شُله رسولا 24 - Пәймана Ну (Инщил)

Щьһу шькийате Паԝлос дькьн

¹ Пенщ рʼожа шунда Һананийайе сәрәккʼаһин тʼәви һьнәкә жь рʼуспийа у Тәртулойе занәбеж бәржер бу һатә Ԛәйсәрийе. Вана бона Паԝлос гьли-газьне хԝә ԝәлирʼа кьрьн.

^2-3 Гава гази Паԝлос кьрьн, Тәртуло дәст бь шькийата кьр у гот: «Әм тʼьме у һәр дәра ԝан кьрьнед тә дьшекьриньн, Фәликсе хԝәйиԛәдьр, кӧ сайа сәре тә әви мьләте мә гәләк әʼдьлайи дитийә у гәләки пешда чуйә.

⁴ Ле ԝәки гәләки сәре тә нәешиньм, һиви дькьм жь кʼәрәма хԝә кьн гӧһдарийа мә бькә.

⁵ Мә әв мәрьва дит, чаԝа мина бәлаке кʼәтийә нава һʼәму щьһуйед сәр дьне тʼәвиһәв дькә у рʼебәре кʼомәла ньсрәтийа йә.

⁶ Әви кьр кӧ пʼарьстгәһе жи бьһʼәрʼьминә, ле мә әԝ гьрт.

⁸ Һәгәр тӧ жь ԝи бьпьрси, те хԝәха бькарьби жь ԝи һәр тьшти бьзаньби кʼа бона чь әм шькийате ԝи дькьн».

⁹ Щьһуйа жи готьна ԝи әʼсәйи кьрьн, готьн: «Бәле, әв йәк ӧса йә».

Паԝлос щаба хԝә ль бәр Фәликсе ԝәли дьдә

¹⁰ Гава ԝәли пе сәрийа кьр кӧ әԝ хәбәр дә, Паԝлос ле вәгәрʼанд у готе: «Әз заньм кӧ гәләк сал ьн тӧ һʼакьме ви мьләти йи, әзе жи бь рʼәзәдьли бона хԝә щаба хԝә бьдьм.

¹¹ Чаԝа кӧ тӧ дькари бьзаньби, әва донздәһ рʼож тʼӧнә, кӧ әз бона һʼәбандьне һәвраз чубумә Оршәлиме.

¹² Әвана әз нәдитьмә кӧ пʼарьстгәһеда тʼәви йәки текʼәвьмә дәʼԝе, йан жи кʼьништада ӧса жи щики дьн бажерда әʼлаләте дора хԝә тʼоп кьм.

¹³ У нә жи ньһа дькарьн готьнед хԝә избат кьн, кӧ бона чь шькийате мьн дькьн.

¹⁴ Ле әзе ашкәрә тәрʼа бежьм, ԝәки ль гора ԝе Рʼийа кӧ әԝана жерʼа кʼомәла шьһʼьти дьбежьн, әз һәма ӧса Хԝәдейе кал-бавед хԝә дьһʼәбиньм. У чь кӧ Ԛанун у ньвисаред пʼехәмбәрада жи ньвисар ә, баԝәр дькьм.

¹⁵ Әз Хԝәдеда жи гӧман ьм, чаԝа кӧ әԝ жи ԝе гӧмане нә, кӧ һʼәму һәԛ у нәһәԛе жь мьрьне рʼабьн.

¹⁶ Бона ве йәке чьԛас жь мьн те, әз дьщәʼдиньм һʼәму ԝәхти бь исафа рʼьһʼәт ль бәр Хԝәде у мәрьва бьм.

¹⁷ Аԝа пәй гәләк саларʼа әз вәгәрʼийам һатьмә Оршәлиме, кӧ кʼомәке бьдьмә мьләте хԝә у һʼәдийа бьдьм.

¹⁸ Һьнге ԝи шьхӧлида әз пʼарьстгәһеда паԛьжбуйи дитьм ль гора әʼдәте мә. Әз нә тʼәви әʼлаләте бум, нә жи шәрʼуда.

¹⁹ Ле жь ԝан чәнд щьһуйед ԛәза Асйайе ль ԝьр бун. Һәгәр һьндава мьнда тьштәки ԝани готьне һәбуйа, әԝ гәрәке бьһатана бәр тә бьсәкьнийана шькийате мьн бькьрана.

²⁰ Йан жи бьра әвана бежьн, гава әз бәр щьвина гьрәгьра сәкьни бум, чь хьраби сәр мьн дитьн,

²¹ пештьри ве йәке, кӧ мьн бь дәнге бьльнд нава ԝанда готийә: ‹Бона баԝәрийа рʼабуна мьрийа һун иро диԝана мьн дькьн›».

²² Фәликсва әԝ Рʼе кӧ рʼьнд әʼйан бу, һьнге әԝи шьхӧле ԝан пашда авит у гот: «Кʼәнге Лусйойе сәрһʼәзар бәржер бе, әзе һьнге бона шьхӧле ԝә ԛьрара хԝә бьдьм».

²³ Әԝи әʼмьри сәрсәд кьр, кӧ Паԝлос пʼьрʼи-һьндьки аза хԝәй кьн у изьна һәвал-һогьред ԝи жи бьдьн, йе кӧ ԝе кʼомәкдарийа ԝи бькьн.

Паԝлос гьрти дьминә

²⁴ Чәнд рʼожа шунда Фәликс тʼәви Дьрусила кʼӧлфәта хԝәйә щьһу һат, гази Паԝлос кьр у бона ԝе баԝәрийа сәр Мәсиһ Иса жь ԝи бьһист.

²⁵ Паԝлос һе бона рʼастийе, хԝәгьртьне у диԝана Хԝәдейә кӧ ԝе бе хәбәр дьда, Фәликс саԝ кʼьшанд у гот: «Тӧ ньһа һәрʼә. Гава ԝәхте мьн һәбә, әзе гази тә кьм».

²⁶ Ӧса жи әԝ ԝе гӧмане бу, кӧ жь Паԝлос пʼәрә бьстанда, бона ԝе йәке жи гәләк щара гази ԝи дькьр у тʼәви ԝи хәбәр дьда.

²⁷ Гава дӧ сал дәрбаз бун, дәԝса Фәликс Поркийо Фесто бу ԝәли. Фәликс жи кӧ дьхԝәст ԛәнщи щьһуйарʼа бькьра, Паԝлос гьрти һьшт.