شُله رسولا 14 - Пәймана Ну (Инщил)

Паԝлос у Барнабас бажаре Ԛонйайеда

¹ Ԛонйайеда жи әв йәк мина һәр щар ԛәԝьми: Паԝлос у Барнабас кʼәтьнә кʼьништа щьһуйа, ӧса хәбәр дан, ԝәки әʼлаләтәкә гьран жь щьһу у нәщьһуйа баԝәр кьрьн.

² Ле щьһуйед кӧ баԝәр нәкьрьн дьле нәщьһуйа ԛьлԛьландьн у рʼакьрьнә мьԛабьли бьра.

³ Аԝа әԝана гәләк ԝәхт ль ԝьр ман, меркʼими сәр Хӧдан хәбәр дьдан, Хӧдан жи хәбәра кʼәрәма Хԝә избат дькьр, бь дәстед ԝан нишан у кʼәрәмәт дьданә кьрьне.

⁴ Ле дӧтирәти кʼәтә бажер, һьнәк ль алийе щьһуйа бун, һьнәк жи ль алийе шандийа.

⁵ Һьнге һьнәкә жь нәщьһуйа у щьһуйа тʼәви сәрԝеред хԝә ԛьрар кьрьн кӧ ԝан беһӧрмәт кьн у бьдьнә бәр кәвьра,

⁶ ле әԝ пе һʼәсийан рʼәвинә Листрайе у Дербе, бажаред Лукайонйа, ӧса жи дор-бәред ԝан.

⁷ У ль ԝан дәра Мьзгини дьдан.

Паԝлос у Барнабас Листра у Дербеда

⁸ Листрайеда йәки жь зькмакийеда ньгада шьлушәʼт рʼуньшти бу, кӧ тʼӧ щара нәгәрʼийабу.

⁹ Әԝи жи гӧһдарийа Паԝлос дькьр, Паԝлос ль ԝи ньһерʼи у гава дит баԝәрийа ԝи бона ԛәнщбуне һәйә,

¹⁰ бь дәнге бьльнд готе: «Рʼабә сәр ньгед хԝә рʼаст бьсәкьнә!» Әԝи жи банзда сәр хԝә, дәстпекьр гәрʼийа.

¹¹ Әʼлаләте гава кьрьна Паԝлос дит, дәнге хԝә һьлдан бь лукайони готьн: «Хԝәде дьлԛе инсенда һатьнә хԝаре щәм мә!»

¹² Барнабасрʼа Зәԝс готьн, Паԝлосрʼа жи Һәрмес, чьмки хәбәрданеда йе пеш әԝ бу.

¹³ Кʼаһине Зәԝсе кӧ пʼарьстгәһа ԝи ль пешбәри бажер бу, га бь кʼофийава анинә бәр дәргәһ, хԝәст кӧ тʼәви әʼлаләте шандийарʼа бькә ԛӧрбан.

¹⁴ Ле гава шандийа, Барнабас у Паԝлосва әв йәк бьһист, кʼьнщед хԝә ԛәлаштьн у рʼәвинә нава әʼлаләте, кьрьнә гази у готьн:

¹⁵ «Әʼвдно! Һун чьма ве йәке дькьн? Әм жи бьнйатʼа хԝәда мәринә мина ԝә нә, Мьзгинийе дьдьнә ԝә, кӧ һун жь ԝан тьштед пʼучʼ вәгәрʼьн бәрбь Хԝәдейе сах бен, Йе кӧ әʼрд у әʼзман, бәʼр у һʼәмуйед нава ԝанда әʼфьрандийә.

¹⁶ Әԝи зәмане бьһӧрида һьшт кӧ һәр мьләт рʼийа хԝәда һәрʼә.

¹⁷ Ле Хԝәха Хԝә бе шәʼдәти нәһьшт, ԛәнщи ԝәрʼа кьр, жь әʼзмен баран баранд, рʼәз жи дәмсалада данә ԝә, бь хӧрәква һун тʼер кьрьн у шабун жи кьрә дьле ԝә».

¹⁸ Бь ван готьна ԝана бь зорәке әʼлаләт зәфт кьр, кӧ ԛӧрбана бона ԝан нәдьн.

¹⁹ Һьнге жь Әнтакйайе у Ԛонйайе щьһу һатьн, әʼлаләт данә алийе хԝә, Паԝлос данә бәр кәвьра, жь бажер кʼаши дәр кьрьн, ԝан тʼьре мьрийә.

²⁰ Ле гава шагьрта дора ԝи гьрт, әԝ рʼабу кʼәтә бажер у рʼожа дьне тʼәви Барнабас рʼабу чу Дербе.

Паԝлос у Барнабас вәдьгәрʼьнә Әнтакйайа ԛәза Сурйайе

²¹ Ԝана кӧ ԝи бажарида Мьзгини дан у гәләк кьрьнә шагьрт, вәгәрʼийанә Листрайе, Ԛонйайе у Әнтакйайе.

²² Дьле шагьрта дьшьдандьн у дьл дьданә ԝан, кӧ баԝәрийеда бьминьн у дьготьн: «Гәрәке әм бь гәләк щәфакʼьшандьне бькʼәвьнә Пʼадшатийа Хԝәде».

²³ Ԝана бона һәр щьвинәке бәрпьрсийар кʼьфш кьрьн, бь рʼожи дӧа кьрьн у әԝ спартьнә ԝи Хӧдане кӧ баԝәрийа хԝә же анибун.

²⁴ Әԝ нава Пьсидйайерʼа дәрбаз бун, паше һатьнә Памфилйайе.

²⁵ Пәргеда жи хәбәра Хԝәде даннасин кьрьн, бәржер чунә Әнталйайе.

²⁶ Жь ԝьр жи бь гәмийе чунә Әнтакйайе, ԝи щийе кӧ спарти кʼәрәма Хԝәде бьбун бона ԝи шьхӧле кӧ сәр һәвда анин.

²⁷ Гава һатьн, щьвин ль һәв щьвандьн у ԝанрʼа гьли кьрьн, кӧ Хԝәде тʼәви ԝан чь тьшт кьрьнә у чаԝа дәргәһе баԝәрийе бәр нәщьһуйа жи вәкьр.

²⁸ Ль ԝьр гәләк ԝәхт тʼәви шагьрта ман.