Psom 89 - Kreol Morisyen OT Portions

Kantik pou letan dir

Instriksion Etann.

¹ SEGNER, mo pou touzour sant to lamour infini; mo pou servi mo lavwa pou proklam to fidelite ar zenerasion fitir.

² Mo kone ki to lamour infini li etabli pou toultan; ki to fidelite li eternel ek permanan kouma lesiel.

³ To ti dir, “Mo finn fer enn lalians ar enn dimoun ki mo finn swazir. Ala ki mo finn promet mo serviter David,

⁴ ‘Lor tronn pou ena toultan to desandan; dinasti David pou dire eternelman.‘”

⁵ Bann kreatir dan lesiel sant bann mervey ki to fer; bann anz dan zot lasanble sant to fidelite, O SEGNER.

⁶ Peyna personn dan lesiel ki kouma twa; parmi bann kreatir dan lesiel peyna ki konparab ar twa.

⁷ Tou kreatir lesiel per Bondie; zot tou respe Bondie ki redoutab.

⁸ SEGNER Bondie Toupwisan, personn peyna lafors kouma twa; to fidelite li toultan prezan, O SEGNER.

⁹ Se twa ki kontrol losean pwisan e zis twa ki kapav kalme lakoler bann vag.

¹⁰ Se twa ki ti kraz latet Raab kouma enn karkas; se to lafors san born ki ti fer to ennmi manz lapousier.

¹¹ Lesiel pou twa, later osi li pou twa; lemond e tou seki ena ladan - twa ki finn kree zot.

¹² To finn kree lenor, to finn kree lesid; Montagn Tabor ek Ermon sant to grander dan lazwa.

¹³ To pouvwar li bien gran, to lafors li san limit.

¹⁴ To rwayom finn konstrir lor drwatir ek lazistis; lamour ek fidelite prezan dan tou seki to fer.

¹⁵ Bienere bann ki priye twa ar zoli sante; bann ki viv dan lalimier to prezans, SEGNER.

¹⁶ Grasa twa zot viv lazwa toutlazourne, e zot redrese dan louanz akoz to lazistis.

¹⁷ Tomem ki donn zot laglwar par to pwisans; grasa to bonte ek to lamour nou finn gagn laviktwar.

¹⁸ O SEGNER, to finn swazir nou protekter; Bondie ki Sin ki Izrael adore, nou lerwa depann lor twa.

¹⁹ Dan enn vizion to ti dir bann profet “Mo finn donn pouvwar enn zom for; parmi lepep mo finn swazir enn lerwa.

²⁰ Mo finn met mo serviter David lor tronn e mo finn beni so latet ar delwil sakre.

²¹ Lafors mo lame pou toultan akonpagn li, pouvwar mo lebra pou rann li bien for.

²² So ennmi pa pou ena viktwar lor li; move dimoun pa pou kapav imilie li.

²³ Mo pou kraz so ennmi e detrir bann ki deteste li.

²⁴ Mo fidelite ek mo lamour infini pou avek li, me plis ki sa, li pou toultan sorti vinker akoz mo nom.

²⁵ Lotorite so lame pou lor bann lamer, lotorite so lame drwat pou lor tou larivier.

²⁶ Li pou dir mwa, ‘Tomem mo Papa, mo Bondie, mo protekter ek mo Sover.’

²⁷ Mo pou fer li vinn mo premie-garson, pli gran parmi bann pli gran lerwa.

²⁸ Mo pou toultan fidel anver li; mo pou respekte mo lalians ar li.

²⁹ So dinasti pou dire osi lontan ki ena lesiel; so desandan pou toultan asiz lor tronn.

³⁰ Me si so desandan dezobeyir mo lalwa; si zot abandonn mo instriksion;

³¹ si zot bliye mo lansegnman e pa respe mo bann komandman,

³² lerla mo pou fer zot peye pou zot pese. Mo pou fer zot soufer pou ditor ki zot finn fer.

³³ Pa krwar ki mo pou aret kontan David; ki mo pou kas promes mo fidelite.

³⁴ Non! Mo pa pou renie mo lalians ar li; Mo pa pou rezet okenn promes ki mo finn fer ar li.

³⁵ Promes ki mo finn fer li, lor mo nom sakre, zame mo pou fer fos ar David.

³⁶ So tronn pou toultan ena eritie; mo pou vey so rwayom tanki soley briye;

³⁷ tanki ena lalinn, touzour la, solid, enn temwin permanan dan lesiel.”

³⁸ Me to ankoler ar lerwa ki to finn swazir; to finn abandonn li, to finn les li tonbe.

³⁹ To finn kas lalians ar to serviter lwayal e to finn zet so kouronn dan labou.

⁴⁰ Miray so lavil finn grene; sitadel ek fortres anrwinn.

⁴¹ Bann pasan pe depouy li; so bann vwazin pe sikann li.

⁴² So ennmi pe triyonfe; bann adverser dan lazwa.

⁴³ Zarm nou lerwa konpletman initil; to pe les li perdi lager.

⁴⁴ To finn ras sinbol so pouvwar e so tronn finn devir anbalao lor later.

⁴⁵ To finn fer li vinn vie avan so ler e to finn kouver li ar laont.

⁴⁶ SEGNER, to pou kontinie get lot kote? Pou touzour? To pou les to lakoler kontinie flanbe mem?

⁴⁷ Rapel ki mo lavi bien kourt; To finn kree nou mortel pou nannye ditou.

⁴⁸ Ki dimoun kapav viv san ki li trouv lamor? Ki dimoun kapav sap dan grif lamor?

⁴⁹ Segner, kot to finn met lamour infini ki to ti ena? Kot to finn met bann promes to ti fer David?

⁵⁰ Rapel, Segner, mwa to serviter fidel, mo gagn bann insilt; tou bann lezot nasion modi mwa.

⁵¹ To ennmi insilte lerwa ki twa to finn swazir, SEGNER. Partou kot li pase li gagn zot insilt.

⁵² Anou loue LESEGNER pou toultan! Amenn! Amenn!