Efesî 5 - Пәймана Ну (Инщил)

Чаԝа чʼәʼв бьдьнә Хԝәде

¹ Аԝа чʼәʼв бьдьнә Хԝәде, чаԝа зарʼед һʼьзкьри

² у хԝә ль һʼьзкьрьне бьгьрьн, чаԝа Мәсиһ жи әм һʼьз кьрьн у жийина Хԝә бона мә да, Хԝәдерʼа бу һʼәди у ԛӧрбана бинхԝәш.

³ Ле һʼәта наве ԛавийе у һәр һʼәрамийе, йан тьмайе жи гәрәке нава ԝәда нәйе һьлдане, чаԝа ль щьмәʼта Хԝәде накʼәвә.

⁴ Ӧса жи готьнед бемәʼрифәти, йан бефәʼми, йан һʼәнәкед ԛәлпе хьраб, кӧ ль ԝә накʼәвьн, бьра жь дәве ԝә дәрнәйен, ле дәԝсе шькьрдари.

⁵ Һун ве йәке заньбьн кӧ тʼӧ ԛав, йан һʼәрам, йан тьмакʼар (кӧ пʼутпʼарьст ә) Пʼадшатийа Мәсиһ у Хԝәдеда ԝар набә.

⁶ Бьра тʼӧ кәс бь хәбәред пʼучʼ ԝә нәхапинә, чьмки бона ван тьшта һерса Хԝәде ль ԝан мәрьвед нәгӧһдар рʼадьбә.

⁷ Аԝа һун тʼәви йед ӧса нәбьн!

⁸ Һун жи ԝәхтәке тәʼри бун, ле ньһа һун кӧ пʼара Хӧдан ьн, рʼонайи нә. Аԝа мина зарʼед рʼонайе бьжин,

⁹ (чьмки бәре рʼонайийе жь һәр ԛәнщийе, һәԛийе у рʼастийе дьбә)

¹⁰ у бьзаньбьн кӧ чь ль Хӧдан хԝәш те.

¹¹ Тʼәви ԝан кьред бебәрә тәʼрийе нәбьн, ле ԝан сәр аве хьн,

¹² чьмки бона ԝан тьштед кӧ әԝана бь дьзива дькьн шәрм ә жи кӧ бе хәбәрдане.

¹³ Ле гава һәр тьшт те бәр рʼонайе, ашкәрә дьбә,

¹⁴ чьмки һәр тьште кӧ ашкәрә дьбә, дьбә рʼонайи. Бона ве йәке һатийә готьне: «Хәԝьхийо, һʼьшйар бә! Жь нав мьрийа рʼабә у Мәсиһ ԝе тә рʼонайи кә».

¹⁵ Аԝа бьньһерʼьн кӧ һун ньге хԝә фәсал бавежьн, нәбьнә мина бефәʼма, ле мина сәрԝахта.

¹⁶ Дәст бьдьнә бәр ԝәхт, чьмки зәмани хьраб ә.

¹⁷ Бона ве йәке бефәʼм нибьн, ле бәле бьзаньбьн чь йә ԛьрара Хӧдан.

¹⁸ У бь шәраве сәрхԝәш нәбьн, кӧ әʼмьре мерьв пʼучʼ дькә, ле бь Рʼӧһʼе Пирозва тʼьжи бьн.

¹⁹ Зәбур у дьрозга, стьранед рʼӧһʼани һәвдӧрʼа бежьн, бьстьрен у дьле хԝәда Хӧданрʼа бьловиньн.

²⁰ Һәр гав бона һәр тьшти рʼазибуне бьдьнә Бав Хԝәде, бь наве Хӧдане мә Иса Мәсиһ.

Борщдарийа жьн у мера

²¹ Бь хофа Мәсиһә нава хԝәда ль бәр һәвдӧ хԝә бьшкеньн.

²² Кʼӧлфәтно, ӧса хԝә ль бәр меред хԝә бьшкеньн, чаԝа ль бәр Хӧдан,

²³ чьмки мер сәре жьне йә, чаԝа Мәсиһ жи сәре щьвине йә у Хԝәха Хьлазкьре бәдәна Хԝә йә.

²⁴ У чаԝа щьвин ль бәр Мәсиһ хԝә дьшкенә, бьра ӧса жи жьн һәр тьштида бәр мере хԝә шкәсти бә.

²⁵ Мерно, жьнед хԝә һʼьз бькьн, чаԝа кӧ Мәсиһ щьвин һʼьз кьр у жийина Хԝә бәр ԝева да,

²⁶ ԝәки ԝе бь хәбәре бӧһӧрти-жьбарә кә, пе аве бьшо,

²⁷ кӧ щьвине ль бәр Хԝә ԛәшәнг бьдә сәкьнандьне, кӧ тʼӧ ләкʼә йан ԛәрчʼьмок, йан тьштәки мина ван сәр тʼӧнәбә, ле паԛьж у беԛӧсур бә.

²⁸ Ӧса жи гәрәке мер жьна хԝә һʼьз бькә, чаԝа бәдәна хԝә. Йе кӧ жьна хԝә һʼьз дькә, әԝ хԝә һʼьз дькә.

²⁹ Чьмки бәдәна тʼӧ кәси бәр чʼәʼве ԝи нә рʼәш ә, ле ԝе тʼер дькә у хԝәй дькә, чаԝа Мәсиһ жи щьвине,

³⁰ чьмки әм әндәмед бәдәна Ԝи нә.

³¹ Чаԝа ньвисар ә: «Бона ве йәке мер ԝе де у баве хԝә бьһелә, хԝә ль жьне бьгьрә у һәр дӧ ԝе бьбьнә бәдәнәк».

³² Әва сӧрʼа кʼур ә, ле әз готьна хԝә тиньмә сәр Мәсиһ у щьвине.

³³ Бәле жь ԝә һәр кәс жи бьра жьна хԝә һʼьз бькә чаԝа хԝә у жьн жь мере хԝә хоф бькә.