شُله رسولا 23 - Пәймана Ну (Инщил)

¹ Паԝлос дина хԝә да щьвина гьрәгьра у гот: «Гәли бьра! Мьн бь исафа рʼьһʼәт ль бәр Хԝәде әʼмьре хԝә һʼәта иро дәрбаз кьрийә».

² Һананийайе сәрәккʼаһин әʼмьри бәрдәстийед незики Паԝлос кьрьн кӧ девда бьдьне.

³ Һьнге Паԝлос ԝирʼа гот: «Хԝәдейе жи ль тә хә, диԝаре сиԝахкьри! Тӧ рʼуньшти йи анәгори Ԛануне диԝана мьн дьки у жь Ԛануне дәр әʼмьр дьки кӧ әԝ мьн хьн».

⁴ Йед щәм Паԝлос сәкьни готьн: «Тӧ сәрәккʼаһине Хԝәде беһӧрмәт дьки?»

⁵ Паԝлос гот: «Бьрано, мьн ньзаньбу кӧ әԝ сәрәккʼаһин ә. Чаԝа ньвисар ә: ‹Һьндава сәрԝере мьләте хԝәда хьраб хәбәр нәдә›».

⁶ Һьнге Паԝлос пе һʼәсийа кӧ алики садуԛи нә, алики жи ферьси, ԝе щьвинеда кьрә гази у гот: «Гәли бьра! Әз ферьси мә, кӧрʼе ферьсийа! Бона гӧмана рʼабуна мьрийа диԝана мьн дькьн».

⁷ Гава әв йәк гот, ферьси у садуԛи һәврʼа кʼәтьнә һʼӧщәте у дӧтирәти кʼәтә нава кʼоме,

⁸ (чьмки садуԛи дьбежьн нә рʼабуна мьрийа һәйә, нә мьлйакʼәт, нә жи рʼӧһʼ, ле ферьси һәрсека жи ԛәбул дькьн).

⁹ Һьнге ԛалмә-ԛалма мәзьн һе пешда һат, жь ԛанунзанед алийе ферьсийа һьнәк рʼабунә пʼийа у дәнг һьлдан меркʼими готьн: «Әм ви мәрьвида тʼӧ хьрабийе набиньн. Бәлки рʼӧһʼәки йан мьлйакʼәтәки вирʼа хәбәр дайә?»

¹⁰ Гава шәрʼ-дәʼԝ зедә бу, сәрһʼәзар тьрсийа кӧ әԝ Паԝлос ԛәт-ԛәти кьн, әʼмьри әскәра кьр кӧ һәрʼьнә жере әԝи жь нав ԝан бьгьрьн бьбьнә әскәрхане.

¹¹ Шәвтьра дьн Хӧдан ль бәр ԝи сәкьни у готе: «Сәрхԝә бә, тә чаԝа шәʼдәтийа Мьн Оршәлимеда да, ӧса жи гәрәке Рʼомеда шәʼдәтийе бьди».

Щьһу тʼәләке бона кӧштьна Паԝлос һазьр дькьн

¹² Сьбәһ кӧ зәлал бу, һьнәк щьһу бунә йәк у сонд хԝарьн, кӧ һʼәта Паԝлос нәкӧжьн, нә бьхԝьн, нә жи вәхԝьн.

¹³ Әԝед кӧ әԝ сонд хԝарьн жь чьли зедәтьр бун.

¹⁴ Әвана чунә щәм сәрәкед кʼаһин у рʼуспийа готьн: «Мә сонд хԝарийә, һʼәта кӧ әм Паԝлос нәкӧжьн, тьштәки тәʼм нәкьн.

¹⁵ Аԝа һун тʼәви щьвина гьрәгьра бежьнә сәрһʼәзар кӧ әԝи сьбе бинә щәм ԝә, йанчийә һун дьхԝазьн дәрһәԛа ԝида һәр тьшти һе рʼаст пе бьһʼәсьн, әме жи һе бәри һатьна ԝи һазьр бьн кӧ ԝи бькӧжьн».

¹⁶ Ле харзийе Паԝлос бона ве тʼәләке бьһист, һат кʼәтә әскәрхане Паԝлосрʼа гот.

¹⁷ Паԝлос жи гази сәрсәдәки кьр у готе: «Әви хорти бьбә щәм сәрһʼәзар, дьхԝазә тьштәки ԝирʼа бежә».

¹⁸ Әԝи жи хорт бьрә щәм сәрһʼәзар у готе: «Паԝлосе гьрти гази мьн кьр, һиви кьр кӧ ви хорти биньмә щәм тә, тьштәки ԝийи готьне тәрʼа һәйә».

¹⁹ Сәрһʼәзар дәсте ԝи гьрт, бьрә алики у пьрси: «Тӧ чь дьхԝази әʼлами мьн ки?»

²⁰ Әԝи гот: «Щьһуйа ԛьрар кьрийә кӧ һиви жь тә бькьн, ԝәки сьбе Паԝлос бьби щьвина гьрәгьра, йанчийә дьхԝазьн дәрһәԛа ԝида һәр тьшти һе рʼаст бьзаньбьн.

²¹ Ле ԝан баԝәр нәкә, чьмки жь ԝан чьл мәрийа зедәтьр хԝә вәшартьнә, һивийа ԝи нә. Ԝана сонд хԝарийә, кӧ нә бьхԝьн, нә жи вәхԝьн һʼәта ԝи нәкӧжьн. Ԝана ньһа кʼаре хԝә кьрийә, һивийа ԛьрара тә нә».

²² Ԝи чахи сәрһʼәзар хорт вәрʼекьр у тʼәми да ԝи: «Кәсирʼа нәбежә, кӧ тә әв йәк мьнрʼа готийә».

Паԝлос дьшиньнә Ԛәйсәрийе щәм Фәликсе ԝәли

²³ Сәрһʼәзар гази дӧ сәрсәда кьр у гот: «Дӧсьд әскәри һазьр кьн, һʼәфте сийари, дӧсьд жи рʼьмдар, ԝәки шәв сьһʼәта нәһа һʼәта Ԛәйсәрийе һәрʼьн.

²⁴ Ӧса жи чәнд һәспа һазьр кьн, ԝәки Паԝлос ле сийар кьн, кӧ бе ԛәдә бе бәла бьбьнә щәм Фәликсе ԝәли».

²⁵ Нәʼмәк жи бь ве фькьре ньвиси:

²⁶ «Жь Клаԝдйо Лусйо, Сьлав Фәликсе ԝәлийе хԝәйиԛәдьррʼа!

²⁷ Әва мәрьва жь щьһуйа һатьбу гьртьне, ԝе бь дәсте ԝан бьһата кӧштьне, әз пе һʼәсийам кӧ рʼомайи йә, бь әскәрава гьһиштьме у мьн әԝ хьлаз кьр.

²⁸ Мьн хԝәст кӧ бьзаньбьм кʼа бона чь шькийате ԝи дькьн, мьн әԝ бьрә бәр щьвина гьрәгьред ԝан

²⁹ у кʼьфш кьр, кӧ шькийате ԝан сәр пьрсед ԛануна ԝан ә, ле бона кӧштьне йан гьртьне хьрабийа ԝи тʼӧнәйә.

³⁰ Гава щаб гьһиштә мьн, кӧ щьһуйа бона ԝи мәрьви тʼәләкәк һазьр кьрийә, мьн дәстхԝәда әԝ шандә щәм тә у әʼмьри ль шькийаткьра кьр, кӧ чи ԝани мьԛабьли ԝи һәбә, ль бәр тә бежьн».

³¹ Әскәра жи анәгори ԝи әʼмьре кӧ стандьн, Паԝлос шәв һьлдан бьрьнә Әнтипәтрисе.

³² Рʼожа дьне йед сийари Паԝлосрʼа данин кӧ тʼәви ԝи һәрʼьн, ле йед пәйа хԝәха вәгәрʼийанә әскәрхане.

³³ Әԝед сийари гьһиштьнә Ԛәйсәрийе, нәʼмә данә ԝәли, Паԝлос жи данә дәсте ԝи.

³⁴ Әԝи әԝ нәʼмә хԝәнд, пьрси жь кʼижан ԛәзайе йә, кӧ пе һʼәсийа жь Киликйайе йә,

³⁵ гот: «Әзе һьнге гӧһдарийа тә бькьм, кʼәнге шькийаткьред тә бен». У әʼмьр кьр, кӧ әԝ ԛәсьра Һеродәсда бе хԝәйкьрьне.