شُله رسولا 13 - Пәймана Ну (Инщил)

Рʼӧһʼе Пироз Паԝлос у Барнабас дьшинә

¹ Щьвина Әнтакйайеда чәнд пʼехәмбәр у дәрсдар һәбун, Барнабас, Шьмһʼуне кӧ жерʼа Нигер дьготьн, Лукйойе жь Курене, Мәнайине кӧ тʼәви Һеродәсе сәрԝер мәзьн бьбу у Шаԝул.

² Әвана кӧ нава һʼәбандьна Хӧданда бун у рʼожи дьгьртьн, Рʼӧһʼе Пироз ԝанрʼа гот: «Барнабас у Шаԝул Мьнрʼа бона ԝи шьхӧле кӧ Мьн гази ԝан кьрийә щӧдә кьн».

³ Ԝи чахи рʼожи гьртьн, дӧа кьрьн, дәстед хԝә данинә сәр ԝан у әԝ шандьн.

Шанди гьрава Ԛӧбрьседа Мьзгинийе дьдьн

⁴ Аԝа әвана кӧ жь Рʼӧһʼе Пироз һатьнә шандьне, бәржери Селукйайе бун у жь ԝьр бь гәмийе дәрбази Ԛӧбрьсе бун.

⁵ Гава гьһиштьнә Сәламисе, кʼьништед щьһуйада хәбәра Хԝәде даннасин дькьрьн у Йуһʼәнна жи кʼомәкдаре ԝан бу.

⁶ Әԝ тʼәмамийа ԝе гьраве гәрʼийан, гьһиштьнә һʼәта Пафосе. Ль ԝьр пʼехәмбәрәки щьһуйайи дәрәԝ у сербаз дитьн кӧ наве ԝи Барйешу бу.

⁷ Әва йәки жь бәрдәстийед Сәргийо Паԝлосе ԝәли бу. Сәргийо Паԝлос жи мәрьвәки аԛьл бу, әви гази Барнабас у Шаԝул кьр, кӧ хәбәра Хԝәде бьбьһе.

⁸ Ле Барйешуйе сербаз, аԝа готи бь йунани Елумас, мьԛабьли ԝан рʼабу у дькьр кӧ ԝәли жь баԝәрийе бьхальфинә.

⁹ Һьнге Шаԝуле кӧ жерʼа Паԝлос жи дьбежьн, бь Рʼӧһʼе Пироз тʼьжи ль ԝи сербази ньһерʼи

¹⁰ у готе: «Һәй мьхәнәто у һʼәму фелбазийава тʼьжийо! Щәԝрьке мирещьн! Дьжмьне тʼәмамийа рʼастийе! Те һʼәта кʼәнге тʼәрка хальфандьна рʼийед Хӧданә рʼаст нәки?

¹¹ Ва дәсте Хӧдан ньһа ԝе сәр тә гьран бә, те кор би у дәмәке тәʼве нәбини». У дәстхԝәда мьж у думан һатә сәр ԝи, вьрда-ԝеда дькʼәт рʼебәр дьхԝәстьн.

¹² Ԝи чахи ԝәли кӧ әв йәк дит, баԝәр кьр, сәр ԝе һинкьрьна бона Хӧдан әʼщебмайи ма.

Паԝлос у Барнабас ль бажаре Әнтакйа ԛәза Пьсидйайе

¹³ Һьнге Паԝлос һәвалед хԝәва бь гәмийе жь Пафосе рʼекʼәтьн һатьнә Пәргейа Памфилйайе. Йуһʼәнна ль ԝьр жь ԝан ԛәтийа, вәгәрʼийа Оршәлиме.

¹⁴ Әԝана жи жь Пәрге чунә Әнтакйа Пьсидйайе, рʼожа шәмийе кʼәтьнә кʼьниште рʼуньштьн.

¹⁵ Пәй хԝәндьна Ԛанун у ньвисаред пʼехәмбәрарʼа сәрԝеред кʼьниште йәк шандьнә щәм ԝан у готьн: «Гәли бьра, һәгәр готьнәкә ԝә һәйә кӧ дьл бьдьнә щьмәʼте, кʼәрәм кьн бежьн».

¹⁶ Паԝлос рʼабу, дәсте хԝә һʼәжанд у гот: «Гәли щьмәʼта Исраеле у нәщьһуйед кӧ жь Хԝәде дьтьрсьн гӧһдар бьн!

¹⁷ Хԝәдейе ви мьләте Исраеле кал-бавед мә бьжартьн у мьләт ль ԝәлате Мьсьре хәрибийеда зедә кьр. Бь дәсте зор әԝ жь ԝьр дәрхьстьн,

¹⁸ чьл сали бәрʼийеда ль ԝан сәбьр кьр.

¹⁹ Ԝәлате Кәнанеда кʼока һʼәфт мьләта ани, әʼрде ԝан чаԝа щи-ԝар да щьмәʼта Хԝә.

²⁰ Һʼәта һьнге чарсьд пенщи сал дәрбаз бу. Жь ԝьр шунда һʼакьм данә ԝан һʼәта һена Самуел пʼехәмбәр.

²¹ Паше пʼадша хԝәстьн, Хԝәде чьл сали йәки жь әʼшира Бьнйамин, Шаԝуле кӧрʼе Кис да ԝан.

²² Гава әԝ авит, Даԝьд сәр ԝан кьрә пʼадша, кӧ бона ԝи шәʼдәти да у гот: ‹Мьн Даԝьде Йеша мәрик дьле Хԝәрʼа дит, ԝе хԝәстьна Мьн гьшки бинә сери›.

²³ Жь зӧрʼәта ԝи Хԝәде анәгори созе Хԝә Исраелрʼа Хьлазкьрәк рʼакьр, һәма хут Иса.

²⁴ Бәри һатьна Ԝи, пешийе Йуһʼәнна тʼәмамийа мьләте Исраелерʼа даннасин кьр, кӧ жь гӧнәкьрьне вәгәрʼьн у бенә ньхӧмандьне.

²⁵ Гава Йуһʼәнна шьхӧле хԝә сәр һәвда ани, гот: ‹Һун бона мьн чаԝа дьфькьрьн, әз кʼи мә? Әз нә Әԝ ьм, бона кʼижани һун дьфькьрьн. Ле ва йә Әԝ пәй мьн те, кӧ әз нә һежа мә бәне чарьхед ньгед Ԝи вәкьм›.

²⁶ Гәли бьра, зарʼед хун-ԛьнета Бьраһим у нәщьһуйед нава ԝәдайә кӧ жь Хԝәде дьтьрсьн, мәрʼа әв хәбәра кӧ пе хьлаз дьбьн һатә шандьне.

²⁷ Бьнәлийед Оршәлиме у сәрԝеред ԝан Иса чаԝа Хьлазкьр нас нәкьрьн, ле гава диԝана Ԝи кьрьн, готьнед пʼехәмбәрайә кӧ һәр шәми дьхуньн анинә сери.

²⁸ Нәһәԛийа бона кӧштьне жи сәр Ԝи нәдитьн, ле диса һиви жь Пилато кьрьн кӧ Ԝи бьдә кӧштьне.

²⁹ Гава һәр тьштед кӧ бона Ԝи ньвисар бун анинә сери, жь дар анинә хԝаре кьрьнә тʼьрбе.

³⁰ Ле Хԝәде Әԝ жь мьрьне рʼакьр

³¹ у гәләк рʼожа Хԝә ԝанва да хӧйакьрьне, кʼижан жь Щәлиле тʼәви Ԝи һатьбунә Оршәлиме. Ньһа жи әԝ ль бәр щьмәʼте шәʼдед Ԝи нә.

³² У әм ве Мьзгинийе дьдьнә ԝә: Чь кӧ Хԝәде кал-бавед мәрʼа соз дабу,

³³ Әԝи бона мә кьр, аԝа готи зарʼед ԝанрʼа, гава Иса жь мьрьне рʼакьр. Чаԝа Зәбура дӧдада жи ньвисар ә: ‹Тӧ Кӧрʼе Мьн и, Тӧ иро Мьнрʼа буйи›.

³⁴ Бона ве йәке кӧ Әԝ жь мьрьне рʼакьр у иди Әԝ тʼӧ щар нарʼьзә, Хԝәде аһа готийә: ‹Әзе ԝан дӧа-дьрозгед пирозә амьн у Даԝьдрʼа создайи сәр ԝәда бьбариньм›.

³⁵ Зәбурәкә дьнда жи дьбежә: ‹Тӧ наһели Пирозе Тә бьрʼьзә›.

³⁶ Бәле Даԝьд зәмане хԝәда ԛьрара Хԝәдерʼа хӧламти кьр мьр у гьһиштә пешийед хԝә, бәдәна ԝи рʼьзи.

³⁷ Ле Әԝе кӧ Хԝәде жь мьрьне рʼакьр нәрʼьзи.

³⁸ Ньһа бьра әв йәк ԝәва әʼйан бә, гәли бьра, кӧ бь сайа Иса ԝәрʼа бона бахшандьна гӧна те даннасинкьрьне. У жь ԝан һәр тьштед кӧ һун бь Ԛануна Муса нькарьбун бесущ буна,

³⁹ ньһа кʼи кӧ баԝәрийа хԝә Иса бинә ԝе бесущ бә.

⁴⁰ Һаш жь хԝә һәбьн, нәбә әв тьште кӧ пʼехәмбәра готийә бе сәре ԝә:

⁴¹ ‹Бьньһерʼьн кʼӧбар-бабахно, әʼщебмайи бьн у бәтавәбьн, чьмки Әзе рʼожед ԝәда кьрәки бькьм, кьрәки ӧса, кӧ йәк ԝәрʼа бежә жи һуне баԝәр нәкьн›».

⁴² Гава Барнабас у Паԝлос жь ԝьр дәркʼәтьн, һиви жь ԝан кьрьн, кӧ шәмийа дьн жи бона ԝе йәке ԝанрʼа хәбәр дьн.

⁴³ Гава щьвина кʼьниште бәла бу, гәләк щьһу у жь нәщьһуйед кӧ һатьбунә сәр баԝәрийа щьһуйа пәй Паԝлос у Барнабас дьчун. Ԝанарʼа хәбәр дьдан у дьл дьданә ԝан, ԝәки тʼьме нава кʼәрәма Хԝәдеда бьминьн.

⁴⁴ Рʼожа шәмийа дьн незики тʼәмамийа бажер щьвийа, кӧ хәбәра Хӧдан бьбьһе.

⁴⁵ Гава щьһуйа әԝ әʼлаләт дит, жь һʼәвсудийе мьԛабьли готьнед Паԝлос сәкьнин у әԝ беһӧрмәт кьрьн.

⁴⁶ Һьнге Паԝлос у Барнабас меркʼими готьн: «Гәрәке пешийе хәбәра Хԝәде ԝәрʼа бьһата хәбәрдане, ле һун кӧ хәбәра Хԝәде тʼәхсир дькьн у хԝә лайиԛи жийина һʼәта-һʼәтайе накьн, ва әм вәдьгәрʼьнә бәрбь нәщьһуйа.

⁴⁷ Чьмки Хӧдан аһа әʼмьри мә кьр: ‹Мьн Тӧ кьри рʼонайа нәщьһуйа, ԝәки һʼәта сәре дьнйайе бьби мәщала хьлазбуне›».

⁴⁸ Гава йед нәщьһу әв йәк бьһистьн, ша бун шькьри дьданә готьна Хӧдан. У әԝед кӧ бона жийина һʼәта-һʼәтайе кʼьфшкьри бун, баԝәр кьрьн.

⁴⁹ Хәбәра Хӧдан тʼәмамийа ԝәлетда бәла бу.

⁵⁰ Ле щьһуйа һелан данә кʼӧлфәтед хԝәдебаԝәрә хԝәйиԛәдьр, тʼәви гьрәгьред бажер, мьԛабьли Паԝлос у Барнабас рʼакьрьн у жь синоред хԝә дәрхьстьн.

⁵¹ Ԝана жи тʼоза ньгед хԝә сәр ԝанда даԝшанд, чунә Ԛонйайе

⁵² у шагьрт бь шабуне у Рʼӧһʼе Пирозва тʼьжи бун.