Psom 41 - Kreol Morisyen OT Portions

Lapriyer enn dimoun malad

Pou sef koral. Enn Psom David.

¹ Bienere dimoun ki pran kont ek ed bann pov kan zot dan difikilte, LESEGNER pou delivre zot.

² LESEGNER protez ek gard zot vivan; zot ere lor later. To pa abandonn zot dan lame zot ennmi.

³ LESEGNER pou pran zot swin ler zot malad e refer zot vinn fringan.

⁴ Mo ti konfese, “Mo finn fer pese kont twa SEGNER; pardonn mwa e donn mwa gerizon.”

⁵ Bann ki deteste mwa zot kalomnie mwa; zot souete ki mo mor e ki mo nom disparet.

⁶ Mem bann ki rann mwa vizit zot pa sinser; zot vinn tir linformasion e lerla zot fann rimer.

⁷ Tann zot pe mirmire dan zorey zot vwazin! Zot pe priye ki mo fini mal.

⁸ Zot dir, “Li pa pou sape ar sa maladi la! Peyna li sape sannfwala!”

⁹ Mem mo meyer kamarad - mo ti kapav met lame dan dife pou li; nou ti partaz tou - li mars ar bannla aster.

¹⁰ Me twa, SEGNER, par pitie redonn mwa lasante e lerla mo fer mo ennmi peye.

¹¹ Mo kone ki to ena afeksion pou mwa, parski mo ennmi pa finn gagn viktwar lor mwa.

¹² To finn relev mwa akoz mo lintegrite, to pou gard mwa dan to prezans eternelman.

¹³ Glwara twa SEGNER, Bondie Izrael, aster, pli divan ek toultan. Amenn! Amenn!