یوحنا 1 4 - Пәймана Ну (Инщил)

Рʼӧһʼе рʼаст у рʼӧһʼе дәрәԝ

¹ Дәлално, баԝәрийа хԝә һәр рʼӧһʼи нәйньн, ле ԝан рʼӧһʼа бьщерʼьбиньн, гәло әԝ жь Хԝәде нә? Чьмки гәләк пʼехәмбәред дәрәԝ дәркʼәтьнә дьне.

² Һун бь ве йәке дькарьн Рʼӧһʼе Хԝәде нас бькьн: Һәр рʼӧһʼе кӧ Иса Мәсиһ бь хун у гошт һати иԛрар дькә, әԝ жь Хԝәде йә.

³ Ле һәр рʼӧһʼе кӧ Иса бь хун у гошт һати иԛрар накә, әԝ нә жь Хԝәде йә. Әв жь әкʼсимәсиһ ә, бона кʼижани ԝә бьһистьбу кӧ ԝе бе у иди әԝ ль дьнйайеда йә.

⁴ Һун жь Хԝәде нә, зарʼокно у һун сәр пʼехәмбәред дәрәԝ кʼәтьнә, чьмки Әԝ Рʼӧһʼе нава ԝәда жь ԝи рʼӧһʼе кӧ нава дьнйайеда йә мәстьр ә.

⁵ Әԝ жь дьнйайе нә, ләма әԝ жь дьнйайе хәбәр дьдьн у дьнйа гӧһдарийа ԝан дькә.

⁶ Әм жь Хԝәде нә. Йе кӧ Хԝәде нас дькә, әԝ гӧһдарийа мә дькә. Йе кӧ нә жь Хԝәде йә, әԝ гӧһдарийа мә накә. Бь ве йәке әм Рʼӧһʼе рʼастийе у рʼӧһʼе нәрʼастийе жь һәв дәрдьхьн.

Хԝәде һʼьзкьрьн ә

⁷ Дәлално, дә әм һәвдӧ һʼьз бькьн, чьмки һʼьзкьрьн жь Хԝәде йә у һәр кәсе кӧ һʼьз дькә әԝ жь Хԝәде буйә у Хԝәде нас дькә.

⁸ Йе кӧ һʼьз накә әԝ Хԝәде нас накә, чьмки Хԝәде һʼьзкьрьн ә.

⁹ Бь ве йәке һʼьзкьрьна Хԝәде һьндава мәда хӧйа бу, гава кӧ Әԝи Кӧрʼе Хԝәйи Тайе Тʼәне шандә дьнйайе, ԝәки әм бь Ԝи бьжин.

¹⁰ Һʼьзкьрьн әв ә, нә кӧ мә Хԝәде һʼьз кьр, ле Әԝи әм һʼьз кьрьн у Кӧрʼе Хԝә шанд чаԝа мәщала бахшандьна гӧнед мә.

¹¹ Дәлално, һәгәр Хԝәде аһа әм һʼьз кьрьн, ԝәки ӧса йә гәрәке әм жи һәвдӧ һʼьз бькьн.

¹² Тʼӧ кәси Хԝәде тʼӧ щара нә дитийә. Һәгәр әм һәвдӧ һʼьз дькьн, Хԝәде нава мәда дьминә у һʼьзкьрьна Ԝи дьле мәда гьһиштийә.

¹³ Бь ве йәке әм заньн кӧ әм нава Ԝида дьминьн у Әԝ жи нава мәда, чьмки Әԝи жь ԝи Рʼӧһʼе Хԝә дайә мә.

¹⁴ Мә дит у әм шәʼдәтийе дьдьн, кӧ Баве Кӧрʼе Хԝә шанд, ԝәки бьбә Хьлазкьре дьнйайе.

¹⁵ Һәгәр йәк иԛрар дькә кӧ Иса Кӧрʼе Хԝәде йә, Хԝәде нава ԝида дьминә у әԝ жи нава Хԝәдеда.

¹⁶ Аԝа әм ԝе һʼьзкьрьна Хԝәдейә һьндава хԝәда нас дькьн у баԝәр дькьн. Хԝәде һʼьзкьрьн ә у йе кӧ нава һʼьзкьрьнеда дьминә, әԝ нава Хԝәдеда дьминә у Хԝәде жи нава ԝида.

¹⁷ Һʼьзкьрьн аһа дьле мәда гьһиштийә, ԝәки Рʼожа Ахрәте әм рʼусьпи бьн, чьмки Мәсиһ ве дьнйайеда чаԝа дәрбаз кьр, ӧса жи әм дәрбаз дькьн.

¹⁸ Һʼьзкьрьнеда тьрс тʼӧнә, ле һʼьзкьрьна гьһишти тьрсе дур дьхә, чьмки тьрс хԝәйищәфа йә у әԝе кӧ дьтьрсә, әԝ һʼьзкьрьнеда һе нәгьһиштийә.

¹⁹ Әм һʼьз дькьн, чьмки Әԝи пешда әм һʼьзкьрьн.

²⁰ Һәгәр йәк бежә: «Әз Хԝәде һʼьз дькьм», ле бьре ԝи бәр чʼәʼва рʼәш ә, әԝ дәрәԝа дькә. Һәгәр әԝе бьре хԝә кӧ дьбинә һʼьз накә, әԝ нькарә Хԝәде һʼьз бькә кӧ набинә.

²¹ У Әԝи әв тʼәми дайә мә: Әԝе кӧ Хԝәде һʼьз дькә, әԝ гәрәке бьре хԝә жи һʼьз бькә.