Psom 82 - Kreol Morisyen OT Portions

Bondie Toupwisan, limem pli gran

Psom Asaf.

¹ Konsey Siprem Lesiel an renion e Bondie pe prezide; dan lasanble segner lesiel li donn so zizman.

² “Ziska kan zot pou kontign donn zizman bankal, e kontign pran par bann ki lor move sime?

³ Defann drwa bann pov ek bann orfelin; donn lazistis bann ti-dimoun ek bann ki peyna nannye.

⁴ Vinn osekour bann feb ek bann pov. Tir zot dan lame bann move dimoun. “

⁵ Zot pa konn nannye, zot pa konpran nannye, zot pe mars ataton dan lobskirite koripsion, e fondasion later pe sakouye.

⁶ Mo finn dir zot, “Zot bann ti bondie dan lesiel. Zot dan famiy Bondie Pli Lao, zot tou;

⁷ e pourtan, zot pou fini kouma bann mortel; zot lavi pou fini kouma ninport ki sinp sef lor later. “

⁸ Vini Bondie, vinn ziz nou liniver, tou bann nasion pou twa, anba to lotorite.