یوحنا 1 3 - Пәймана Ну (Инщил)

¹ Бьньһерʼьн, Баве әм чаԝа һʼьз кьрьн, ԝәки әм зарʼед Хԝәде бенә готьне у рʼаст жи әм әԝ ьн. Ләма дьнйа мә нас накә, чьмки әԝ жи нас нәкьр.

² Дәлално, ньһа әм зарʼед Хԝәде нә у һәла һе нә әʼйан ә әме бьбьнә чь. Ле әм ве йәке заньн кӧ чахе Иса әʼйан бә, әме бьбьнә мина Ԝи, чьмки әме Ԝи ӧса бьбиньн, чаԝа һәйә.

³ Һәр кәсе кӧ бона ве йәке гӧмана хԝә данийә сәр Ԝи, әԝ хԝә ӧса паԛьж дькә, чаԝа кӧ Мәсиһ паԛьж ә.

⁴ Һәр кәсе кӧ гӧнә дькә, әԝ Ԛануна Хԝәде дьтʼәрʼьбинә у гӧнә хут ԛанунтʼәрʼьбандьн ә.

⁵ У һун заньн кӧ Мәсиһ бона ԝе йәке әʼйан бу, ԝәки гӧна һьлдә у нава Ԝида гӧнә тʼӧнә.

⁶ Һәр кәсе кӧ нава Ԝида дьминә, әԝ нава гӧнада наминә, ле һәр кәсе кӧ нава гӧнада дьминә, әԝи нә Әԝ дитийә, нә жи нас кьрийә.

⁷ Зарʼокно, бьра тʼӧ кәс ԝә нәхапинә. Йе кӧ рʼастийе дькә, әԝ йәки рʼаст ә, чаԝа Иса рʼаст ә.

⁸ Йе нава гӧнада дьминә, әԝ жь мирещьн ә, чьмки мирещьн жь бәре пешда гӧнә дькә. Бона ве йәке Кӧрʼе Хԝәде әʼйан бу, ԝәки кьред мирещьн хьраб кә.

⁹ Һәр кәсе кӧ жь Хԝәде буйә, нава гӧнада наминә, чьмки бьнйатʼа Хԝәде нава ԝида дьминә у әԝ нькарә нава гӧнада бьминә, чьмки жь Хԝәде буйә.

¹⁰ Зарʼед Хԝәде у зарʼед мирещьн бь ве йәке жь һәв тенә фьрԛикьрьне: Әԝе кӧ рʼастийе накә, әԝ нә жь Хԝәде йә у ӧса жи әԝе кӧ бьре хԝә һʼьз накә.

Һәвдӧ һʼьзкьрьн у рʼуспитийа ль бәр Хԝәде

¹¹ Әв ә әԝ готьн, йа кӧ ԝә бәре пешда бьһистийә: Гәрәке әм һәвдӧ һʼьз бькьн.

¹² Мина Ԛайин нибьн, кӧ жь йе Хьраб бу у бьре хԝә кӧшт. У бона чь әԝ кӧшт? Чьмки кьред ԝи хьраб бун, ле йед бьре ԝи ԛәнщ.

¹³ Әʼщебмайи нәминьн гәли хушк-бьра, һәгәр һун бәр чʼәʼве дьнйайе рʼәш бьн.

¹⁴ Әм заньн кӧ әм жь мьрьне дәрбази жийине бунә, чьмки әм хушк-бьрайед хԝә һʼьз дькьн. Әԝе кӧ һʼьз накә, әԝ нава мьрьнеда дьминә.

¹⁵ Һәр кәсе кӧ бьре ԝи бәр чʼәʼва рʼәш ә, әԝ меркӧж ә у һун заньн кӧ нава тʼӧ меркӧжида жийина һʼәта-һʼәтайе тʼӧнә.

¹⁶ Әм бь ве йәке һʼьзкьрьне һʼәсийан: Иса жийина Хԝә бона мә да. Әм жи гәрәке жийина хԝә бона хушк-бьрайед хԝә бьдьн.

¹⁷ Ле һәгәр һәбука йәки ве дьне һәбә у бьре хԝә һʼәԝще тьштәки дьбинә, дьле ԝи сәр нашәԝьтә, һʼьзкьрьна Хԝәде чаԝа дькарә дьле ԝида бьминә?

¹⁸ Зарʼокно, нә кӧ әм бь хәбәр йан заре хԝә һʼьз бькьн, ле бь кьра у рʼастийе.

¹⁹ Бь ве йәке әме заньбьн кӧ әм жь рʼастийе нә у бькарьбьн бь дьләки рʼьһʼәт бәр Хԝәде бьсәкьньн.

²⁰ Ле һәгәр дьле мә диса мә нәһәԛ кә, Хԝәде жь дьле мә мәстьр ә у һәр тьшти занә.

²¹ Дәлално, һәгәр дьле мә мә нәһәԛ нәкә, әм дькарьн рʼусьпи бәр Хԝәде бьсәкьньн.

²² У чь кӧ бьхԝазьн, әме жь Ԝи бьстиньн, чьмки әм тʼәмийед Ԝи дьԛәдиньн у әԝ тьштед кӧ ль Ԝи хԝәш тен, әм ԝан дькьн.

²³ У әв ә тʼәмийа Ԝи, кӧ әм баԝәрийа хԝә наве Кӧрʼе Ԝи Иса Мәсиһ биньн у әм һәвдӧ һʼьз бькьн, чаԝа кӧ Әԝи тʼәми ль мә кьр.

²⁴ У әԝе кӧ тʼәмийед Ԝи хԝәй дькә, нава Хԝәдеда дьминә у Хԝәде жи нава ԝида. У әм жь ве йәке заньн кӧ Әԝ нава мәда дьминә, бь ԝи Рʼӧһʼе кӧ Әԝи дайә мә.