Psom 36 - Kreol Morisyen OT Portions

Bondie lasours lavi

Pou sef koral. Enn Psom David, serviter LESEGNER.

¹ Dan mo leker mo mazinn koze move dimoun ki dir, “Mo pa trouve kifer bizin tranble divan Bondie. “

² Zot telman flat zotmem ki zot pa rekonet zot fot, ni deteste zot pese.

³ So labous plin ar kalomni ek mansonz; li tourn so ledo ar lasazes, li aret fer dibien.

⁴ Li tir plan pou fer ditor kan li pe alonze lor so lili; li angaz limem pou swiv move sime, li pa rezet lemal.

⁵ SEGNER, to lamour infini al tous lesiel, to fidelite mont ziska bann niaz.

⁶ To drwatir li pli ot ki montagn pli ot; to lazistis gran ek profon kouma losean. SEGNER, to prezerv dimoun ek zanimo.

⁷ Bondie, to lamour infini samem nou pli gran trezor; anba to lezel tou dimoun santi zot ansekirite;

⁸ dan labondans to lakaz, to konble zot ar manze, zot bwar dan larivier to bonte.

⁹ Tomem lasours lavi e to lalimier ekler nou lavi.

¹⁰ Donn to lamour dimoun ki rekonet to grander e lazistis bann ki ena leker drwat.

¹¹ Pa permet bann fezer kraz mwa anba zot lipie, e pa les lame move dimoun sas mwa.

¹² Get laba! Bann move dimoun pe manz lapousier. Peyna zot releve.