شُله رسولا 20 - Пәймана Ну (Инщил)

Паԝлос дьчә бәрбь Мәкәдонйайе у Йунаньстане

¹ Гава ԛалмә-ԛалм сәԛьрʼи, Паԝлос гази шагьрта кьр, дьл да ԝан у хатьре хԝә жь ԝан хԝәст, рʼабу чу Мәкәдонйайе.

² Ль ԝан алийа гәрʼийа, бь гәләк готьна дьл данә ԝан. Паше чу Йунаньстане,

³ ԝәкә се мәһа ль ԝьр дәрбаз кьр. Гава кʼаре хԝә дькьр кӧ бьчуйа Сурйайе, щьһуйа бона ԝи шеԝьрәкә мьхәнәтийе кьр, әԝ жи фькьри Мәкәдонйайева вәгәрʼә.

⁴ Тʼәви ԝи жь Бәройайе Сопатройе кӧрʼе Пиро, жь Тʼесалонике Әристархо у Секундо, Гайосе жь Дербе у Тимотʼейо, жь ԛәза Асйайе Тьхико у Трофимо чун.

⁵ Әвана пешийа мә чунә Тройайе, ль ԝьр һивийа мә бун.

⁶ Әм жи пәй рʼожед Щәжьна Нане Шкәварʼа бь гәмийе жь Филипйайе чун, пенщ рʼожада гьһиштьнә Тройайе, щәм ԝан. Әм ԝьр һʼәфт рʼожа ман.

Сахбуна Әйтухо Тройайеда

⁷ Рʼожа һʼәфтийейә пешьн әм бона нанкәркьрьне щьвийайи бун, Паԝлос кӧ ԝе рʼожа дьн бьчуйа, ԝанарʼа хәбәр дьда у һʼәта ниве шәве хәбәрдана хԝә дьреж кьр.

⁸ Әԝ ода әм теда щьвийайи бун, гәләк чʼьра теда һәбун.

⁹ Хортәк жи наве ԝи Әйтухо, сәр пʼәнщәре рʼуньшти дьһеньжи у кʼәтә хәԝа кʼур. У гава Паԝлос хәбәрдана хԝә дьреж дькьр, әԝ хәԝа кʼурда жь ԛате сьсийа жорда кʼәт у мьрити әԝ һьлдан.

¹⁰ Паԝлос пәйайи жере бу, хԝә авитә сәр ԝи, да һʼәмеза хԝә у гот: «Хԝә ӧнда нәкьн, чьмки рʼӧһʼе ԝи ԝида йә».

¹¹ Паше һьлкʼьшийа һат, нан кәркьр хԝар у һʼәта сьбәһе дьреж хәбәр да у рʼабу чу.

¹² Хорт жи сах-сьламәт анинә мал, беһʼәсаб дьл һатә бәр ԝан.

Жь Тройайе бәрбь Миләтосе

¹³ Әм чун кʼәтьнә гәмийе рʼекʼәтьн у бәрбь Асосе чун, кӧ жь ԝе дәре мә гәрәке Паԝлос һьлда, чьмки әԝи мәрʼа готьбу: «Әзе пәйа бем».

¹⁴ Гава ль Асосе рʼасти мә һат, мә әԝ һьлда чунә Мьтулане.

¹⁵ Жь ԝьр жи әм чун, рʼожа дьне гьһиштьнә пешбәри Хийайе, рʼожтьра дьн гьһиштьнә Самосе, сьбәһтьра дьн жи гьһиштьнә Миләтосе.

¹⁶ Паԝлос нета хԝә данибу бь гәмийе бәр Әфәсерʼа дәрбаз буйа, кӧ нәбә ԝәхте хԝә ԛәза Асйайеда ӧнда кә, чьмки дьләзанд кӧ һәгәр жерʼа ль һәв бе, Рʼожа Пенщийә һʼәсаб әԝ ль Оршәлиме бә.

Паԝлос хатьре хԝә жь бәрпьрсийаред щьвина Әфәсе дьхԝазә

¹⁷ Жь Миләтосе мәри шандә Әфәсе у гази бәрпьрсийаред щьвине кьрьн.

¹⁸ Гава әԝ һатьнә щәм ԝи, ԝанрʼа гот: «Һун хԝәха заньн ԝе рʼожа пешьнда гава мьн ньге хԝә авитә ԛәза Асйайе, һʼәта ньһа ԝәрʼа чаԝа бумә.

¹⁹ Мьн Хӧданрʼа тʼам шкәсти бь гәләк һесьра, нава ԝан щерʼьбандьнада ԛӧльх кьрийә, кʼижан кӧ жь шеԝьред щьһуйа дьһатьнә сәре мьн,

²⁰ Һун заньн кӧ мьн тʼӧ щар хԝә жь тьштед керһатийә бона ԝә нәдайә паш, ле һʼәму ԝәрʼа готьнә у ашкәрә мал бь мал һун һин кьрьнә.

²¹ Мьн бь мәʼрифәти һьн һиви жь щьһуйа, һьн жи жь нәщьһуйа кьр, кӧ вәгәрʼьнә бәрбь Хԝәде у баԝәрийа хԝә Хӧдане мә Иса биньн.

²² У ва әз бьн дәсте Рʼӧһʼе Пирозда дьчьмә Оршәлиме, ԝьр ԝе чь бе сәре мьн, әз ньзаньм.

²³ Тʼәне Рʼӧһʼе Пироз һʼәму бажарида тʼәмийе дьдә мьн у дьбежә кӧ: ‹Ԛәйд у тәнгаси пешийа тә нә›.

²⁴ Ле әз әʼмьре хԝә лайиԛи тʼӧ тьшти накьм, тʼәне дькьм бьгьһижьмә мәрәме хԝә у ԝе ԛӧльха кӧ мьн жь Хӧдан Иса стандийә биньмә сери, аԝа готи Мьзгинийа кʼәрәма Хԝәде бь мәʼрифәти даннасин кьм.

²⁵ Ньһа әз заньм иди һун һʼәмуйед кӧ әз нав ԝәда гәрʼийамә у Пʼадшатийа Хԝәде даннасин кьрийә рʼуйе мьн набиньн.

²⁶ Бона ве йәке әз рʼожа иройин ль бәр ԝә шәʼдәтийе дьдьм, кӧ щабдаре хуна ԝә тʼӧ кәси ниньм,

²⁷ чьмки мьн хԝә нәда паш, тʼәмамийа ԛьрара Хԝәде ԝәрʼа гот.

²⁸ Ньһа мьԛати хԝә у тʼәмамийа ԝи кәре пез бьн, кӧ Рʼӧһʼе Пироз һун сәр бәрпьрсийар кʼьфш кьрьнә. Шьвантийе щьвина Хԝәде бькьн, йа кӧ Ԝи бь хуна Хԝә ԛазьнщ кьр.

²⁹ Әз заньм пәй чуйина мьнрʼа гӧред дәвхун ԝе бькʼәвьнә нава ԝә у һʼәйфа ԝан ԝе кери нәйе.

³⁰ Жь нава ԝәда жи мәрьве дәрен у тьштед хельф ԝе хәбәр дьн, кӧ шагьрта пәй хԝә бьбьн.

³¹ Бона ве йәке һʼьшйар бьминьн у бир нәкьн, кӧ мьн һун һәр кәс, се сала шәв у рʼож бе рʼьһʼәти бь һесьра ширәт кьрьнә.

³² Ньһа әз ԝә дьсперьмә Хԝәде у Хәбәра кʼәрәма Ԝи, кӧ дькарә ԝә рʼӧһʼанийеда ава кә у пʼара ԝә тʼәви тʼәмамийа щьмәʼта Хԝә кә.

³³ Мьн һавьжийа хԝә зерʼ, зив у кʼьнще тʼӧ кәси нәанийә.

³⁴ Һун хԝәха заньн әз у йед тʼәви мьн әм һʼәԝще чь жи бунә, әв дәстед мьн хәбьтинә.

³⁵ Мьн пе һʼәму шьхӧлед хԝә нишани ԝә кьрийә, кӧ чаԝа гәрәке бьхәбьтьн кʼомәке бьдьнә кʼәтийа у хәбәра Хӧдан Иса бир биньн кӧ гот: ‹Хԝәзи ль дайийа, нә кӧ ль стандийа›».

³⁶ Гава әв йәк гот, тʼәви һʼәмуйа чок да дӧа кьр.

³⁷ Һʼәму жи гәләки гьрийан, хԝә авитьнә стуйе Паԝлос у рʼамусан.

³⁸ Дьлед ԝан һе зедә бона ԝе хәбәра ԝи дьшәԝьти кӧ гот: «Һун иди рʼуйе мьн набиньн». Паше әԝ һʼәта гәмийе вәрʼекьрьн.