Zenez 1 - Kreol Morisyen OT Portions

1 Bondie kre liniver

¹ Dan komansman, Bondie kre lesiel ek later.

² Later pena enn zoli form e li vid. Teneb kouver partou. Lespri Bondie pe plane lor dilo.

³ Lerla Bondie dir: “Mo oule ki lalimier paret!” Vremem, lalimier koumans briye.

⁴ Bondie trouv ki lalimier enn bon kitsoz. Li separ lalimier ek teneb.

⁵ Li apel lalimier “lizour” ek teneb “lanwit”. Aswar fer, apre sa gramatin swiv. Samem premie zour.

⁶ Bondie dir: “Mo oule kre enn gran plafon omilie dilo. Li pou separ dilo ki anba ek dilo ki lao.”

⁷ Sa arive. Bondie kre sa gran plafon la pou separ dilo ki anba ek dilo ki lao.

⁸ Bondie apel sa gran plafon la “lesiel”. Aswar fer, apre sa gramatin swiv. Samem deziem zour.

⁹ Bondie dir ankor: “Mo oule ki tou dilo ki anba lesiel rasanble dan enn sel plas. Les bann terin sek paret.” Sa arive.

¹⁰ Bondie apel bann terin sek “later”. Li apel dilo ki finn rasanble ansam “lamer”. Bondie trouv sa bon.

¹¹ Bondie dir: “Mo oule ki later prodwir bann verdir. Bizin ena bann plant ek bann pie fri. Sakenn bizin ena so semans.” Sa arive.

¹² Later prodwir bann verdir. Ena tou kalite plant, e tou kalite pie-fri. Sakenn ena so semans. Bondie trouv tousala bon.

¹³ Aswar fer, apre sa gramatin swiv. Samem trwaziem zour.

¹⁴ Bondie dir: “Mo oule kre bann lalimier dan lesiel pou separ lizour ek lanwit. Bann lalimier la pou fer kone kan zour fet. Zot pou fer osi konn dat ek lane.

¹⁵ Bann lalimier la bizin briye dan lesiel pou ekler later.” Samem arive.

¹⁶ Bondie kre de gro lalimier. Pli gro la pou eklere lizour, e pli tipti la pou eklere aswar. Li kre osi bann zetwal.

¹⁷ Bondie plas zot dan lesiel pou ekler later.

¹⁸ Ena eklere lizour, ena eklere aswar, e zot separ lalimier ek teneb. Bondie trouve sa bon.

¹⁹ Aswar fer, apre sa gramatin swiv. Sa mem katriyem zour.

²⁰ Bondie dir: “Mo oule ki lamer ranpli ar tou kalite kreatir vivan. Mo oule kre bann zwazo pou anvol dan lezer.”

²¹ Alor, Bondie kre bann gran mons marin ek tou bann kreatir ki deplas par group dan dilo. Li kre osi tou kalite zwazo. Bondie trouve sa bon.

²² Bondie beni zot, e li dir : “Gagn boukou piti e ranpli lamer.” E li donn lord bann zwazo pou ogmante lor later.

²³ Aswar fer, apre sa gramatin swiv. Samem sinkiem zour.

²⁴ Bondie dir: “Mo oule ki later prodwir tou kalite kreatir vivan: bann zanimo domestik, bann ti bebet ek bann zanimo sovaz. Sakenn dapre so lespes.” Sa arive.

²⁵ Bondie kre tou kalite zanimo sovaz, zanimo domestik, bann ti bebet ek reptil; sakenn dapre so lespes. Bondie trouv sa bon.

²⁶ Lerla Bondie dir: “Anou kre bann imin dan nou limaz ek dan nou resanblans. Zot ava ena lotorite lor bann pwason dan lamer ek bann zwazo dan lezer. Zot ava ena lotorite osi lor bann zanimo domestik, bann zanimo sovaz, ek tou bann bebet ek reptil ki viv lor later.”

²⁷ Alor, Bondie kre bann imin dan so resanblans, li kre zot dan resanblans Bondie, li kre zot, Zom ek Fam.

²⁸ Bondie beni zot e li dir zot: “Fer zanfan, peple e ranpli later, e metriz li. Bann pwason dan lamer, bann zwazo dan lezer ek tou bann zanimo ki viv lor later pou bizin soumet divan zot.”

²⁹ Bondie dir ankor: “Mo pe donn zot bann plant avek sakenn so semans partou lor later. Mo pe donn zot osi bann pie ki zot fri ena lagrin ouswa lwayo. Servi tousala pou zot nouritir.

³⁰ Me bann zanimo, bann zwazo, ek tou bann bebet ki ena lavi lor later pou gagn feyaz pou manze.” Samem arive.

³¹ Bondie get tou seki li finn kre, e vremem tou bien bon. Aswar fer, apre sa gramatin swiv. Samem siziem zour.