Filîpî 4 - Пәймана Ну (Инщил)

Тʼәмийед ахьрийе

¹ Ньһа хушк-бьрайед мьнә ширьн у һʼәйран, һун ьн шабун у кʼофийа сәре мьн дәлално, йәктийа Хӧданда аһа ԛәԝин бьминьн.

² Әз һиви жь Әйодийайе дькьм у һиви жь Сьнтихайе дькьм, чаԝа тʼәви Хӧдан йәкбуйи бьра ль һәв бен.

³ Бәле әз һиви жь тә жи дькьм һәвалбаре мьни амьн, тӧ жи али ԝан кʼӧлфәта бькә. Әвана тʼәви мьн хәбата Мьзгинидайинеда худан рʼетьнә, ӧса жи тʼәви Клемес у һәвал-хәбатед мьнә майин, кӧ навед кʼижана кʼьтеба жийинеда ньвисар ьн.

⁴ Тʼьме пе Хӧдан ша бьн, диса дьбежьм тʼьме ша бьн!

⁵ Бьра бәрбьһерийа ԝә һʼәму мәрьвава әʼйан бә. Хӧдан незик ә.

⁶ Бона тʼӧ тьшти хәм нәкьн, ле хԝәстьна ԝә бьра бь дӧа-дьрозга, рʼазибунева тʼәвайи, Хԝәдева әʼйан бә.

⁷ У әʼдьлайийа Хԝәде кӧ жь һәр һʼьш-аԛьли дәрбазтьр ә, ԝе дьл у фькьред ԝә йәктийа Мәсиһ Исада хԝәй кә.

⁸ Һәйнәсәр хушк-бьрано, чь кӧ бь рʼастийе йә, чь кӧ бь маԛултийе йә, чь кӧ бь һәԛийе йә, чь кӧ бь һʼәлалийе йә, чь кӧ бь хԝәшийе йә, чь кӧ бь фьрасәтийе йә у һәр тьштед кӧ әʼсьли у лайиԛи ԛәнщготьне нә, сәр ван тьшта бьфькьрьн.

⁹ Һун жь мьн чь һин бун, ԝә чь станд, чь бьһист у чь дит ԝе йәке бькьн у Хԝәдейе әʼдьлайийе ԝе тʼәви ԝә бә.

Рʼазибуна Паԝлос

¹⁰ Әз бь сайа Хӧдан гәләки ша мә, кӧ ԝә пәй һаԛас ԝәхтрʼа әз бир аним, бона мьн хәм хԝар. Бәле ԝә дькьр жи, ле мәщал нәдькʼәтә ԝә.

¹¹ Нә кӧ әз һʼәԝще тьштәки мә кӧ ве йәке ԝәрʼа дьбежьм. Әз һин бумә, кӧ һʼәму һʼалида рʼази бьм.

¹² Тʼӧнәбуне заньм, һәбуне заньм, әз һәр алийида у һәр һʼалида сәр ве сӧрʼе вәбумә у һин бумә кӧ рʼази бьм, һәгәр тʼер бьм, һәгәр бьрʼчи, йан һәбунеда бьм йан жи тʼӧнәбунеда.

¹³ Әз һәр тьшти бь сайа Ԝи дькарьм, Йе кӧ ԛәԝате дьдә мьн.

¹⁴ Ле ԝә ԛәнщ кьр, кӧ тәнгасийа мьнда кʼомәк да мьн.

¹⁵ У бәле һун жи заньн гәли филипийа, кӧ жь сәре даннасинийа Мьзгинийеда гава әз жь Мәкәдонйайе дәркʼәтьм, тʼӧ щьвине тʼәвкʼарийеда дәсте хԝә дьрежи мьн нәкьр, пештьри ԝә.

¹⁶ Чьмки щарәке-дӧда әԝ тьштед мьнрʼа керһати ԝә һʼәта Тʼесалоникийе жи шандьн.

¹⁷ Әз нә кӧ тьштәки пʼешкʼеш дьхԝазьм, ле дьхԝазьм кӧ кʼар сәр һʼәсабе ԝәда зедә бә.

¹⁸ Мьн һәр тьшт стандийә у нава һәбунеда мә. Әԝ тьштед кӧ ԝә бь дәсте Епафродито мьнрʼа шандьнә әԝ бәси мьн ьн. Әԝ дайина ԝә бинәкә хԝәш ә, һʼәдийа ԛәбул у ль Хԝәде хԝәш ә.

¹⁹ У Хԝәдейе мьн ԝе һʼәму кемасийед ԝә пе ԝе хьзна Хԝәйә рʼумәтә жь Мәсиһ Иса тʼьжи кә.

²⁰ Аԝа шькьр жь Хԝәде у Баве мә, һʼәта-һʼәтайе! Амин.

Сьлавед ахьрийе

²¹ Тʼәмамийа щьмәʼта Хԝәдейә пʼара Мәсиһ Иса сьлав кьн. Әԝ бьрайед кӧ тʼәви мьн ьн ль ԝә сьлав дькьн.

²² Тʼәмамийа щьмәʼта Хԝәде ль ԝә сьлав дькә, илаһи әԝед кӧ жь мала Ԛәйсәр ьн.

²³ Кʼәрәма Хӧдан Иса Мәсиһ тʼәви рʼӧһʼе ԝә бә.