شُله رسولا 15 - Пәймана Ну (Инщил)

Шеԝьра щьвина Оршәлимеда

¹ Һьнәк жь Щьһустане бәржери Әнтакйайе бьбун у бьра һин дькьрьн дьготьн: «Һәгәр һун ль гора әʼдәте Муса нәйенә сьнәткьрьне, һун хьлаз набьн».

² Нава ԝан у Паԝлос, Барнабасда гәләк дәʼԝ-доз пешда һат, һьнге бьра ԛьрар кьр кӧ бона ве пьрсе Паԝлос у Барнабас, ӧса жи жь ԝан чәнд кәс һәвраз һәрʼьнә Оршәлиме, щәм шанди у бәрпьрсийара.

³ Щьвине кӧ әԝ вәрʼекьрьн, әԝана Финикйе у Самәрйайева дәрбаз бун у һʼәму баԝәрмәндарʼа бона вәгәрʼандьна нәщьһуйа гьли дькьрьн, бь ве йәке әԝ гәләки ша кьрьн.

⁴ Гава гьһиштьнә Оршәлиме, щьвине, шандийа у бәрпьрсийара әԝ ԛәбул кьрьн у чь кӧ Хԝәде тʼәви ԝан кьрьбу ԝанрʼа гьли кьрьн.

⁵ Ле һьнәк баԝәрмәндед жь кʼомәла ферьсийа рʼабун готьн: «Гәрәке ван сьнәт кьн у ԝанарʼа бежьн, кӧ Ԛануна Муса хԝәй кьн».

⁶ Шанди у бәрпьрсийар щьвийан, кӧ бона ве йәке бьшеԝьрьн.

⁷ Пәй гәләк дәʼԝ-дозерʼа Пәтрус рʼабу сәр пʼийа у ԝанрʼа гот: «Гәли бьра! Һун хԝәха заньн кӧ Хԝәде рʼожед пешьнда әз нав ԝәда бьжартьм, кӧ нәщьһу хәбәра Мьзгинийе жь дәве мьн бьбьһен у баԝәр бькьн.

⁸ Хԝәдейе кӧ дьла занә да избаткьрьне, кӧ нәщьһу жи Ԝива ԛәбул ьн, гава Рʼӧһʼе Пироз да ԝан жи, чаԝа да мә.

⁹ Нава мә у ԝанда тʼӧ фьрԛи данәни, бь баԝәрийе дьле ԝан паԛьж кьр.

¹⁰ Иди чьма һун Хԝәде дьщерʼьбиньн, нирәки ӧса датиньнә сәр стуйе шагьрта, кӧ нә кал-бавед мә карьбунә бьбьн, нә жи мә?

¹¹ Әв йәк аһа набә, ле әм баԝәр дькьн, кӧ чаԝа әм бь кʼәрәма Хӧдан Иса хьлаз дьбьн, ӧса жи әԝ».

¹² Һьнге тʼәмамийа щьвате дәнге хԝә бьрʼи у гӧһе хԝә данә сәр готьнед Барнабас у Паԝлос кӧ Хԝәде бь дәстед ԝан чьԛас нишан у кʼәрәмәт нава нәщьһуйада кьрьбун.

¹³ Гава әԝана кәрʼ бун, Аԛуб дәнг һьлда у гот: «Гәли бьра! Гӧһ бьдьнә мьн.

¹⁴ Шьмһʼун гьли кьр, кӧ чаԝа пешийе Хԝәде рʼәʼма Хԝә ль нәщьһуйа кьрьбу, кӧ жь нава ԝан щьмәʼтәке дәрхә, ԝәки наве Ԝи һьлдьнә сәр хԝә.

¹⁵ Ве йәкерʼа готьнед пʼехәмбәра жи ль һәв дьгьрьн, чаԝа ньвисар ә:

¹⁶ ‹Жь вьр шунда Әзе вәгәрʼьм, коне Даԝьди кʼәти диса вәгьрьм, чи ԝи жи кӧ хьраб буйә Әзе чекьм у ԝи диса бьдьмә рʼагьртьне,

¹⁷ ԝәки һʼәрче мәрьвед майин у һʼәму нәщьһуйед кӧ наве Мьн сәр ԝан ә, ль Хӧдан бьгәрʼьн.

¹⁸ Әԝ Хӧдане кӧ ван тьшта һе жь дәԝред бәреда әʼйан кьрийә дьбежә›.

¹⁹ Бона ве йәке жи әз аһа рʼе терʼа дьбиньм кӧ әм зәʼмәте нәдьнә әԝед кӧ жь нәщьһуйа бәрбь Хԝәде тен,

²⁰ ле әм нәʼмәке ԝанрʼа бьньвисьн, кӧ һʼәвза хԝә жь ԝан ԛӧрбанед кӧ пʼутарʼа тенә дайине бькьн, ӧса жи жь бенамусийе, гоште мьрар у хуне.

²¹ Фәʼмдари йә кӧ һе ԛӧрʼнед дәрбазбуйида Ԛануна Муса һәр бажарида те һинкьрьне у һʼәму рʼожед шәмийа кʼьништада ԝе дьхуньн».

Щабдайина щьвина Оршәлиме

²² Һьнге ль шандийа, бәрпьрсийара у тʼәмамийа щьвине хԝәш һат, кӧ жь нава хԝәда чәнд мәрьва бьбьжерьн у тʼәви Паԝлос у Барнабас бьшиньнә Әнтакйайе. Әв бун йед кӧ һатьнә шандьне: Щьһудайе кӧ жерʼа дьготьн Барсабо у Силас. Нава баԝәрмәндада әвана әʼйан бун.

²³ Бь дәсте ԝан әв нәʼмә шандьн аһа ньвисар: «Әм бьрайед ԝәйә шанди у бәрпьрсийар сьлава ль ԝә бьрайед жь нәщьһуйайә Әнтакйайе, Сурйайе у Киликйайе дькьн.

²⁴ Мә бьһистийә кӧ жь нава мә һьнәк дәркʼәтьнә, кӧ мә хԝәха тʼәми нәданә ԝан, ле ԝан бь хәбәред хԝә зәʼмәт данә ԝә у фькьред ԝә тʼәвиһәв кьрьнә.

²⁵ Бона ве йәке ль тʼәмамийа шеԝьра щьвина мә хԝәш һат, кӧ әм мәрьва бьбьжерьн тʼәви бьрайед мәйә дәлал Барнабас у Паԝлос бьшиньнә щәм ԝә,

²⁶ йед кӧ әʼмьре хԝә данә наве Хӧдане мә Иса Мәсиһ.

²⁷ Аԝа әм Щьһуда у Силас дьшиньн, ԝәки әԝ жи ван тьшта бь дәве хԝә ԝәрʼа бежьн.

²⁸ Ль Рʼӧһʼе Пироз хԝәш һат, ӧса жи ль мә, кӧ тʼӧ бари нәдьнә сәр мьле ԝә, пештьри ван тьштед һʼәԝщә:

²⁹ Дури ԛӧрбанед пʼута, хуне, мьрарийе у бенамусийе бьн. Һәгәр һун хԝә жь ван тьшта хԝәй кьн, ԛәнщ ә. Һун хԝәш бьн, дә ма хатьре ԝә».

³⁰ Һьнге әԝ вәрʼекьрьн, бәржер чунә Әнтакйайе щьмәʼт щьвандьн, нәʼмә данә ԝан.

³¹ Гава хԝәндьн, бона ԝе дьлдайине пʼьрʼ ша бун.

³² Щьһуда у Силас жи кӧ пʼехәмбәр бун, бь гәләк хәбәра дьл данә баԝәрмәнда у әԝ шьдандьн.

^33-34 Гәләк ԝәхт ль ԝьр ман, паше баԝәрмәнда әԝ бь хер у сьламәт пашда шандьнә щәм ԝан, йед кӧ әԝ шандьбун.

³⁵ Паԝлос у Барнабас жи Әнтакйайеда дьман, тʼәви гәләкед майин хәбәра Хӧдан һин дькьрьн у даннасин дькьрьн.

Рʼеԝитийа Паԝлосә дӧда (15:36–18:22) Паԝлос у Барнабас жь һәвдӧ дьԛәтьн

³⁶ Чәнд рʼожа шунда Паԝлос готә Барнабас: «Ԝәрә әм вәгәрʼьн сәрики бьдьнә ԝан хушк-бьра, кʼижанарʼа мә һʼәму бажарада хәбәра Хӧдан даннасин кьрийә, дина хԝә бьдьне кʼа һʼале ԝан чаԝа йә».

³⁷ Барнабас дьхԝәст Йуһʼәннайе кӧ жерʼа Марԛос дьготьн жи тʼәви хԝә бьбьрана,

³⁸ ле Паԝлос рʼе терʼа нәдьдит, йе Памфилйайеда жь ԝан ԛәтийа у тʼәви ԝан шьхӧл нәкьр тʼәви хԝә бьбьрана.

³⁹ Һьнге йа ԝан ль һәв нәгьрт, әв бу мәʼни жь һәв ԛәтийан. Барнабас Марԛос һьлда бь гәмийе чу Ԛӧбрьсе,

⁴⁰ Паԝлос жи Силас бьжарт у жь бьра спарти кʼәрәма Хӧдан бун, рʼекʼәтьн чун.

⁴¹ Ль Сурйайе у Киликйайе дьгәрʼийан, щьвин дьшьдандьн.