Psom 66 - Kreol Morisyen OT Portions

Enn sante pou dir mersi Bondie

Pou sef koral. Enn sante. Enn Psom.

¹ Sant louanz Bondie avek lazwa tou dimoun ki lor later;

² sant laglwar so nom; donn li laglwar.

³ Dir Bondie, “Tou seki to fer, zot extraordiner. To lafors sitan gran ki to ennmi kapitile e tranble divan twa.

⁴ Tou dimoun lor later tom azenou divan twa; zot sant to louanz, zot beni to nom.”

⁵ Vinn gete seki Bondie finn fer! Vinn admir so explwa pou bann dimoun!

⁶ Li ti fer lamer sek pou ki nou bann anset kapav traverse. Anou selebre so explwa.

⁷ Par so pwisans so regn eternel e li vey lor tou nasion. So ennmi pa pou kapav dres kont li.

⁸ Tou dimoun, zot bizin dir mersi nou Bondie. Sant so louanz for-for!

⁹ Li finn prezerv nou lavi e li pa finn les nou tonbe.

¹⁰ To finn teste nou, Bondie; parey kouma bizoutie pirifie larzan ar dife.

¹¹ To ti les nou rant dan piez; to ti met gro fardo lor nou ledo.

¹² To ti les nou ennmi pil lor nou; to ti les nou travers dife ek debordman me to finn met nou dan enn landrwa anabondans.

¹³ Mo pou ofer sakrifis konple dan to Tanp; mo pou donn ofrand kouma mo ti promet.

¹⁴ Mo pa pou bliye promes mo ti dir ler mo ti dan detres.

¹⁵ Mo pou ofer sakrifis zanimo gra! Ler mouton, toro ek bouk brile lafime pou mont ziska lesiel.

¹⁶ Vinn ekout mwa zot tou ki ena lakrint Bondie e mo pou dir zot seki Bondie finn fer pou mwa.

¹⁷ Mo ti sipliy li vinn ed mwa; mo ti sant so louanz.

¹⁸ Si mo ti gard pese dan mo leker, Lesegner pa ti pou vinn ed mwa.

¹⁹ Me Bondie ti ekoute, li ti tann mwa e li ti ekzos mo lapriyer.

²⁰ Mo loue Bondie parski li pa ti rezet mo siplikasion; li pa ti repran so lamour infini.