Efesî 6 - Пәймана Ну (Инщил)

Тʼәмийед бона зарʼа у де-бава

¹ Зарʼно, чаԝа баԝәрмәндед Хӧдан гӧрʼа де у баве хԝәда бьн, чьмки әв йәк рʼаст ә.

² «Ԛәдьре де у баве хԝә бьгьрә» кӧ әв ә тʼәмийа пешьн тʼәви создайине,

³ «ԝәки чәрха тә рʼаст бә у сәр әʼрде әʼмьре тә дьреж бә».

⁴ У һун бавно, зарʼед хԝә һерс нәехьн, ле ԝан бь ширәт у һинкьрьна Хӧдан мәзьн кьн.

Хӧлам у аха

⁵ Хӧламно, бь хоф у тьрс, дьле сах гӧрʼа хԝәйийед хԝәйә ве дьнеда бьн, чаԝа гӧрʼа Мәсиһда,

⁶ нә кӧ бь хӧламтийа ль бәр чʼәʼва, кӧ ль мәрьва хԝәш бен, ле чаԝа хӧламед Мәсиһ бь дьл ԛьрара Хԝәде бьԛәдиньн.

⁷ Бь рʼәзәдьли хӧламтийе бькьн, чаԝа Хӧданрʼа, нә кӧ мәрьварʼа.

⁸ Һун заньн кӧ һәр кәс, һәгәр хӧлам бә, һәгәр аза, чь ԛәнщийе кӧ бькә, ԝәкә ԝе жи ԝе жь Хӧдан бьстинә.

⁹ Һун жи хԝәйино, һьндава ԝанда ӧса бьн. Дәст жь гәф-гӧрʼийе бькьн. Һун заньн кӧ Хԝәйе ԝан жи, Йе ԝә жи ль әʼзмана йә у щәм Ԝи тʼӧ фьрԛи тʼӧнә.

Чʼәкед Хԝәде

¹⁰ Һәйнәсәр, йәктийа Хӧданда ԛәԝат бьн, бь зорайийа ԛәԝата Ԝи.

¹¹ Һәр чʼәке Хԝәде ль хԝә кьн, кӧ һун бькарьбьн мьԛабьли һʼӧнӧред мирещьн бьсәкьньн.

¹² Чьмки шәрʼе мә нә мьԛабьли хун у гошт ә, ле мьԛабьли сәрԝерти у һʼӧкӧмәтийа йә, мьԛабьли миред ве дьнйа тәʼри йә у мьԛабьли ордийед рʼӧһʼанийә хьрабә ль дийаре әʼзмана нә.

¹³ Бона ве йәке чʼәкед Хԝәде һьлдьн, кӧ һун бькарьбьн ль бәр рʼожа охьрме гьран бьсәкьньн у пьшти кьрьна һәр тьштирʼа, щийе хԝәда ԛәԝин бьсәкьньн.

¹⁴ Аԝа щийе хԝәда бьсәкьньн, рʼастийе мина кʼәмбәре ль пьшта хԝә бьшьдиньн, һәԛийе мина зьрьһʼе ль синге хԝә ԝәргьрьн

¹⁵ у сол ньгед ԝәда, бона Мьзгинийа әʼдьлайийе һазьр сәкьни бьн.

¹⁶ Ль сәр һәр тьштирʼа жи баԝәрийе мина мәртʼале бьгьрьнә хԝә, бь кʼижане һуне бькарьбьн һʼәму тиред агьрийә кӧ йе Хьраб давежә, бьтәмьриньн.

¹⁷ У хьлазбуне мина кʼӧмзьрьһʼе һьлдьн, мина шур жи хәбәра Хԝәде, кӧ жь Рʼӧһʼе Пироз ә.

¹⁸ Бь һʼәму дӧа у рʼәща һәр гав дӧа бькьн пе Рʼӧһʼе Пироз. Сәр ве йәке һʼьшйар бьминьн у бона тʼәмамийа щьмәʼта Хԝәде тʼьме дӧа бькьн.

¹⁹ У бона мьн жи дӧа бькьн, кӧ гава әз хәбәр дьм, готьнәк мьнрʼа бе дайине, ԝәки меркʼими сӧрʼа Мьзгинийе әʼйан кьм,

²⁰ бона Кʼижане әз бь ван ԛәйде хԝә ԛасьдийе дькьм. Дӧа бькьн, ԝәки әз бона Ԝе тӧрӧш кьм хәбәр дьм, чаԝа лазьм ә.

Сьлавед ахьрийе

²¹ Ԝәки һун жи бона мьн бьзаньбьн, һаш жь һʼал-һʼәԝале мьн һәбьн, Тьхикойе бьрайе дәлал у ԛӧльхкʼаре амьн йәктийа Хӧданда ԝе һәр тьшти ԝәрʼа бежә.

²² Әз бона ԝе йәке ԝи сәр ԝәда дьшиньм, ԝәки һун һаш жь мә һәбьн у әԝ бь ве йәке дьл бьдә ԝә.

²³ Дә бьра әʼдьлайи у һʼьзкьрьн баԝәрийева тʼәвайи жь Бав Хԝәде у Хӧдан Иса Мәсиһ ль хушк-бьра бә.

²⁴ Бьра кʼәрәм тʼәви ԝан һʼәмуйа бә, йед кӧ бь һʼьзкьрьна бе хьлази Хӧдане мә Иса Мәсиһ һʼьз дькьн.