شُله رسولا 19 - Пәймана Ну (Инщил)

Паԝлос Әфәседа

¹ Гава Аполо һе Корьнтʼеда бу, Паԝлос щийе жорьнрʼа дәрбаз бу бәржери Әфәсе бу у ль ԝьр чәнд шагьрт дитьн

² у жь ԝан пьрси: «Гава ԝә баԝәр кьр, ԝә Рʼӧһʼе Пироз станд?» Ԝана гот: «Мә ԛәт нәбьһистийә жи кӧ Рʼӧһʼе Пироз һәйә».

³ Әԝи ԝанрʼа гот: «Ле һун бь чь һатьнә ньхӧмандьне?» Ԝана гот: «Бь ньхӧмандьна Йуһʼәнна».

⁴ Паԝлос гот: «Йуһʼәнна бона гӧнәвәгәрʼандьне ньхӧманд у щьмәʼтерʼа гот: ‹Йе кӧ пәй мьнрʼа те баԝәрийа хԝә Ԝи биньн›, аԝа готи Иса».

⁵ Гава әв йәк бьһистьн, бь наве Хӧдан Иса һатьнә ньхӧмандьне.

⁶ У гава Паԝлос дәстед хԝә данинә сәр ԝан, Рʼӧһʼе Пироз һатә сәр ԝан, бь зьмана хәбәр дан у пʼехәмбәрти кьрьн.

⁷ Әвана ԝәкә донздәһ мәрийа бун.

⁸ Паԝлос кʼәтә кʼьниште, се мәһа меркʼими хәбәр дьда, бона Пʼадшатийа Хԝәде ԝанрʼа дькʼәтә хәбәрдане у әԝ дьданә баԝәркьрьне.

⁹ Ле гава һьнәкә сәрһʼьшк мьԛабьл дәркʼәтьн у ль бәр щьмәʼте Рʼийа Хӧдан беһӧрмәт дькьрьн, Паԝлос жь ԝан ԛәтийа, шагьрт башԛә кьрьн у һәр рʼож дәрсхана Тиранода ԝанрʼа дькʼәтә хәбәрдане.

¹⁰ Әве йәке дӧ сала кʼьшанд, һʼәта кӧ һʼәму щьһу у йунанед кӧ ԛәза Асйайеда дьман, Хәбәра Хӧдан бьһистьн.

Һәр һʼәфт кӧрʼед Скеԝа

¹¹ Хԝәде бь дәсте Паԝлос гәләк кʼәрәмәтед зор дькьрьн,

¹² һʼәта кӧ әԝ дәстмал у шалькед кӧ Паԝлос ле дькʼәтьн нәхԝәшарʼа дьбьрьн, әԝ ԛәнщ дьбун у рʼӧһʼед хьраб дәрдькʼәтьн.

¹³ Чәнд щьһуйед гәрʼок һәбун кӧ хԝә дабунә щьндәрхьстьне, ԝан дькьр кӧ сәр йед кӧ рʼӧһʼед хьраб нава ԝанда һәбун, пе наве Хӧдан Иса бәри ԝан дьн у дьготьн: «Әм пе ԝи Исайе кӧ Паԝлос даннасин дькә бәри ԝә дьдьн».

¹⁴ Әва йәка һәр һʼәфт кӧрʼед Скеԝайе сәрәккʼаһинәки щьһуйа дькьрьн.

¹⁵ Щарәке рʼӧһʼе хьраб ль ԝан вәгәрʼанд у гот: «Әз Иса нас дькьм, бона Паԝлос жи заньм, ле һун кʼи нә?»

¹⁶ Һьнге әԝ мәрьве кӧ рʼӧһʼе хьраб теда бу, банзда сәр ԝан, ԛәԝата ԝи ԝан һʼәмуйада чу әԝ ӧса кʼӧтан, ԝәки әԝ жь ԝе мале тәʼзи у бьриндар рʼәвин.

¹⁷ Бона ве йәке һʼәму щьһу у йунанед кӧ Әфәседа дьман пе һʼәсийан. Тьрс кʼәтә сәр ԝан һʼәмуйа у наве Хӧдан Иса бьльнд дьбу.

¹⁸ Гәләк баԝәрмәнд жи дьһатьн гӧнед хԝә дьданә рʼуйе хԝә у кьред хԝә дьготьн.

¹⁹ Йед сербазийева жи кӧ мьжул дьбун, гәләка кʼьтебед хԝә тʼоп дькьрьнә щики у ль бәр һʼәмуйа дьшәԝьтандьн. Ԛимәте ԝан һʼәсаб кьрьн, пенщи һʼәзар зив дәркʼәт.

²⁰ Бь ви аԝайи Хәбәра Хӧдан бь зорайи һе пешда дьчу у ԛәԝат дьбу.

Шәрʼ-дәʼԝа Әфәседа

²¹ Гава әв тьшт бун, Паԝлос ԛьрар кьр кӧ Мәкәдонйайе у Ахайайева дәрбаз бә һәрʼә Оршәлиме у гот: «Пәй чуйина ԝьрарʼа гәрәке әз һәрʼьм Рʼоме жи бьбиньм».

²² Әԝи дӧ кʼомәкдаред хԝә Тимотʼейо у Ерасто шандьнә Мәкәдонйайе у әԝ һьнәки жи ль ԛәза Асйайе ма.

²³ Ԝан чахада бона Рʼийа Хӧдан гәләки шәрʼ-дәʼԝ пешда һат.

²⁴ Йәки зивкәр һәбу наве ԝи Димитрийо. Әви пʼарьстгәһед хԝәдейа наве ԝе Артәмис щурʼе йа әʼдәтида бь зив бьчʼук чедькьрьн у гәләк кʼар һостарʼа дани.

²⁵ Әԝи гази ԝан һʼәму һоста, ӧса жи йед мина хԝәйийе ви пʼешәйи кьрьн у гот: «Гәли һәвала! Һун заньн кӧ кʼара мә ви шьхӧлида йә.

²⁶ Һун жи дьбьһен у дьбиньн кӧ әви Паԝлоси нә кӧ тʼәне Әфәседа, ле баԝәрийа ԝә һәбә тʼәмамийа ԛәза Асйайеда жи сәре гәләк щьмәʼта тʼьжи кьрийә жь рʼе дәрхьстийә у дьбежә: ‹Әԝ хԝәдейед кӧ бь дәста чекьри нә, әԝ нә хԝәде нә›.

²⁷ Зийана ԝе нә тʼәне әԝ ә кӧ пʼеше мә те беһӧрмәткьрьне, ле пʼарьстгәһа Артәмис хԝәдейа мәзьн ԝе бәр тьштәки нәйе һʼәсабе у ԝе ԛәдьре мәзьнайийа ԝе бькʼәвә, йа кӧ һʼәму ԛәза Асйа у дьнйа дьһʼәбинә».

²⁸ Гава әв йәк бьһистьн, бь кʼин-бох тʼьжи бун, дькьрьнә ԛирʼин у дьготьн: «Артәмиса әфәсийа мәзьн ә!»

²⁹ Тʼәмамийа бажер ԛьлԛьли, рʼаһьштә Гайос у Әристархойе мәкәдони, кӧ һәвал-рʼейед Паԝлос бун, һәврʼа рʼәвинә дитьндаре.

³⁰ Паԝлос жи хԝәст кӧ бькʼәвә нава ԝе әʼлаләте, ле шагьрта нәһьшт.

³¹ Жь һьнәк сәрԝеред ԛәза Асйайе жи кӧ достед ԝи бун, мәри шандьнә щәм ԝи у һиви же кьрьн, кӧ нәчә дитьндаре.

³² Һәма ԝи ԝәхтида һьнәка щурʼәки, һьнәка жи щурʼәки дьн дькьрьнә ԛирʼин, чьмки кʼомбуна ԝан тʼәвиһәвбуйи бу, гәләка жи ньзаньбу әԝ бона чь жи щьвийанә.

³³ Һьнәка жь әʼлаләте Скәндәр пешда бьрьн, чьмки щьһуйа әԝ пешда дәʼф дан. Скәндәр дәсте хԝә бьльнд кьр, хԝәст щаба хԝә бьдә.

³⁴ Ле гава пе һʼәсийан кӧ әԝ щьһу йә, һʼәмуйа бь дәнгәки ԝәкә дӧ сьһʼәта кьрьнә ԛирʼин: «Артәмиса әфәсийа мәзьн ә!»

³⁵ Паше кʼатьбе бажер әʼлаләт сәԛьрʼанд у гот: «Гәли әфәсийа! Кʼи ньзанә кӧ бажаре Әфәсе хԝәйитийе пʼарьстгәһа Артәмиса мәзьн дькә, йа кӧ кәвьре ԝейи пироз жь әʼзмен һатийә хԝаре?

³⁶ Чаԝа ве йәкеда кӧ тьштәки хельф тʼӧнә, ләма жи гәрәке һун хԝә рʼьһʼәт хԝәй кьн у тьштәки бь бәрзәԛийе нәкьн.

³⁷ Ԝә әв мәрьвана анинә вьра, әвана нә тʼаланкьред пʼарьстгәһе нә у нә жи хԝәдейа мә беһӧрмәт кьрьнә.

³⁸ Аԝа һәгәр шькийате Димитрийо у һостайед тʼәви ԝи сәр йәки һәйә, бьра һәрʼьнә диԝанхане, һʼакьм һәнә. Ль ԝьр әԝ дькарьн шькийате хԝә һәвдӧ бькьн.

³⁹ Ле һәгәр хԝәстьна ԝә бона тьштәки дьн ә, бьра щьватәкә әʼдәтида бе леньһерʼандьне.

⁴⁰ Чьмки зийана мә жи ве йәкеда һәйә у бона шәрʼе иройин әме бенә нәһәԛкьрьне у мәʼник тʼӧнә, кӧ әм пе бькарьбьн бона ве кʼомбуне щаба хԝә бьдьн».

⁴¹ Гава әв йәк гот, щьват бәла кьр.