Psom 3 - Kreol Morisyen OT Portions

Bondie zame abandonn nou

Enn Psom David letan li ti pe sove divan so garson Absalom.

¹ SEGNER, mo ena lennmi partou! Zot boukou, ki pe lev kont mwa!

² Zot koz enn ta lor mwa, zot dir, “Pena sime Bondie delivre li. “

³ Me twa, SEGNER, to touzour boukliye ki protez mwa; to sov mo loner, to relev mo latet.

⁴ Mo kriye osekour for for mem ver LESEGNER e li reponn mwa depi so montagn sakre.

⁵ Aswar mo alonze, mo dormi anpe; gramatin mo leve; LESEGNER la, li mo sekirite.

⁶ Mem si enn larme mil dimoun anserkle mwa sa pa fer mwa per.

⁷ O SEGNER, lev twa! Sov mwa, mo Bondie! Kalot mo bann lennmi, grenn ledan bann ki fer lemal.

⁸ O SEGNER, twa ki amenn delivrans. Devers to benediksion lor to pep.