شُله رسولا 4 - Пәймана Ну (Инщил)

Пәтрус у Йуһʼәнна ль бәр щьвина гьрәгьра

¹ Пәтрус у Йуһʼәнна һе щьмәʼтерʼа хәбәр дьдан, кʼаһина у сәрԝере нобәдаред пʼарьстгәһе тʼәви садуԛийа сәр ԝанда гьртьн.

² Әԝана ащьз бьбун, чьмки ԝана щьмәʼт һин дькьр, кӧ Иса жь мьрьне рʼабуйә, избат дькьрьн кӧ мьрийе рʼабьн.

³ Әԝ гьртьн кьрьнә кәле һʼәта рʼожа дьне, чьмки иди евар бу.

⁴ Ле гәләкед кӧ хәбәр дьбьһистьн баԝәр кьрьн, һʼәсабе ԝан гьһиштә пенщ һʼәзара.

⁵ Рʼожа дьне сәрԝер, рʼуспи у ԛанунзан щьвийанә Оршәлиме.

⁶ Һәнане сәрәккʼаһин, Ԛәйафа, Йуһʼәнна, Скәндәр у һʼәмуйед майинә жь хун-ԛьнета сәрәккʼаһин жи ль ԝьр бун,

⁷ Пәтрус у Йуһʼәнна нава хԝәда данә сәкьнандьне у пьрсин: «Ԝә бь чь ԛәԝате йан бь чь нави әв йәка кьр?»

⁸ Ԝе дәме Пәтрус бь Рʼӧһʼе Пироз тʼьжи ԝанарʼа гот: «Гәли сәрԝеред щьмәʼте у рʼуспийа!

⁹ Һәгәр һун иро бона ве ԛәнщийа кӧ ви сәԛәтирʼа бу жь мә дьпьрсьн, кӧ әԝ чаԝа ԛәнщ буйә,

¹⁰ бьра ԝә у тʼәмамийа мьләте Исраелева әʼйан бә, кӧ әва бь сайа наве Иса Мәсиһе Ньсрәте ль бәр ԝә ԛәнщбуйи сәкьни йә, Әԝе кӧ ԝә хач кьр у Хԝәде жь мьрьне рʼакьр.

¹¹ Әԝ ә ‹Әԝ кәвьре кӧ жь ԝә һоста һатә берʼумәткьрьне у бу сәре әʼнишке›.

¹² Бь кәсәки майин хьлазбун тʼӧнә, чьмки бьн пʼәрʼе әʼзменда навәки дьн мәрьварʼа нәһатийә дайине, кӧ әм бькарьбьн бь ԝи хьлаз бьн».

¹³ Гава ԝана меркʼимийа Пәтрус у Йуһʼәнна дит у пе һʼәсийан кӧ әвана мәрьвнә нәхԝәнди у нәзан ьн, әʼщебмайи ман у нас кьрьн, кӧ әвана тʼәви Иса бунә.

¹⁴ Ле әԝ мәрьве ԛәнщбуйи кӧ тʼәви ԝан сәкьни дитьн у нькарьбун тьштәк бьготана.

¹⁵ Һьнге әʼмьри ль ԝан кьрьн, кӧ әԝ жь щьвина гьрәгьра дәрен у һәврʼа шеԝьрин,

¹⁶ готьн: «Әм ван мәрьва чаԝа бькьн? Чьмки һʼәму бьнәлийед Оршәлимева әʼйан ә кӧ бь дәсте ван кʼәрәмәтәкә бәрбьчʼәʼв бу у әм нькарьн инкʼар кьн.

¹⁷ Ле ԝәки нава щьмәʼтеда һе бәла нәбә, әм гәфе ль ԝан бьхԝьн, кӧ тʼӧ щар бь Ԝи Нави кәсирʼа хәбәр нәдьн».

¹⁸ Диса гази ԝан кьрьн, тʼәми данә ԝан, кӧ тʼӧ щар бь наве Иса хәбәр нәдьн у һин нәкьн.

¹⁹ Ле Пәтрус у Йуһʼәнна ль ԝан вәгәрʼандьн у готьн: «Кʼа һун хԝәха бьфькьрьн, гәло әв йәк бәр Хԝәде рʼаст ә кӧ әм гӧрʼа ԝә бькьн, нә йа Хԝәде?

²⁰ Әм нькарьн бона ԝан тьштед кӧ мә хԝәха дитьн у бьһистьн нәкьнә дәнги».

²¹ Ԝана диса гәф ль ԝан хԝар у бәрʼдан. Бәр щьмәʼте мәʼник сәр ԝан нәдитьн кӧ щәза бьдана ԝан, чьмки һʼәмуйа жи бона әԝ тьште ԛәԝьми шькьри дьданә Хԝәде.

²² Әʼмьре ԝи мәрьве кӧ әв кʼәрәмәта ԛәнщбуне жерʼа бу чьл сали жортьр бу.

Дӧайе баԝәрмәнда

²³ Гава Пәтрус у Йуһʼәнна һатьнә бәрʼдане, әԝ чунә щәм кʼома хԝә у ԝанрʼа һәр тьшт гьли кьрьн, чь кӧ сәрәкед кʼаһин у рʼуспийа ԝанарʼа готьбун.

²⁴ Ԝана жи гава бьһист, һәврʼа дәнге хԝә һьлдан гази Хԝәде кьрьн у готьн: «Йа Хԝәйи, Әʼфьрандаре әʼрд у әʼзмен, бәʼре у һʼәмуйед нав ԝанда,

²⁵ Тә бь Рʼӧһʼе Пироз пе дәве баве мә, бәрдәстийе Хԝә Даԝьд гот: ‹Чьма нәщьһу ԛьлԛьлин у мьләт жи бона тьштед пʼучʼ фькьрин?

²⁶ Пʼадшед дьнйайе һазьр сәкьнин у сәрԝер һәврʼа мьԛабьли Хӧдан у Мәсиһе Ԝи щьвийан›.

²⁷ Бәле рʼаст ви бажарида сәр бәрдәстийе Тә Исайе пироз, Йе кӧ Тә бь рʼункьрьне кʼьфш кьр, Һеродәс у Пилатойе Понтийо тʼәви нәщьһуйа у мьләте Исраеле щьвийан,

²⁸ ԝәки ԝан тьшта бькьн, чь кӧ Тә һе бәреда анәгори ԛәԝат у әʼмьре Хԝә кʼьфш кьрьбу бьбьн.

²⁹ Ньһа йа Хӧдан, сәр гәф у гӧрʼийа ԝанда бьньһерʼә, кʼәрәме хӧламед Хԝәрʼа бькә, ԝәки әм меркʼими хәбәра Тә хәбәр дьн,

³⁰ дәсте Хԝә дьреж кә, ԝәки бь наве бәрдәстийе Тә Исайе пироз жь нәхԝәшийа ԛәнщ бьн, нишан у кʼәрәмәт бьԛәԝьмьн».

³¹ Һәма чаԝа ԝана дӧа хьлаз кьр, әԝ щийе кӧ әԝ щьвийайи бун һʼәжийа у һʼәму бь Рʼӧһʼе Пироз тʼьжи бун, хәбәра Хԝәде меркʼими хәбәр дьдан.

Һәр тьште баԝәрмәнда йәк бу

³² Дьл у рʼӧһʼе тʼәмамийа щьмәʼта баԝәрмәнда йәк бу. Жь ԝана тʼӧ кәси һәбука хԝәрʼа нәдьгот кӧ: «Йа мьн ә», ле һәр тьштед ԝан йәк бу.

³³ Шандийа бь ԛәԝата зор шәʼдәтийа мьрьн-рʼабуна Хӧдан Иса дьдан у кʼәрәмәкә мәзьн сәр ԝан һʼәмуйа бу.

³⁴ Нава ԝанда тʼӧ кәс һʼәԝще тьштәки нибу. Әԝед кӧ хԝәйе әʼрда йан мала бун, дьфьротьн у ԛимәте ԝан тьштед фьроти данин

³⁵ бәр пʼийед шандийа даданин у ԝана жи кʼерʼа чь лазьм буйа бәла дькьрьн.

³⁶ Аԝа йәки леԝи жь Ԛӧбрьсе, наве ԝи Усьв, кӧ шандийа жерʼа дьгот Барнабас, кӧ те фәʼмкьрьне: «Йе Дьлдайине»,

³⁷ әʼрдәки ԝи һәбу фьрот, ԛимәте ԝи ани бәр пʼийед шандийа дани.