Psom 94 - Kreol Morisyen OT Portions

Bondie Ziz siprem

¹ SEGNER, to enn Bondie ki pini; twa, Bondie ki pini, revel tomem!

² Twa ki ziz lemond, lev twa, donn bann vantar seki zot merite.

³ O SEGNER, komie letan ankor bann azan lemal, komie letan ankor bann azan lemal pou fer zot fanor?

⁴ Zot devers enn ta parol ar arogans, bann kriminel koz zot krim ar fierte.

⁵ Zot dominn lepep, SEGNER, zot kraz to pep ki to patrimwann.

⁶ Zot touy vev ek bann etranze, zot asasinn bann orfelin.

⁷ Zot dir for-for, “Bondie kaylous; Bondie Izrael pa remarke seki pe pase.”

⁸ Kouma zot bet koumsa? Bann inbesil, kan zot pou konpran?

⁹ Dapre zot, Bondie finn kree zorey me li pa tande? Li‘nn kree lizie me li pa trouv kler?

¹⁰ Li kriye ar bann nasion me li pa pou pini zot? Limem pli gran profeser me li pa konn nannye?

¹¹ LESEGNER kone ki plan ena dan zot latet; li bien okouran ki zot pa vo nannye.

¹² SEGNER, zot bienere bann ki resevwar to disiplinn; zot bien saz bann ki aprann to lalwa.

¹³ Zot viv dan lape mem kan difikilte partou ziska ki to prepar enn piez pou may bann ki viv par lemal.

¹⁴ LESEGNER zame pou abandonn so pep; zame li pa pou fer tret ar so dimoun.

¹⁵ Lazistis pou regne dan lakour e dimoun drwat pou soutenir drwatir.

¹⁶ Kisannla ti defann mwa kont bann azan lemal? Kisannla ti dibout ar mwa kont bann ki fer lemal?

¹⁷ Si LESEGNER pa ti soutenir mwa zordi mo ti pou dan lemond gran silans.

¹⁸ Ler mo ti dir, “Ayo, mo pe tonbe” To lamour infini, SEGNER, ti anpes mwa koule.

¹⁹ Sak fwa mo ena traka ek problem To konsol mwa pou mo regagn lazwa.

²⁰ To pa toler bann ziz koronpi ki fer inzistis vinn legal,

²¹ ki konplote kont dimoun ki viv drwat e avoy inosan dan koulwar lamor.

²² Me LESEGNER defann mwa kouma enn fortres; mo Bondie abrit mwa kouma enn rok protekter.

²³ Li pou pini bann ki viv dan lemal; Li pou detrir zot parski zot viv dan pese. LESEGNER nou Bondie pou detrir lemal.