Psom 69 - Kreol Morisyen OT Portions

Pa abandonn mwa, Segner Bondie

Pou sef koral, dapre lis. Enn sante David.

¹ Bondie, sov mwa! Dilo pe tous mo manton;

² mo lipie pe fons dan labou parski dan fon tou finn vinn mou; mo pe perdi pie e bann vag ot pe vinn nway mwa.

³ Mo finn fatige kriye osekour e mo lagorz sek ek amare. Mo lizie finn vinn feb afors mo pe atann Bondie.

⁴ Bann ki ayir mwa san rezon zot pli boukou ki seve lor latet. Mo ennmi koz manti lor mwa; zot for, e zot pe konplote pou touy mwa. Zot ti oule mo rann seki zame mo ti kokin.

⁵ To konn bien, Bondie, tou erer ki mo finn fer; to konn bien kouma mo ti bet.

⁶ Pa les mo erer fer dimoun ki esper dan twa gagn laont, O Segner BONDIE Toupwisan! Pa les mo febles fer dimoun ki ador twa perdi loner, O Bondie, Souvrin Izrael!

⁷ Mo finn aksepte insilt ek kalomni akoz twa; laont ek imiliasion kouver mwa.

⁸ Personn pa konn mwa parmi mo bann frer dan vilaz; mo enn etranze parmi garson mo mama dan mo prop lakaz.

⁹ Lamour pou to lakaz devor mwa kouma laflam; bann insilt ki avoy lor twa tom lor mwa.

¹⁰ Ler mo plore ek zene la osi zot insilte mwa.

¹¹ Mo met linz dey bann la rakont zistwar foutan lor mwa.

¹² Bann ki asiz dan lantre vilaz koz kont mwa, e bann soular sant sante boufon lor mwa.

¹³ Me mwa, SEGNER, mo priye twa. Bondie, dan letan ki twa to trouv bon, reponn mwa, dan labondans to lamour infini, twa ki fidel pou sov nou.

¹⁴ Anpes mwa koul dan labou; protez mwa kont mo ennmi; pa les dilo bwar mwa.

¹⁵ Pa les debordman nway mwa, ris mwa dan fon ouswa may mwa dan trou lamor.

¹⁶ Reponn mwa, SEGNER, dan to lamour infini; dan to mizerikord tourn ver mwa.

¹⁷ Pa kasiet to figir, get to serviter, mo dan gran lapenn, reponn mwa!

¹⁸ Koste pre ar mwa, sov mwa, liber mwa, mo ena ennmi.

¹⁹ To kone kouma zot pe insilte mwa; kouma zot zet labou lor mwa, dezonor mwa. To bien konn mo bann ennmi.

²⁰ Kalomni kas mo leker, dezespwar trap mwa par lagorz. Mo ti rod sinpati, peyna personn! Mo ti rod konsolasion me dan vid!

²¹ Ler mo ti fin mo ti gagn pwazon pou manze; ler mo ti gagn swaf zot ti donn mwa vineg pou bwar.

²² Letan zot dres latab divan zot ar bon repa, ki sa vinn zot piez, e seremoni ansam ar zot invite vinn enn latrap.

²³ Tengn lalimier dan zot lizie! Kabos zot ledo ar douler!

²⁴ Vers to koler lor zot; fer to malediksion pini zot.

²⁵ Devid zot vilaz net e pa les personn res vivan dan zot lakaz.

²⁶ Zot martiriz bann ki to finn pini; zot tortir bann ki finn blese.

²⁷ Gard enn kont tou zot pese; pa ena okenn pitie pou zot.

²⁸ Efas zot nom dan liv lavi. Pa kont zot parmi bann zis.

²⁹ Mo pe soufer, mo dan lapenn; par to sekour, Bondie, sov mwa.

³⁰ Mo pou loue nom Bondie par enn kantik; mo pou proklam so grander avek aksiondegras.

³¹ LESEGNER pou plis kontan sa ki bann sakrifis zanimo, plis ki enn toro ar so korn ek so sabo.

³² Kan bann ki pe soufer trouv sa zot pou kontan; bann ki zot leker pe rod Bondie pou regagn kouraz.

³³ LESEGNER ekout dimoun ki bizin led e li pa bliye so pep ki dan prizon.

³⁴ Zot tou, bann kreatir lesiel, later, lamer, loue Bondie.

³⁵ Li pou sov Zerizalem e rekonstrir bann lavil dan Zide. So pep pou viv laba, zot pou pran posesion later la.

³⁶ Desandan so bann serviter fidel pou erit sa later la e bann ki kontan LESEGNER pou viv ere laba.