдә ԝә, кʼижан кӧ нә мина ԝе Мьзгинийе йә, йа кӧ мә дайә ԝә, бьра ньфьрʼ ль ԝи бә!

⁹ Чаԝа мә пешда гот, ньһа жи диса дьбежьм: Һәгәр йәк мьзгиникә нә мина ԝе Мьзгинийа кӧ ԝә ԛәбул кьр дьдә ԝә, бьра ньфьрʼ ль ԝи бә!

¹⁰ Чьма әз ньһа дькьм мәрьв жь мьн рʼази бьн, йан Хԝәде? Йан гәло әз дькьм кӧ ль мәрьва хԝәш бем? Һәгәр мьн һе бьхԝәста әз ль мәрьва хԝәш бьһатама, мьн нькарьбу әз бьбума хӧламе Мәсиһ.

Чаԝа Хԝәде Паԝлос кьрә шанди

¹¹ Әз ве йәке ль ԝә дьдьмә һʼәсандьне хушк-бьрано, кӧ әԝ Мьзгинийа мьн даннасин кьр, нә йа мәрьвайи йә.

¹² Мьн әԝ жь мәрьва нәстанд, нә жи жь кәсәки һин бум, ле Иса Мәсиһ мьнва әʼйан кьр.

¹³ Ԝә бона бепʼәргалийа мьнә бәрейә нава щьһутийеда бьһистийә. Мьн беһʼәсаб щьвина Хԝәде дьзеранд у дькьр кӧ ԝе хьраб кьм.

¹⁴ Әз нава щьһутийеда жь гәләк һәвалед хԝәйә щьһу пешдатьр чубум, алийе рʼаԝ-рʼьзьма кал-бавада жи гәләки хԝәйихирәт бум.

¹⁵ Ле гава Хԝәде хԝәст, (Йе кӧ әз бьжартьм, чахе әз һе зьке дийа хԝәда бум у бь кʼәрәма Хԝә әз кʼьфш кьрьм),

¹⁶ Кӧрʼе Хԝә мьнва әʼйан кьр, кӧ нава нәщьһуйада Ԝи даннасин кьм, һьнге мьн шеԝьра хԝә тʼӧ кәси нәкьр,

¹⁷ нә жи рʼабумә Оршәлиме, щәм әԝед кӧ бәри мьн бьбунә шанди, ле әз перʼа-перʼа чумә Әʼрәбьстане у диса вәгәрʼийамә Шаме.

¹⁸ Паше се сала шунда рʼабумә Оршәлиме, кӧ Пәтрус бьбиньм у панздәһ рʼожа щәм ԝи мам.

¹⁹ Ле бәле жь шандийед майин мьн тʼӧ кәс нәдит, пештьри Аԛубе бьре Хӧдан.

²⁰ Чь кӧ ԝәрʼа дьньвисьм, әз бәр Хԝәде бехельф дьбежьм.

²¹ Паше чумә алийед Сурйайе у Киликйайе.

²² Ле щьвинед Мәсиһә Щьһустанеда әз рʼу бь рʼу нас нәдькьрьм.

²³ Ԝана тʼәне бьһистьбу кӧ: «Әԝе ԝәхтәке әм дьзерандьн, ньһа хԝәха ԝе баԝәрийе даннасин дькә, кʼижан ԝи ԝәхтәке дькьр кӧ хьраб кә».

²⁴ У бона мьн шькьри дьданә Хԝәде.