Psom 46 - Kreol Morisyen OT Portions

Lesegner Bondie li ar nou

Pou sef koral. Instriksion ki sorti dan fraternite Kore. Dapre Alamot. Enn sante.

¹ Bondie, limem nou protekter, lasours nou lafors; kan difikilte pe kraze partou Li touzour la pou ed nou.

² Akoz sa nou pa per kan later tranble ouswa kan montagn al fonn dan fon lamer;

³ nou peyna pou per mem kan lamer leve ek kime e li sakouy montagn avek violans.

⁴ Ena enn larivier ki amenn lazwa dan lavil Bondie, dan lakaz ki pli sin, lakaz Bondie Pli Lao.

⁵ Bondie omilie so lavil ki pa pou konn destriksion; letan soley leve, li fini la pou donn sekour.

⁶ Bann tribi tranble; bann rwayom degringole; Bondie koze kouma toner, later fonn.

⁷ LESEGNER Toupwisan li toultan ar nou! Bondie ki Zakob ti priye limem nou protekter.

⁸ Vini, vinn get avek admirasion grander LESEGNER; vinn get ravaz ki li finn fer lor later.

⁹ Li finn aret lager ki ena partou dan lemond; kas-kas bann zarm anmorso e bril lekipman militer dan enn gran dife.

¹⁰ “Arete “li dir “e rekonet ki momem Bondie; pa bliye, mo regn lor tou nasion; mo regn lor liniver. “

¹¹ LESEGNER Toupwisan Li toultan ar nou! Bondie ki Zakob ti priye limem nou fortres.