Psom 62 - Kreol Morisyen OT Portions

Mo lafwa li ferm

Pou sef koral. Dapre Yedoutoun. Psom David.

¹ Zis kot Bondie tousel ki mo trouv trankilite. Zis li tousel kapav sov mwa.

² Li tousel mo protekter ek mo sover; li mo fortres; nannye pa pou sekwe mwa.

³ Pandan komie letan ankor zot pou atak enn dimoun, zot sey zet li anba, kouma enn miray feb, enn baraz ki so poto kase?

⁴ Zot anvi zet li depi so plas doner kot li finn asize; zot kontan invant koze mansonz; ar zot labous zot donn benediksion, dan fon zot leker nek ena malediksion.

⁵ Zis kot Bondie ki mo trouv trankilite; li tousel kapav donn mwa mo lespwar.

⁶ Li tousel mo protekter ek mo sover; li mo fortres; nannye pa pou sekwe mwa.

⁷ Mo delivrans ek mo loner zot dan lame Bondie; Limem mo gran protekter ek mo refiz.

⁸ Zot ki la, fer Bondie konfians touletan; dir li seki ena lor zot leker. Bondie enn labri pou protez nou.

⁹ Nou, dimoun, nou zis enn ti souf respirasion; ki nou gran ki nou tipti nou pa vo gransoz; met nou lor balans e nou pa pez nannye ditou; nou pli leze ki enn ti labriz.

¹⁰ Pa met konfians dan violans; pa met lespwar dan lamone kokin; mem kan larises pe ogmante pa met konfians ladan.

¹¹ Enn koze ki Bondie finn dir, Plis ki enn fwa mo finn tande, ki tou pouvwar pou li.

¹² Segner, to osi enn Bondie damour, ki rekonpans sakenn dapre so aksion.