Psom 81 - Kreol Morisyen OT Portions

Enn sante pou selebre enn gran zour

Pou sef koral, avek lakonpagnman lor laarp Gat. Enn Psom Asaf.

¹ Anou sant nou lazwa pou Bondie, nou lafors; avek lazwa anou loue Bondie ki Zakob ti adore.

² Larg lamizik, tap nou tanbour; fer lagitar ek sitar sant zoli melodi.

³ Soufle tronpet, soufle bigoul pou demar festival nouvel-linn, e letan plenn-linn, e pou festival.

⁴ Sa enn lalwa dan Izrael; enn instriksion Bondie ki Zakob ti adore.

⁵ Li ti donn sa lalwa la lepep Izrael kan li ti atak Lezip. Enn lavwa, ki zame mo finn tande avan, dir,

⁶ “Mo finn tir fardo lor zot zepol; mo finn tir pwa lour dan zot lame, finn depoz li anba.

⁷ Kan zot ti dan difikilte, zot ti dimann mo led mo ti reponn depi dan berso loraz. Mo ti teste zot kan mo ti fer lasours Meriba sek.

⁸ Ayo mo pep, ekout mo avertisman; Izrael, si selman to ti kapav ekout mwa!

⁹ Fode pa ena bondie etranze parmi zot. Pa ador enn lot ki mwa.

¹⁰ Mwa mo LESEGNER to Bondie; Mwa ki ti tir zot depi Lezip. Ouver zot labous e mo pou plin zot vant.

¹¹ Me mo pep ti aret ekoute; Izrael ti refiz obeyir mwa.

¹² Akoz sa mo ti les zot fer zot teti e debrouy zot difil kouma zot ti oule.

¹³ Si selman mo pep ti ekout mwa; si selman zot ti obeyir mo instriksion.

¹⁴ Vit-vit mo ti pou detrir zot ennmi; lor vites mo aneanti bann ki rod fer zot ditor.

¹⁵ Bann ki ayir LESEGNER pou kourbe ar lafreyer divan li, zot pinision pa pou ena finision.

¹⁶ Me mo pep ti pou manz meyer dible; e ti pou bwar meyer dimiel sovaz.”