شُله رسولا 16 - Пәймана Ну (Инщил)

Тимотʼейо һәвалтийе Паԝлос у Силасрʼа дькә

¹ Һьнге Паԝлос һатә Дербе у Листрайе. Ль ԝьр шагьртәк һәбу наве ԝи Тимотʼейо, кӧрʼе кʼӧлфәтәкә щьһуйә баԝәрмәнд бу, ле баве ԝи йунан бу.

² Баԝәрмәндед Листрайе у Ԛонйайе һьндава ԝида ԛәнщ хәбәр дьдан.

³ Паԝлос хԝәст ԝи тʼәви хԝә бьбә у бона ԝан щьһуйед ԝан дәра гьрт әԝ сьнәт кьр, чьмки һʼәмуйа жи заньбу кӧ баве ԝи йунан ә.

⁴ Гава бажарарʼа дәрбаз дьбун, әԝ тʼәмийед кӧ шандийа у бәрпьрсийаред Оршәлиме ԛьрар кьрьбун, дьданә баԝәрмәнда кӧ хԝәй кьн.

⁵ Аԝа щьвин жи баԝәрийеда дьшьдийан у рʼож бь рʼож һʼәсабе ԝан зедә дьбу.

Мәкәдони хәԝнеда гази Паԝлос дькьн

⁶ Нава синоред Фьригйа у Галатйайеда гәрʼийан, чьмки Рʼӧһʼе Пироз нәһьшт кӧ ԛәза Асйайеда хәбәра Хԝәде бежьн.

⁷ Гава незики Мисйайе бун, кьрьн кӧ һәрʼьнә Битенйайе, ле Рʼӧһʼе Иса изьн нәда ԝан

⁸ у бәр Мисйайева дәрбаз бун бәржер чунә Тройайе.

⁹ Шәв Паԝлос дитьнокеда бәр чʼәʼве хԝә дит, йәки мәкәдони сәкьни бу һиви жь ԝи дькьр у дьгот: «Ԝәрә Мәкәдонйайе али мә бькә».

¹⁰ Гава ԝи әԝ дитьнок дит, мә дәстхԝәда хԝәст кӧ һәрʼьнә Мәкәдонйайе. Мә фәʼм кьр, кӧ Хԝәде мә дьшинә ԝьр, ԝәки Мьзгинийе бьдьнә ԝан.

Филипйайеда Лидйа бәрбь Хӧдан вәдьгәрʼә

¹¹ Әм жь Тройайе бь гәмийе дәркʼәтьн рʼаст чунә Самотрахе, рʼожа дьне Нейаполисе.

¹² Жь ԝьр жи чунә Филипйайе, бажарәки нәʼйийа Мәкәдонйайейи әʼйан, ӧса жи кӧ бажарәки Рʼомайе йә. Ԝи бажарида әм чәнд рʼожа ман.

¹³ Рʼожа шәмийе әм жь дәргәһе бажер дәркʼәтьн чунә дәве чʼем, әԝ дәр чаԝа әм дьфькьрин, щийе дӧа бу. Мә рʼуньшти тʼәви кʼӧлфәтед щьвийайи хәбәр дьда,

¹⁴ кʼӧлфәтәкә хԝәдебаԝәр жь бажаре Тийатирайе, наве ԝе Лидйа кӧ кʼьнщед ширк дьфьротьн, гӧһдари дькьр. Хӧдан дьле ԝе вәкьр кӧ гӧһ бьдә готьнед Паԝлос.

¹⁵ Гава әԝ нәфәред хԝәва пе аве һатьнә ньхӧмандьне, һиви жь мә кьр у гот: «Һәгәр һун мьн баԝәрмәнда Хӧдан һʼәсаб дькьн, кʼәрәм кьнә мала мьн, ль ԝьр бьминьн». У зор ль мә кьр әм бьрьн.

Паԝлос у Силас бажаре Филипйайеда тенә гьртьне

¹⁶ Щарәке әм дьчунә щийе дӧакьрьне, щарик рʼасти мә һат, кӧ рʼӧһʼе кʼочʼәктийе перʼа бу, әве бь ԝе кʼочʼәктийе хԝәйед хԝәрʼа пʼьрʼ кʼар дани.

¹⁷ Әва пәй Паԝлос у мә кʼәтьбу, дькьрә ԛирʼин у дьгот: «Әв мәрьвана хӧламед Хԝәдейе Һәри Жорьн ьн, кӧ ԝәрʼа бона рʼийа хьлазбуне даннасин дькьн!»

¹⁸ Әв йәка әԝе гәләк рʼожа дькьр, һʼәта кӧ Паԝлос ащьз бу, вәгәрʼийа у ԝи рʼӧһʼирʼа гот: «Бь наве Иса Мәсиһ әʼмьри тә дькьм жь ԝе дәре!» У перʼа-перʼа әԝ жь ԝе дәркʼәт.

¹⁹ Гава хԝәйед ԝе дитьн кӧ гӧмана кʼара ԝан һатә бьрʼине, Паԝлос у Силас гьртьн, кʼаши мәйдана бажер щәм сәрԝера кьрьн,

²⁰ әԝ бьрьнә бәр сәрдаред Рʼомайе у готьн: «Әв мәрьвана щьһу нә у бажаре мә тʼәвиһәв дькьн.

²¹ Әʼдәте ӧса мә бажарванед Рʼомайе һин дькьн, кӧ нә мәрʼа щайиз ә ԛәбул кьн, нә жи бькьн».

²² Әʼлаләте һʼьщуми сәр ԝан кьр, сәрдара жи кʼьнщед сәр ԝан ԛәлаштьн у әʼмьр кьрьн кӧ ԝан бьдьнә бәр шьва.

²³ Пәй гәләк леданерʼа авитьнә кәле у әʼмьри сәрԝере кәле кьрьн, кӧ рʼьнд мьԛатийе ԝан бькә.

²⁴ Әԝи кӧ әв әʼмьр станд, әԝ авитьнә зьндане у ньгед ԝан ԛәйдада шьдандьн.

²⁵ Незики ниве шәве Паԝлос у Силас дӧа дькьрьн у әшԛи Хԝәде дьстьран, гьртийа жи гӧһе хԝә данибунә сәр ԝан.

²⁶ Ньшкева әʼрд ԛайим һʼәжийа, һʼәта кӧ һʼимед кәле жи чун-һатьн, дәстхԝәда һʼәму дәри вәбун, ԛәйд-зьнщиред һʼәмуйа һатьнә вәкьрьне.

²⁷ Гава сәрԝере кәле һʼьшйар бу у дәред кәле вәкьри дитьн, шур кʼьшанд кӧ хԝә бькӧжә, чьмки ԝи тʼьре гьрти рʼәвинә.

²⁸ Ле Паԝлос бь дәнге бьльнд кьрә гази у гот: «Тʼӧ зийане нәдә әʼмьре хԝә, әм һʼәму жи вьра нә!»

²⁹ Әԝи чʼьра хԝәст, рʼәви һьндӧрʼ, ләрьзи хԝә авитә бәр Паԝлос у Силас.

³⁰ Әԝ дәрхьстьн у гот: «Әз хӧлам! Әз чь гәрәке бькьм кӧ хьлаз бьм?»

³¹ Ԝана жи гот: «Баԝәрийа хԝә Хӧдан Иса бинә, те нәфәред хԝәва хьлаз би».

³² Һьнге хәбәра Хӧдан ԝи у ԝан һʼәмуйарʼа готьн, йед кӧ мала ԝида бун.

³³ Һәма ԝе шәве сәрԝере кәле әԝ бьрьн, бьринед ԝан шуштьн у перʼа-перʼа әԝ нәфәред хԝәва пе аве һатьнә ньхӧмандьне.

³⁴ Әԝ анинә мала хԝә, сьфрә ль бәр ԝан дани у тʼәмамийа нәфәред хԝәва ша бун, кӧ баԝәрийа хԝә Хԝәде анин.

³⁵ Гава сьбәһ сафи бу, сәрдара запьдед хԝә шандьн у готьн: «Ԝан мәрьва бәрʼдә».

³⁶ Сәрԝере кәле әв йәк Паԝлосрʼа гот: «Сәрдар мәри шандьнә ԝәки һун бенә бәрʼдане. Ньһа рʼабьн бь хер у сьламәт һәрʼьн».

³⁷ Ле Паԝлос ԝанрʼа гот: «Әм, бажарванед Рʼомайе, бе диԝан бь щьмәʼти данә бәр шьва авитьнә кәле! У ньһа дьхԝазьн бь дьзива мә дәрхьн? На, әв йәк набә, бьра хԝәха бен мә дәрхьн».

³⁸ Запьда әв хәбәрана гиһандьнә сәрдара. Гава кӧ бьһистьн әԝ бажарванед Рʼомайе нә, тьрсийан

³⁹ һатьн хԝә авитьнә ԝан, паше әԝ дәрхьстьн у һиви кьрьн кӧ жь бажаре ԝан һәрʼьн.

⁴⁰ Әԝ жи жь кәле дәркʼәтьн чунә мала Лидйайе, ль ԝьр хушк-бьра дитьн, дьл данә ԝан у паше рʼекʼәтьн чун.