Psom 92 - Kreol Morisyen OT Portions

Anou sant louanz Bondie

Enn Psom. Enn sante pou zour Saba.

¹ Li vremem bon dir LESEGNER mersi, pou sant louanz pou to nom, Bondie Pli Lao;

² ler toulegramatin mo proklam to lamour infini; mo deklar to fidelite touleswar,

³ akonpanye par lamizik mandolinn ek sitar, ar melodi lagitar.

⁴ Twa SEGNER, to ranpli mo leker ar to bann gran explwa. Akoz tou seki to finn fer, mo sante avek lazwa dan leker.

⁵ SEGNER, to bann explwa zot extra gran; to lespri li extra profon.

⁶ Sa, enn dimoun bet pa kapav sezi, tilespri zame pou konpran sa:

⁷ bann ki viv dan pese zot pouse kouma move lerb; bann ki finn swazir move sime zot kapav prospere me enn zour zot pou fini net.

⁸ Me twa, SEGNER, to siprem pou touzour.

⁹ Nou kone ki to bann ennmi, SEGNER, to bann ennmi pou perir, e bann dimoun ki pratik lemal pou disperse.

¹⁰ To finn donn mwa lafors enn lelefan; To finn kouronn mwa ar delwil parfime.

¹¹ Mo finn trouv defet mo bann ennmi; mo finn tann bann agreser plegne ar douler.

¹² Dimoun ki obeyir pou prospere kouma palmie; zot pou grandi kouma pie lafours.

¹³ Zot pou kouma bann pie dan verze LESEGNER ki raport zoli fri dan lakour Tanp nou Bondie,

¹⁴ ki kontign port fri dan zot vieyes e ki toultan ver ek for.

¹⁵ Tousala montre ki LESEGNER limem lazistis siprem, “li mo ranpar e dan li pena linzistis. “