شُله رسولا 11 - Пәймана Ну (Инщил)

Пәтрус щьвина Оршәлимерʼа шьровәдькә кӧ чьма чубу мала йәки нәщьһу

¹ Шандийа у баԝәрмәндед алийе Щьһустанеда дьман, бьһистьн кӧ нәщьһуйа жи хәбәра Хԝәде ԛәбул кьрьнә.

² Гава Пәтрус һәвраз чу Оршәлиме, баԝәрмәндед әʼсьле хԝәда щьһу әԝ нәһәԛ дькьрьн у

³ дьготьн: «Тӧ чуйи щәм мәрьвед нәсьнәткьри у тә тʼәви ԝан нан хԝарийә!»

⁴ Һьнге Пәтрус дәстпекьр бь һур-гьли ԝанрʼа шьровәкьр у гот:

⁵ «Мьн бажаре Йафайеда дӧа дькьр, мина сьһʼәтәке сәр мьнрʼа дәрбаз бу. У мьн дитьнокеда ль бәр чʼәʼве хԝә дит, дәрданәкә мина дәстәхана мәзьн һәр чар гошава жь әʼзмен дардабу һатә хԝаре, ль бәр мьн сәкьни.

⁶ Әз һе зурʼ бьбум мьн ле дьньһерʼи, мьн дина хԝә дайе, ва нә һʼәйԝанед чарпʼе, рʼәʼԝьр, шулькийед әʼрде у тәйрәдед әʼзмен.

⁷ Һьнге мьн дәнгәк бьһист кӧ мьнрʼа гот: ‹Рʼабә Пәтрус, сәржекә у бьхԝә›.

⁸ Ле мьн гот: ‹Һʼаша жь мьн, Хӧдан, тʼӧ щар тьштәки һʼәрам йан пʼис нәкʼәтийә дәве мьн›.

⁹ Щара дӧда әԝи дәнги жь әʼзмен ль мьн вәгәрʼанд у гот: ‹Әԝ тьштед кӧ Хԝәде һʼәлал кьрийә, тӧ һʼәрам һʼәсаб нәкә›.

¹⁰ Әва йәка се щара ԛәԝьми у һәр тьшт пашда әʼзменва һатә кʼьшандьне.

¹¹ Һәма ԝи чахи се мәрийед кӧ жь Ԛәйсәрийе шандьбунә пәй мьн бәр мала кӧ әм теда дьман сәкьнин.

¹² Рʼӧһʼ мьнрʼа гот: ‹Тʼәви ԝан һәрʼә, дӧдьли нәбә›. Әв һәр шәш бьра жи тʼәви мьн һатьн у әм чунә мала ԝи мәрьви.

¹³ Әԝи мәрʼа гот, кӧ чаԝа мала хԝәда мьлйакʼәт дитийә, кӧ сәкьни йә ԝирʼа готийә: ‹Мәрийа бьшинә Йафайе у гази Шьмһʼун кә, йе кӧ жерʼа Пәтрус дьбежьн.

¹⁴ Әԝе тәрʼа ԝан готьна бежә, бь кʼижана те у тʼәмамийа нәфәред мала хԝәва хьлаз би›.

¹⁵ У мьн һәма дәст бь хәбәрдане кьр, Рʼӧһʼе Пироз һатә сәр ԝан, чаԝа пешийе һатә сәр мә.

¹⁶ Ԝи чахи һатә бира мьн әԝ хәбәра кӧ Хӧдан готьбу: ‹Йуһʼәнна бь аве ньхӧманд, ле һуне бь Рʼӧһʼе Пироз бенә ньхӧмандьне›.

¹⁷ Аԝа һәгәр Хԝәде хут әԝ пʼешкʼеш да ԝан, кʼижан да мә, гава мә баԝәрийа хԝә Хӧдан Иса Мәсиһ ани, әз кʼи бум кӧ мьԛабьли Хԝәде бьсәкьнийама?»

¹⁸ Гава кӧ әв йәка бьһистьн, дәнге хԝә бьрʼин, шькьри данә Хԝәде у готьн: «Ԝәки ӧса йә Хԝәде әва мәщала да нәщьһуйа жи, кӧ жь гӧнәкьрьне вәгәрʼьн у бьжин».

Баԝәрмәндед бажаре Әнтакйайе

¹⁹ Әԝед кӧ жь дәст ԝе зерандьна пәй кӧштьна Стәйфанрʼа бәла-бәлайи бьбун, гьһиштьнә һʼәта Финикйайе, Ԛӧбрьсе у Әнтакйайе у тʼәне щьһуйарʼа хәбәр даннасин дькьрьн.

²⁰ Ле нава ԝанда һьнәк жь мәрьвед Ԛӧбрьсе у Курене һәбун, кӧ гава чун кʼәтьнә Әнтакйайе, йунанарʼа жи хәбәр дьдан, Мьзгинийа Хӧдан Иса дьдан.

²¹ Дәсте Хӧдан ԝанрʼа бу, гәләка баԝәр кьр, бәрбь Хӧдан вәгәрʼийан.

²² Бона ԝан әв дәнг-бәʼса гьһиштә щьвина Оршәлиме, Барнабас шандьнә Әнтакйайе.

²³ Гава гьһиште у кʼәрәма Хԝәде дит, ша бу у дьл дьда ԝан һʼәмуйа кӧ бь тʼәмамийа дьле хԝәва Хӧданрʼа амьн бьминьн.

²⁴ Барнабас мәрьвәки ԛәнщ, Рʼӧһʼе Пироз у баԝәрийева тʼьжи бу. Гәләк щьмәʼт сәр баԝәрмәндед Хӧданда зедә бу.

²⁵ Һьнге Барнабас дәрбази Тарсусе бу, кӧ ль Шаԝул бьгәрʼә,

²⁶ әԝ дит ани Әнтакйайе. Әԝана һәврʼа тʼәмамийа саләке тʼәви щьвине дьщьвийан у гәләк щьмәʼт һин дькьрьн. Пешийе Әнтакйайеда шагьрт «мәсиһи» һатьнә навкьрьне.

²⁷ Ԝан рʼожа жь Оршәлиме пʼехәмбәр бәржери Әнтакйайе бун.

²⁸ Жь ԝан йәк, кӧ наве ԝи Һагабо бу, рʼабу бь Рʼӧһʼ әʼлам кьр, кӧ ԝе тʼәмамийа дьнйайеда бьбә хәлайикә гьран. У ӧса жи әва хәлайа һена Клаԝдйо Ԛәйсәрда бу.

²⁹ Һьнге шагьртед Әнтакйайе ԛьрар кьрьн кӧ жь дәсте кʼева чьԛас те аликʼарийе бона баԝәрмәндед Щьһустане бьшиньн.

³⁰ Ӧса жи кьрьн, бь дәсте Барнабас у Шаԝул бәрпьрсийаред щьвинерʼа шандьн.