Zenez 33 - Kreol Morisyen OT Portions

Zakob zwenn Ezai

¹ Zakob lev lizie e li trouv Ezai pe vini avek 400 zom. Li diviz so bann zanfan ant Lea, Rasel ek de servant la.

² Li fer de servant la ek zot bann zanfan mars divan. Lea ek so bann zanfan omilie e Rasel ek Zozef net deryer.

³ Zakob mars par divan zot tou. Li prostern li set fwa ziska ki li zwenn so frer.

⁴ Me Ezai galoupe vinn zwenn Zakob. Li may so likou e li anbras li. Lerla, toulede plore.

⁵ Kan Ezai lev latet, li trouv bann madam ek bann zanfan pe vini. Li dimann Zakob: “Ki sannla sa bann dimoun ki pe akonpagn twa la?” Zakob reponn: “Bann zanfan ki Bondie finn akord mwa, to serviter.”

⁶ Anmemtan, bann servant ek zot bann zanfan arive. Zot prostern divan Ezai.

⁷ Apre sa, Lea ek so bann zanfan arive e zot fer parey. Rasel ek Zozef ariv andernie e zot osi prosterne.

⁸ Lerla, Ezai dimann Zakob: “Kifer to finn avoy tou sa bann troupo ki mo finn zwenn lor sime la?” Zakob reponn: “Mo finn avoy sa pou gagn to faver, mo segner.”

⁹ Me Ezai dir li: “Momem mo ena ase, mo frer. Gard seki pou twa.”

¹⁰ Zakob reponn: “Non, mo sipliy twa. Si vremem to finn pardonn mwa, aksepte mo kado. Kan mo finn zwenn twa, koumadir mo finn zwenn Bondie, telman to finn akeyir mwa ek enn gran bonte.

¹¹ Fer mwa plezir, aksepte mo kado. Bondie finn beni mwa, e mo ena tou seki mo bizin.” Zakob kontigne insiste. Finalman, Ezai aksepte so kado.

¹² Lerla, Ezai dir: “Anou repran larout. Mo pou akonpagn twa.”

¹³ Me Zakob reponn: “Mo segner, to kone ki bann zanfan frel. Anplis, mo bizin okip bann zanimo ki ankor tete ek zot mama. Si zot mars tro boukou dan enn zourne, zot pou mor.

¹⁴ Ale twa, mo segner. Mwa, mo pou pran letan ki bizin akoz mo bann troupo ek mo bann zanfan, ziska mo zwenn twa dan Seir.”

¹⁵ Ezai dir li: “Les mo kit de-trwa mo bann zom avek twa.” Me Zakob reponn: “Pa gagn traka, li pa neseser. To lakey deza enn gran zafer pou mwa.”

¹⁶ Alor, Ezai pran larout pou retourn kot li dan Seir.

¹⁷ Me Zakob al Soukot. Li fer aranz enn lakaz laba. Li fer aranz osi bann park lapay pou so troupo. Akoz sa, li apel sa landrwa la Soukot, seki vedir Kabann.

Zakob ariv Sikem

¹⁸ Zakob finn fer enn vwayaz depi Padann-Aram. Li ariv sin e sof dan Sikem, enn lavil dan pei Kanaan. Li kanpe pre ar lavil.

¹⁹ Sa terin kot li pe kanpe la pou bann zanfan Amor, fondater Sikem. Li aste terin la avek zot pou 100 pies larzan.

²⁰ Li aranz enn lotel dan sa landrwa la e li apel li El-Elohe-Israel.